Last updated on March 9th, 2025 at 01:11 pm
ಕುಡ್ಲ ಮಾ. 09: ರಾಜ್ಯ ಮಟ್ಟೊಡು ಭಾರೀ ಸುದ್ದಿ ಆದಿತ್ತಿನ ಫರಂಗಿಪೇಟೆದ ವಿಧ್ಯಾರ್ಥಿ ದಿಗಂತ್ ಕಡೆಕ್ಲಾ ತಿಕ್ಕ್‌ದೆ. ಆಂಡ ಕುಡ್ಲರ್ದ್ ಫೆಬ್ರವರಿ 13 ರ್ದ್ ನಾಪತ್ತೆ ಆತಿನ ಕುಡೊರಿ ವಿಧ್ಯಾರ್ಥಿನ ಪ್ರಕರಣೊದ ಬಗೆಟ್ ನನಲಾ ದಾಲ ಅಪ್‌ಡೇಟ್ ತಿಕ್ಕ್‌ದಿಜಿ.
ಬಜಪೆ ಮೂಡು ಪೆರಾರ ಗ್ರಾಮೊದ ಅರ್ಕೆಪದವು ನಿವಾಸಿ, ನೀರ್‌ಮಾರ್ಗದ ಪ್ಯಾರಾಮೆಡಿಕಲ್ ಕಾಲೇಜ್ ಒಂಜೆಟ್ ಕಲ್ತೊಂದಿತ್ತಿನ ನಿತೇಶ್ ಬೆಲ್ಚಡ ಫೆಬ್ರವರಿ 13 ರ್ದ್ ನಾಪತ್ತೆ ಆತೆರ್. ಜವನೆ ದೂರ ಪೋತೆ ಪನ್ಪಿನೆತ ಬಗೆಟ್ ನನಲ ದಾಲ ಸುದ್ದಿ ಇಜ್ಜಿ.
ಇತ್ತೆ ವಿಧಾನ ಸಭಾಧ್ಯಕ್ಷೆ ಯು.ಟಿ. ಖಾದರ್ ಮೇರ್ ವಿಶೇಷ ಕೂಟ ಉಂಡು ಮಲ್ತ್‌ದ್ ನಾಪತ್ತೆ ಆತಿನ ವಿದ್ಯಾರ್ಥಿನ್ ನಾಡ್ ಪತ್ತೆರೆ ನಗರ ಪೊಲೀಸ್ ಆಯುಕ್ತೆರೆಗ್ ಸೂಚನೆ ಕೊರ್ತೆರ್. ನಿತೇಶ್ ಫೆಬ್ರವರಿ 13ತಾನಿ ಕಾಲೇಜಿರ್ದ್ ಇಲ್ಲಗ್ ಬತ್ತ್‌ದ್ ಏರೆಗ್ಲಾ ಪನಂದೆ ಪಿದಯಿ ಪೋದಿತ್ತ್‌ದ್, ಪಿರ ಇಲ್ಲಗ್ ಬತ್ತ್‌ದ್‌ಜೆ.
5.5 ಫೀಟ್ ಎತ್ತರ, ಗೋಧಿ ಮೈಬಣ್ಣ, ಸಾಧಾರಣ ಸರ್ರೊದ ಜವನೆ ನಾಪತ್ತೆ ಆತಿನಾನಿ ಚೆನ್ನೆ ರಂಗ್‌ದ ಟೀ ಶರ್ಟ್, ಬೊಲ್ದು ರಂಗ್‌ದ ಪ್ಯಾಂಟ್ ಪಾಡ್ದಿತ್ತೆರ್. ತುಳು, ಕನ್ನಡ, ಇಂಗ್ಲಿಷ್ ಭಾಷೆ ಪಾತೆರುವೆರ್. ಬಜಪೆ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.