Last updated on March 24th, 2025 at 04:12 pm
ಕುಡ್ಲ: ‘ನಮ್ಮ ಕಣ್ಣ್‌ರ್ದ್ ಮದೆ ಆವೊಂದುಪ್ಪುನ ತುಳು ಪರಿಸರ, ಜನಪದ ಸಂಸ್ಕೃತಿ, ಇತಿಹಾಸೊದ ಪುರಾಪುಲು, ಆಚಾರ ವಿಚಾರ, ಕಟ್ಟ್ – ಕಟ್ಲೆಲು ಒರಿಯೊಡಾಂಡ ಜವನೆರ್ ಅವೆಟ್ ಉಮೇದ್ ತೋಜಾವೊಡು. ಶಾಲೆ ಕಾಲೇಜಿಲೆಡ್ ತುಳು ಕಾರ್ಯಕ್ರಮೊಲೆಗ್ ಎಚ್ಚಿನ ಅವಕಾಶ ತಿಕ್ಕ್ಂಡ ಅವು ಸಾಧ್ಯ. ತುಳುನು ನನದ ತರೆಮಾರ್‌ಗ್ ಎತ್ತಾವುನೆಟ್ ಉತ್ಸಾಹೀ ಜವನೆ ಜವನ್ದಿಯರ್ಲು ಪುನೆಯೊಡು’ ಪನ್ದ್ ತುಳು – ಕನ್ನಡ ಸಾಹಿತಿ, ಕರ್ನಾಟಕ ಯಕ್ಷಗಾನ ಬೊಕ್ಕ ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಪದುಕೆ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಕುಡ್ಲದ ಗಾಂಧಿನಗರ ಶ್ರೀ ಗೋಕರ್ಣನಾಥೇಶ್ವರ ಕಾಲೇಜಿಡ್ ಪೊಸತಾದ್ ಸುರು ಮಲ್ದಿನ ‘ಸಿರಿ ಚಾವಡಿ’ ತುಳುಕೂಟನ್ ತಾರೆದ ಕೊಂಬು ಅರ್ಲಾದ್ ಸಾಂಪ್ರದಾಯಿಕವಾದ್ ಉದಿಪನ ಮಲ್ತ್‌ದ್ ಪನ್ಡೆರ್.
‘ತುಳು ಸಮೃದ್ಧವಾಯಿನ ಭಾಷೆ. ಪಾಕ ಜನಪದ ಸಾಹಿತ್ಯ, ಮೌಖಿಕ ಕಾವ್ಯ, ಸಂಧಿ – ಪಾಡ್ದನ, ಗಾದೆ – ಎದುರುಕತೆ ದಿಂಜಿನ ತುಳು ಭಾಷೆಡ್ ಇಂಚಿಪೊಗು ಪಾಕ ಕೃತಿಕುಲು ಅಂಚೆನೇ ಸಂಶೋಧನಾತ್ಮಕ ಗ್ರಂಥೊಲು ಪ್ರಕಟ ಆತ. ದೈವಾರಾಧನೆ, ನಾಗಾರಾಧನೆ ಬೊಕ್ಕ ಯಕ್ಷಾರಾಧನೆಲೆನ ಮುಕೇನ ತೌಳವ ಸಂಸ್ಕೃತಿನ್ ಲೋಕೊಡೊರ್ಮೆ ಇಪ್ಪುನ ತುಳುವೆರ್ ಲೋಕೊಗು ಗುರ್ತ ಮಲ್ತ್ ಕೊರ್ತೆರ್’ ಪನ್ದ್ ಆರ್ ಪನ್ಡೆರ್.
ಕಾರ್ಯಕ್ರಮೊಡು ‘ಗೇನದ ಮದಿಪು’ ಉಪನ್ಯಾಸ ಕೊರ್ನ ಜಾನಪದ ತಜ್ಞೆ ಕೆ.ಕೆ.ಪೇಜಾವರ ಪಾತೆರ್ದ್, ‘ಬೆನ್ನಿ ಬೊಕ್ಕ ದೈವಾರಾಧನೆ ತುಳು ಬದ್‌ಕ್‌ದ ಪ್ರಧಾನ ಅಂಗೊಲು. ಅವೆತೊಟ್ಟುಗು ಸಂಧಿ – ಪಾಡ್ದನೊಲು ನಮ್ಮ ಮಣ್ಣ್‌ದ ಸತ್ವೊನು ಲೆತ್ತ್ ಪನ್ಡೊನ್ದುಲ್ಲ’ ಪನ್ದ್ ಪನ್ಡೆರ್.
ಪೆರಿಯ ಜಾನಪದ ಕಲಾವಿದೆ ಲೀಲಾವತಿ ಕುಪ್ಪೆಪದವು ಮೇರ್ ತುಳುನಾಡ್‌ದ ಉಗಮೊದ ಸಂಧಿ ಬೊಕ್ಕ ಓಬೇಲೇ ಪಾಡ್ದನೊನು ಪನ್ಡೆರ್. ಸಮಾರಂಭೊದ ಗುರ್ಕಾರ್ಮೆನ್ ಕಾಲೇಜಿದ ಸಂಚಾಲಕೆ ವಸಂತ್ ಕಾರಂದೂರು ವಯಿತೊಂಡೆರ್.
ಸಾದಗೊ ಮಲ್ದಿನಕ್ಲೆಗ್ ಸನ್ಮಾನ:
ಸಭೆಟ್ ಪೆರಿಯ ಸಾಧಕೆರಾಯಿನ ಪಾಡ್ದನ ಕಲಾವಿದೆದಿ ಲೀಲಾವತಿ ಬೊಕ್ಕ ಪುಗರ್ತೆದ ಬೈದ್ಯೆರ್ ಡಾ.ಮುರಳಿ ಕುಮಾರ್ ಚಿಲಿಂಬಿ ಮೊಕಲೆಗ್ ‘ಸಿರಿ ಚಾವಡಿ’ ವತಿರ್ದ್ ಸನ್ಮಾನ ಮಲ್ತೆರ್. ಕಂಬುಲದ ಎರ್ಲೆನ್ ತಾಂಕುನ ಕೊಂಡಾಣ ಗುತ್ತುದ ನಾಗೇಶ್ ರೈ ಬೊಕ್ಕ ಪರ ವಿದ್ಯಾರ್ಥಿ ಸಂಘೊದ ಗುರ್ಕಾರ್ದಿ ಜಯಶ್ರೀ ಮೊಕಲೆಗ್ ಗೌರವ ಸಂದಾಯೆರ್. ಗ್ರಂಥ ಪಾಲಕಿ ದಿವ್ಯಾ ಎ. ಬೊಕ್ಕ ಎಂ.ಕಾಂ. ಉಪನ್ಯಾಸಕೆ ಲೆಫ್ಟಿನೆಂಟ್ ಪ್ರವೀಣ್ ಸನ್ಮಾನ ಪತ್ರ ಓದಿಯೆರ್.
ಶ್ರೀ ವೆಂಕಟೇಶ ಶಿವಭಕ್ತಿ ಯೋಗ ಸಂಘೊದ ಉಪಾಧ್ಯಕ್ಷೆ ಶೇಖರ ಪೂಜಾರಿ, ಡಾ.ಬಿ.ಜಿ. ಸುವರ್ಣ, ಕಾಲೇಜು ಆಡಳಿತ ಮಂಡಳಿ ಸದಸ್ಯೆ ರಂಜನ್ ದಾಸ್, ವಿಜಯ್, ಜಯರಾಮ ಕಾರಂದೂರು, ಆಡಳಿತಾಧಿಕಾರಿ ನಾಗೇಶ್ ಕರ್ಕೇರ, ನಿವೃತ್ತ ಪ್ರಾಧ್ಯಾಪಕೆ ಡಾ.ಉಮ್ಮಪ್ಪ ಪೂಜಾರಿ, ಬಿ. ಎಡ್. ಕಾಲೇಜು ಪ್ರಾಂಶುಪಾಲೆ ಉದಯಕುಮಾರ್ ಬಿ., ಪದವಿ ರ್ಪೂರ್ವ ಕಾಲೇಜಿದ ಪ್ರಾಂಶುಪಾಲೆರ್ ರಘುರಾಜ್ ಕದ್ರಿ, ಎಂ.ಕಾಂ. ವಿಭಾಗದ ಸಂಯೋಜಕಿ ಸುಜಾತ, ಐಕ್ಯೂ ಎಸಿ ಸಂಯೋಜಕೆ ಯತೀನ್, ವಿದ್ಯಾರ್ಥಿ ಪ್ರತಿನಿಧಿಲಾಯಿನ ನವ್ಯ ಶ್ರೀ , ಸುಮಿತ್ ಒತ್ತುಪಾಲಿತ್ತೆರ್. ಈ ಪೊರ್ತುಡು ಕಾಲೇಜಿದ ಉಪನ್ಯಾಸಕಿ ಡಾ. ನಿಶಾ ಯುವರಾಜ್ ಬೊಕ್ಕ ಡಾ. ಮಂಜುಳಾ ಮಲ್ಯ ಮೊಕುಲು ಬರೆತಿನ ಪೊಸ ಅರ್ಥಶಾಸ್ತ್ರ ಕೃತಿನ್ ಗಣ್ಯೆರ್ ಬುಡುಗಡೆ ಮಲ್ತೆರ್.
‘ಸಿರಿ ಚಾವಡಿ’ ತುಳುಕೂಟದ ಸಂಯೋಜಕೆ ವಸಂತ್ ಎದ್ಕೊಂಡೆರ್. ಪದವಿ ಕಾಲೇಜು ಪ್ರಾಂಶುಪಾಲೆರ್ ಡಾ.ಬಸವರಾಜ್ ಪ್ರಾಸ್ತಾವಿಕ ಪಾತೆರ ಪಾತೆರ್ಯೆರ್. ಡಾ ನಿಶಾ ಯುವರಾಜ್ ಬೊಕ್ಕ ಮಿಥುನ್ ಚಂದ್ರ ಆರ್. ಕೆ. ನಿರೂಪಣೆ ಮಲ್ತೆರ್; ಬಾಲಚಂದ್ರೆ ಸೊಲ್ಮೆ ಸಂದಾಯೆರ್.
ತುಳುವೆರೆ ಪಿರಾಕ್‌ದ ಸೊತ್ತುಲೆನ ತೂಪರಿಕೆ, ಕಂಬುಲದ ಎರ್ಲು ಬೊಕ್ಕ ತುಳು ಬದ್ ಕ್ದ ವೈವಿಧ್ಯಮಯ ಅಲಂಕಾರ ಆತಿನ ಸಭಾಂಗಣ ಅಂಚೆನೇ ಮಿತ್ತರ್ಮೆ, ಜಾನಪದ ಪದ – ನಲಿಕೆ ಕಾರ್ಯಕ್ರಮೊದ ವಿಶೇಷ ಆಕರ್ಷಣೆ ಆದಿತ್ತ್ಂಡ್. ಕಾಲೇಜಿನ ಪೆರಿಯ ಉಪನ್ಯಾಸಕೆರ್, ಪರ ವಿದ್ಯಾರ್ಥಿಲು ಬೊಕ್ಕ ಮಾತಾ ವಿಭಾಗೊದ ವಿದ್ಯಾರ್ಥಿಲು ಸಾಂಪ್ರದಾಯಿಕ ತುತ್ತೈತೊಡು ಕುಸಿಟ್ ಪಾಲ್ ಪಡೆಯೆರ್.