Last updated on March 12th, 2025 at 06:55 pm
ಒಡಿಪು, ಮಾ. 12: ಸುಮಾರ್ 25 ವರ್ಸೊರ್ದು ಬೊಕ್ಕ ಮುಂಬೈ ಬೊಕ್ಕ ತುಳುನಾಡ್‌ದ ಕೊಲಿಕ್ಕೆ ಆದುಪ್ಪುನ ಮತ್ಯಗಂಧ ಎಕ್ಸ್ಪ್ರೆಸ್ ರೈಲ್‌ಗ್ ಪೊಸ ಕೋಚ್ ಬರ್ಪುಂಡು ಪನ್ಪಿನ ಕುಸಿಟ್ ಇತ್ತಿನ ಪ್ರಯಾಣಿಕೆರೆಗ್ ರೈಲ್ವೆ ಇಲಾಖೆ ಶಾಕ್ ಕೊರ್ತುಂಡು. ಪರ ಕೋಚ್‌ಲೆನ್ ಗೆತ್ತ್‌ದ್ 2020 ಡ್ ಮಲ್ದಿನ ಪರ LHB ಕೋಚ್‌ಲೆನ್ ರೈಲ್ವೆ ಇಲಾಖೆ ಪಾಡ್ದ್ಂಡ್ ಪನ್ಪಿನ ಆರೋಪ ಕೇನ್ದ್ ಬೈದಿತ್ತ್‌ದ್, ಈ ದಿಸೆಟ್ ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲು ರೈಲ್ವೆ ರಾಜ್ಯ ಸಚಿವೆ ಸೋಮಣ್ಣ ಮೆರೆಗ್ ತಿಕ್ಕ್‌ದ್ ಬಿನ್ನಪು ಸಂದಾದೆರ್.
ಮತ್ಯಗಂಧ ಎಕ್ಸ್ಪ್ರೆಸ್ ರೈಲ್‌ದ ಪರ ಕೋಚ್‌ಲೆನ್ ಗೆತ್ತ್‌ದ್ ಪೊಸ ಕೋಚ್ ಪಾಡುನು ಪನ್ದ್ ರೈಲ್ವೆ ಇಲಾಖೆ ತೆರಿಪಾದಿತ್ತ್ಂಡ್, ಆಂಡ ಪಗತಿನ ಪೊಸ ಕೋಚ್‌ಲೆನ್ ತೂದು ಪ್ರಯಾಣಿಕೆರ್ ಸಾಮಾಜಿಕ ಬಲೆತ್ತಾನೊಡು ವಿಡಿಯೋಲೆನ್ ಪಟ್ಟೊಂದೆರ್. ಅಂಚಾದ್ ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲು ಮತ್ಸ್ಯಗಂಧ ಎಕ್ಸ್ಪ್ರೆಸ್ ರೈಲ್‌ಗ್ 2024 ಟ್ ಮಲ್ದಿನ ಪೊಸ LHB ಕೋಚ್ ಲೆನ ಒಟ್ಟುಗು 2020 ಟ್ ಮಲ್ದಿನ ಪರ LHB ಕೋಚ್ ಲೆನ್ ಗೋಡ್ಯಾದಿನ ಇಲಾಖೆದ ಬೇಲೆನ್ ಸಚಿವೆರೆ ಗೇನೊಗು ಕನತ್‌ದೆರ್.
ಮತ್ಸ್ಯಗಂಧ ರೈಲ್‌ದ ಮಾತಾ ಟ್ರಿಪ್‌ಲೆಗ್ಲಾ ಒಯಿಲ್‌ಲ್ ಬರಂದಿಲೆಕ ಎಡ್ಡೇನ 2024 ತ ಕೋಚ್‌ಲೆನೇ ಗಲಸೊಡು ಪನ್ದ್ ಝೋನಲ್ ರೈಲ್ವೇ‌ಲೆಗ್ ತೆರಿಪಾಯೆರ ಬಿನ್ನೈತಿತ್ತ್‌ದ್, ಸಚಿವೆರೆರ್ದ್ ಈ ಬಗೆಟ್ ಸಕಾರತ್ಮಕ ಪ್ರತಿಕ್ರಿಯೆ ತಿಕ್ಕ್‌ದ್ಂಡ್.