Last updated on March 14th, 2025 at 05:59 am
ವಿಧಾನಸಭೆಟ್ ಶಾಸಕೆ ಹರೀಶ್ ಪೂಂಜೆರ್ ನಮ್ಮ ಜಿಲ್ಲೆಲೆನ ಸಮಸ್ಯೆಲೆನ ಬಗೆಟ್ ಪಾತೆರೊಂದುಪ್ಪುನಗ ಸ್ಪೀಕರ್ ಖಾದರ್ ಅರ್ಜೆಂಟ್ ಮಲ್ತಿನೆಕ್ ಎಂಕುಲು ಕುಡ್ಲಡ್ ಬೇತೆನೇ ವಿಧಾನಸೌಧ ಕಟ್ಟಾವೊಂದು ಅಲ್ಪ ಪಾತೆರುನ ವ್ಯವಸ್ಥೆ ಮಲ್ಪೊಡಾವು ಪನ್ದ್ ಪರೋಕ್ಷವಾದ್ ಪ್ರತ್ಯೇಕ ರಾಜ್ಯೊದ ಸುದ್ದಿ ದೆತ್ತ್‌ದೆರ್.
ಶಾಸಕೆ ಹರೀಶ್ ಪೂಂಜೆರ್ ಜಿಲ್ಲೆಲೆಡ್ ಉದ್ಯೋಗ ಸೃಷ್ಟಿ ಆವೊಡು, ನೀರ್‌ದ ಸಮಸ್ಯೆ ಆವಂದಿವೆಕ ಪಶ್ಚಿಮವಾಹಿನಿ ಯೋಜನೆ ಆವೊಡು, ಹೈಕೋರ್ಟ್ ಪೀಠ ಕುಡ್ಲಡ್ ಆವೋಡು, ಮಲೆಕುಡಿಯೆರೆಗ್ ಬೋಡಾಪಿನ ಮೂಲಭೂತ ಸೌಲಭ್ಯೊಲು ಆವೊಡು ಪನ್ದ್ ಪಾತೆರೊಂದು “ಕರಾವಳಿ ಅಭಿವೃದ್ಧಿ ಪ್ರಾಧಿಕಾರೊಗು ಬುಲೆಚ್ಚಿಲ್‌ದ ದಿಟ್ಟಿಡ್ ರಾಜ್ಯ ಸರ್ಕಾರ ವರ್ಸ ವರ್ಸ ಈತ್ ಪನ್ದ್ ಕಾಸ್ ಕೊರೊಡು, ಎಂಕ್ಲೆನ ಕಡಲ ಕರೆತ ಜಿಲ್ಲೆಲೆಗ್ ನನ ದುಂಬುದ ದಿನೊಟು ದಾಲ ತಾರತಮ್ಯ ಆವರೆ ಬಲ್ಲಿ” ಪನ್ದ್ ಪಾತೆರೊಂದುಪ್ಪುನಗ ಸುರುರ್ದೆ ಅರ್ಜೆಂಟ್ ಮಲ್ತೊಂದಿತ್ತಿನ ಸ್ಪೀಕರ್ ಬೇಗ ಮುಗಿಪುಲೆ ಬೇಗ ಮುಗಿಪುಲೆ ಪನ್ದ್ ಪನ್ತೆರ್.
ತನ್ನ ಪಾತೆರೊನು ದುಂಬರಿತೊಂದು ಶಾಸಕೆ ಪೂಂಜೆರ್, ಇನಿ ತೂಲೆ ಅಧಿವೇಶನೊಡು ಪಾತೆರ್ಯಲಾ ಈರ್ ಅರ್ಜೆಂಟ್ ಮಲ್ತೊಂದುಲ್ಲರ್, ಈರ್ ಇಂಚ ಅರ್ಜೆಂಟ್ ಮಲ್ತರ್ನ್ಡ ಎಂಕ್ಲುಲಾ ಕುಡ್ಲಡ್ ಒಂಜಿ ವಿಧಾನಸೌಧ ಕಟ್ಟಾದ್ ಎಂಕ್ಲೆನ ಸಮಸ್ಯೆಲೆನ ಬಗೆಟ್ ಪಾತೆರ್ಯೆರ ಅವಕಾಶ ಮಲ್ತೊನುನ ವ್ಯವಸ್ಥೆ ಮಲ್ಪೊಡಾವು. ಕುಡೊರ ತುಳುನು ಕರ್ನಾಟಕೊಡು ಅಧಿಕೃತ ಭಾಷೆ ಮನ್ಪೊಡುಂದ್ ಕೇಂಡೊನುವೆ ಪನ್ದ್ ಪನ್ಡೆರ್.
ಅಕೇರಿಡ್ ತುಳುಟೇ “ಪಾತೆರ್ಯೆರೆ ಅವಕಾಶ ಮಲ್ತ್ ಕೊರ್ನೆಕ್ ಸೊಲ್ಮೆಲು” ಪನ್ದ್ ಪನ್ಡೆರ್.
ಶಾಸಕೆರೆ ಪಾತೆರೊಗು ಆಕ್ಷೇಪ ತೂಪಾಯಿನ ಕಾಂಗ್ರೆಸ್ ಶಾಸಕೆರ್ ಆ ಜಿಲ್ಲೆಲು ಎಂಕ್ಲೆನೊಟ್ಟುಗೇ ಇಪ್ಪೊಡು ಪನ್ದ್ ಪನ್ಡೆರ್.