Last updated on March 14th, 2025 at 08:29 am
ಕುಡ್ಲ, ಮಾ.14: ಬಿಜೈ ಕಾಪಿಕಾಡ್‌ಡ್ ರಿಟೈರ್ಡ್ ಬಿ.ಎಸ್.ಎನ್.ಎಲ್ ಉದ್ಯೋಗಿ ಒರಿ ಪರ ಪಗೆಟ್ ಬರಿತಿಲ್ಲದಾಯನ್ ಕೆರ್ಯೆರ ಬೋಡಾದ್ ಕಾರ್‌ನ್ ಬರಸ್‌ಡ್ ಬುಡೊಂದು ಬತ್ತ್‌ದ್ ಬೈಕ್‌ಗ್ ಎಡ್ತ್‌ದ್ ಎದುರು ಪೋದು ನಡತೊಂದು ಪೋವೊಂದಿತ್ತಿನ ಪೊಂಜೊವುಗು ಎಡ್ತಿನ ನಡಕೆ ನಡತ್‌ದ್ಂಡ್.
ಬಿ.ಎಸ್.ಎನ್.ಎಲ್ ಉದ್ಯೋಗಿ ಸತೀಶ್ ಕುಮಾರ್ ಬೊಕ್ಕ ಮುರಳಿ ಪ್ರಸಾದ ನೆರೆಕರೆತಕುಲು. ಸತೀಶ್ ಕುಮಾರ್.ಕೆ.ಎಂ ಮೆರೆಗ್ ಮುರಳಿ ಪ್ರಸಾದ್ ಬೊಕ್ಕ ಆರೆನ ಇಲ್ಲದಕ್ಲೆಗ್ ದುಂಬುರ್ದೇ ದಾದಾಂಡಲಾ ಉಪದ್ರ ಮಲ್ತ್‌ದ್ ಪೆದಂಬು ನೆರೊಂದಿತ್ತ್‌ದ್, ದುಂಬೊರ ಮುರಳಿ ಪ್ರಸಾದ್‌ರೆನ ಅಮ್ಮೆರ್ ನಡತೊಂದು ಪೋವೊಂದುಪ್ಪುನಗ ಆರೋಪಿ ಸತೀಶ್ ಕುಮಾರ್.ಕೆ.ಎಂ ಪನ್ಪಿನಾರ್ ಪೊಕ್ಕಡೆ ಪೊಕ್ಕಡೆ ಬೈಕ್‌ಡ್ ಬತ್ತ್‌ದ್ ಎಡ್ತ್‌ದ್ ಪೆದಂಬು ನೆರ್ದಿತ್ತ್‌ದ್, ಈ ಬಗೆಟ್ ಉರ್ವ ಸ್ಟೇಶನ್‌ಡ್ 2023 ಟ್ ಒಯಿಲ್ ದಾಕಲಾದುಂಡು.
ಆಂಡ ಕೋಡೆ ಕಾಂಡೆ 8.15 ತ ಅಂದಾಜಿಗ್ ಬಿಜೈ ಕಾಪಿಕಾಡ್‌ದ 6 ನೇ ಮೈನ್ ರೋಡ್‌ಡ್ ಮುರಳಿ ಪ್ರಸಾದ್ ತನ್ನ ಬೈಕ್‌ಡ್ ಇಲ್ಲರ್ದ್ ಪಿದಡೊಂದುಪ್ಪುನಗ ಆರೋಪಿ ಸತೀಶ್ ಕುಮಾರ್.ಕೆ.ಎಂ ಮೇರ್ ತನ್ನ ಕಾರ್‌ಡ್ ಕಾತ್‌ದ್ ಕುಲ್ಲುದು ಮುರಳಿ ಪ್ರಸಾದೆರೆನ್ ಕೆರ್ಪುನ ಉದ್ದೇಶೊಡೇ ಕಾರ್‌ನ್ ಬಾರೀ ಬೀಸ ಬುಡೊಂದು ಬತ್ತ್‌ದ್ ಬೈಕ್‌ಗ್ ಎಡ್ತ್‌ದ್ ಎದುರು ನಡತೊಂದು ಪೋವೊಂದಿತ್ತಿನ ಪೊಂಜೊವುಗು ಎಡ್ತ್‌ದೆರ್. ಎಡ್ತೆಡ್ ನಡತೊಂದು ಪೋವೊಂದಿತ್ತಿನ ಪೊಂಜೊವುಗು ಗಡಿಕುಲಾದ್, ಮುರಳಿ ಪ್ರಸಾದ ಮೆರೆಗ್ಲಾ ಕೂಡ ಗಡಿಕುಲಾದ್ ಆಸ್ಪತ್ರೆಡ್ ಮರ್ದ್ ಮಲ್ತೊಂದುಲ್ಲೆರ್. ಪೊಲೀಸೆರ್ ಆರೋಪಿ ಸತೀಶ್ ಕುಮಾರ್.ಕೆ.ಎಂ ನ್ ವಶೊಕು ಗೆತೊಂದಿತ್ತ್‌ದ್, ಕಾರ್‌ನ್ ಸ್ವಾಧೀನ ಮಲ್ತೊಂದೆರ್.
ಈ ಬಗೆಟ್ ಉರ್ವಾ ಸ್ಟೇಷನ್‌ಡ್ ಕೆರ್ಪುನ ಪುನೆಪು ಬೊಕ್ಕ ಪಡ್ಡಾಯಿ ಸಂಚಾರಿ ಸ್ಟೇಶನ್‌ಡ್ ಪೊಂಜೊವುಗು ಎಡ್ತಿನ ಬಗೆಟ್ ಪ್ರಕರಣ ದಾಕಲಾತ್ಂಡ್.