Last updated on March 14th, 2025 at 05:45 pm
ಕುಡ್ಲ, ಮಾ.14: ಬಜ್ಪೆದ ಪೇಜಾವರ ಮಾಗಣೆದ ನೆಲ್ಲಿದಡಿಗುತ್ತು ಕಾಂತೇರಿ ಜುಮಾದಿ ದೈವಸ್ಥಾನೊದ ಧಾರ್ಮಿಕ ವಿಧಿವಿಧಾನೊಲೆನ್ ಕರಿಪುನ ದಿಟ್ಟಿಡ್ ಅಧಿಕಾರಿಲೆರ್ದ್ ಸಕಾರಾತ್ಮಕ ಸ್ಪಂದನೆ ತಿಕ್ಕಿನೆರ್ದಾವರ ಮಾ.18ದಾನಿಗ್ ಅಟ್ಟನೆ ಆದಿತ್ತಿನ ಬಜ್ಪೆ-ನೆಲ್ಲಿದಡಿಗುತ್ತು ಪಾದಯಾತ್ರೆನ್ ತಾತ್ಕಾಲಿಕವಾದ್ ಕೈ ಬುಡ್ತೆರ್.
ಅವೆತ ಪಗತೆಗ್ ನೆಲ್ಲಿದಡಿ ಗುತ್ತುದ ಚಾವಡಿಡ್ ಸಾಮೂಹಿಕ ಪ್ರಾರ್ಥನೆ ಮನ್ಪೆರ ನಿರ್ಧಾರ ಮಲ್ತ್‌ದ ಪನ್ದ್ ನೆಲ್ಲಿದಡಿ ಒರಿಪಾಲೆ ಪೊರ್ಮ್ಬಾಟ ಸಮಿತಿ ಪನ್ತ್ಂಡ್.
ಪೊರ್ಮ್ಬಾಟ ಸಮಿತಿದ ಮುಖಂಡೆರ್ ಶ್ರೀಕಾಂತ್‌ ಶೆಟ್ಟಿ ಕಾರ್ಲ ಪತ್ರಿಕಾಗೋಷ್ಠಿಡ್ ಪಾತೆರ್ದ್, ಸಂಸದೆ ಬ್ರಿಜೇಶ್‌ ಚೌಟೆರ್ ಜಿಲ್ಲಾಧಿಕಾರಿಲೆನ ಮುತಾಲಿಕೆಡ್ ಇನಯ ಲೆತ್ತ್‌ದ್ ಈ ಸಮಸ್ಯೆಗ್ ಪಿರಿಕಟ್ಟ್ ನಾಡುನ ಪಾತೆರ ಕೊರ್ತಿನೆರ್ದಾವರ ಪಾದಯಾತ್ರೆನ್ ಇತ್ತೆಗ್ ಕೈಬುಡ್ತ ಪನ್ದ್ ಪನ್ಡೆರ್.
ಎಪ್ರಿಲ್‌ಡ್ ಚಾವಡಿ ನೇಮ ನಡಪರೆಗಿತ್ತ್‌ದ್, ಸುಮಾರ್ ಒಂಜರೆ ಸಾರ ಜನ ಬರ್ಪೆರ್ ಪನ್ದ್ ಪನ್ಡೆರ್. ನೆಲ್ಲಿದಡಿಗುತ್ತು ಗಡಿಪ್ರಧಾನೆರಾಯಿನ ಲಕ್ಷ್ಮಣ ಚೌಟ, ಮುಖಂಡೆರಾಯಿನ ಅಶ್ವಿ‌ನ್‌ ಶೆಟ್ಟಿ, ಶರತ್‌ ಶೆಟ್ಟಿ ಒಟ್ಟುಗಿತ್ತೆರ್.