Last updated on March 4th, 2025 at 08:27 am
ಬೆಂಗಳೂರು ಮಾರ್ಚ್ 04: ಕಣಿಯೂರು ಮೂಲೊದ ಪೊಣ್ಣು ಒರ್ತಿ ಬೆಂಗಳೂರ್‌ದ ಸಂಬಂಧೊದಕ್ಲೆ ಇಲ್ಲಡ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ನಡಕೆ ಮಾ.1 ತಾನಿ ಬೆಂಗಳೂರ್‌ದ ಜಾಲಹಳ್ಳಿಡ್ ನಡತ್‌ದ್ಂಡ್.
ತೀರ್ದಿನಾರೆನ್ ಪೂಜಾಶ್ರೀ (23) ಪನ್ದ್ ಗುರ್ತ ಪತ್ತ್‌ದೆರ್. ಪೂಜಾಶ್ರೀ ಪುತ್ತೂರ್‌ದ ಕಣಿಯೂರು ಗ್ರಾಮೊದ ಬಾಕಿಮಾರ್ ನಿವಾಸಿಯಾದಿತ್ತ್‌ದ್, ಬೊಲ್ತೇರ್‌ದ ಪಡಂಗಡಿ ಬರಾಯ ನಿವಾಸಿ ಪ್ರಕಾಶ್ ಪನ್ಪಿನಾರೆನ್ 10 ತಿಂಗೊಲ್ದ ದುಂಬು ಮದಿಮೆ ಆದಿತ್ತೆರ್. ಬೇಲೆ ನಾಡೆರೆ ಕರಿನ ರಡ್ಡ್ ತಿಂಗೊಲುಗು ದುಂಬು ಪೂಜಾಶ್ರೀನ್ ಕಂಡನೆ ಪ್ರಕಾಶ್ ಬೆಂಗಳೂರ್‌ಡ್ ಇಪ್ಪುನ ತನ್ನ ಸಂಬಂಧೊದಕ್ಲೆನ ಇಲ್ಲಗ್ ಕಡಪುಡ್ದ್ ಕೊರ್ದಿತ್ತೆರ್.
ಅಕ್ಲೆನ ಇಲ್ಲಡೇ ಇತ್ತಿನ ಪೂಜಾಶ್ರೀ ಅಲ್ಪನೇ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಪೂಜಾಶ್ರೀನ ಆತ್ಮಹತ್ಯೆ ಬಗೆಟ್ ಆರೆನ ಇಲ್ಲದಕುಲು ಅನುಮಾನ ತೋಜಾದೆರ್. ನಡಕೆದ ಬಗೆಟ್ ಬೆಂಗಳೂರ್‌ದ ಜಾಲಹಳ್ಳಿ ಬಾಗಲಗುಂಟೆ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.