Last updated on March 31st, 2025 at 11:01 am
ಉಳ್ಳಾಲ, ಮಾ.31: ತೊಟ್ಟೆಡ್ ಸಂಸ್ಕರಣೆ ಮಲ್ತ್‌ದ್ ದಿಂಜದ್ ದೀತಿನ ಪರಮಾನ್ಯನ ಎಲುಕುಲು ಕುಂಪಲ ಚಿತ್ರಾಂಜಲಿ ನಗರೊಡು ಮಾ.29ತ ರಾತ್ರೆ ತಿಕ್ಕ್‌ದಿತ್ತ್‌ದ್, ಈ ಬಗೆಟ್ ಅಲ್ಪದಕುಲು ಪೊಲೀಸೆರೆಗ್ ಒಲವು ಕೊರ್ತೆರ್.
ಜಾಗೆಗ್ ಉಳ್ಳಾಲ ಪೊಲೀಸೆರ್ ಬತ್ತ್‌ದ್ ಎಲುತ ಪಿರವುದ ನಿಜಾಂಶೊನು ನಾಡ್ ಪತ್ತ್‌ದೆರ್.
ಶನಿವಾರ ನಡೀರ್ ಚಿತ್ರಾಂಜಲಿ ನಗರೊದ ಇಲ್ಲದ ಸುತ್ತುಮದೆಲ್‌‌ದ ಕೈತಲ್ ಪ್ರಯೋಗಾಲಯೊದ ಎಲುಕುಲು ತೊಟ್ಟೆಡ್ ಸಂಸ್ಕರಿತ್‌ದ್ ದೀತಿನ ಲೆಕ ತಿಕ್ಕ್‌ದ. ವಿಷಯ ತೆರಿನ ಜನ ಜಾಗೆಡ್ ಬತ್ತ್ ಸೇರ್ದಿತ್ತೆರ್. ಈ ಬಗೆಟ್ ತೆರಿದ್ ಬತ್ತಿನ ಉಳ್ಳಾಲ ಪೊಲೀಸೆರ್ ಎಲುಕುಲು ಇತ್ತಿನ ತೊಟ್ಟೆನ್ ವಶೊಕು ಗೆತೊಂದೆರ್.
ಚಿತ್ರಾಂಜಲಿ ನಗರೊಡು ತಿಕ್ಕಿನ ಎಲುಕುಲೆನ್ ಅಲ್ಪದನೇ ಪೊಂಜೊವು ಒರ್ತಿ ತನ್ನ ಇಲ್ಲದ ಕೈತಲ್ ದಕ್ಕ್‌ದಿನ ವಿಚಾರ ಪೊಲೀಸೆರೆ ವಿಚಾರಣೆಡ್ ತೆರಿದ್ ಬೈದ್ಂಡ್. ಪೊಂಜೊವು ಕುಡ್ಲದ ಡಾಕ್ಟರ್ ಒರ್ಯನ ಇಲ್ಲಡ್ ಬೇಲೆ ಮಲ್ತೊಂದಿತ್ತ್‌ದ್, ರಿಟೈರ್ಡ್ ಆತಿನ ಬೈದ್ಯೆರ್ ಇಲ್ಲ್ ಬುಡ್ದ್ ಪೋನಗ ಇಲ್ಲಡಿತ್ತಿನ ಕೆಲ ಸೊತ್ತುಲೆನ್ ಪೊಂಜೊವು ಕನತಿತ್ತೆರ್‌ಗೆ. ಅಲ್ಪರ್ದ್ ಕನತಿನ ಸಂಸ್ಕರಿತ್‌ದ್ ದೀತಿನ ಎಲುಕ್ಲೆನ ತೊಟ್ಟೆನ್ ಪೊಂಜೊವು ತನ್ನ ಇಲ್ಲದ ಕಾಂಪೌಡ್‌ದ ಕೈತಲ್ ದಕ್ಕ್‌ದೆರ್‌ಗೆ.
ಕರಿನ ವಾರ ಚಿತ್ರಾಂಜಲಿ ನಗರೊಡು ನಡತಿನ ಅಲ್ಪದನೇ ಸಂಘಟನೆ ಒಂಜೆತ ವಾರ್ಷಿಕೋತ್ಸವೊದ ಮಿತ್ತರ್ಮೆಡ್ ನೃತ್ಯ ಪ್ರದರ್ಶನ ಕೊರ್ತಿನ ಜವನೆ ಒರ್ಯನ ಬಾಡಾಯಿದ ಕಾಸ್ಟ್ಯೂಮ್ ದಕ್ಕ್‌ದ್ ಪೋದಿತ್ತ್ಂಡ್. ಮುರಾನಿ ರಾತ್ರೆ ಜವನೆ ಕಾಸ್ಟ್ಯೂಮ್ ನಾಡೆರೆ ಬನ್ನಗ ಎಲುತ ತೊಟ್ಟೆ ತಿಕ್ಕ್‌ದ್ಂಡ್.