Last updated on March 13th, 2025 at 09:53 am
ಬೆಳಗಾವಿ : ಹಿಂದೂಲೆನ ಮಾಮಲ್ಲ ಉಚ್ಚಯ ಮಹಾಕುಂಭಮೇಳ ಉತ್ತರ ಪ್ರದೇಶೊದ ಪ್ರಯಾಗ್‌ರಾಜ್‌ಡ್ ನಡತಿತ್ತ್‌ದ್, ಆ ಪೊರ್ತುಡು ಕಾರಡಿಕ್ ಬೂರ್ದು ತೀರಿನ ಬೆಳಗಾವಿ ಮೂಲೊದ ನಾಲ್ವೆರೆಗ್ ಉತ್ತರ ಪ್ರದೇಶ ಸರ್ಕಾರ ಒರಿಯೊರಿಯಗ್ 25 ಲಕ್ಷ ರೂ. ಪರಿಹಾರ ಕೊರ್ತುಂಡು.
ಮಹಾ ಕುಂಭಮೇಳಗ್ ಬೆಳಗಾವಿ ರ್ದ್ ಜನವರಿ 26ತಾನಿ ಒಟ್ಟು 13 ಜನ ಪೋದಿತ್ತೆರ್. ಅಕುಲು ಅಡೆ ಎತ್ತಿನ ಪೊರ್ತುಡೇ ಜನ ರಷ್ ಆದ್ ಕಾರ್ತೊರಿಪು ಉಂಡಾದಿತ್ತ್ಂಡ್. ಸುರುಕು ನಾಲ್ವೆರ್ ನಾಪತ್ತೆ ಆತೆರ್ ಪನ್ದ್ ಪನ್ದಿತ್ತ್‌ದ್, ಬೊಕ್ಕ ನಾಡ್‌ನಗ ಅಕುಲು ತೀರ್ದೆರ್ ಪನ್ದ್ ತೆರಿದ್ ಬೈದಿತ್ತ್ಂಡ್.
ಬೆಳಗಾವಿ ಮೂಲೊದ ಜ್ಯೋತಿ ಹತ್ತರವಾಠ, ಮೇಘಾ ಹತ್ತರವಾಠ, ಅರುಣ ಕೋಪರ್ಡೆ ಬೊಕ್ಕ ಮಹಾದೇವಿ ಬಾವನೂರ ಕುಂಭಮೇಳಡ್ ಕಾರಡಿಕ್ ಬೂರ್ದ್ ತೀರ್ದಿತ್ತೆರ್. ನಡಕೆ ನಡತ್‌ದ್ 40 ದಿನ ಕರಿದ್ ಉತ್ತರ ಪ್ರದೇಶ ಸರ್ಕಾರೊರ್ದು ಪರಿಹಾರದ ಕಾಸ್ ಪಟ್ಟ್‌ದೆರ್. ತೀರ್ದಿನಕ್ಲೆನ ಕುಟುಂಬಸ್ಥೆರೆ ಬ್ಯಾಂಕ್ ಅಕೌಂಟ್‌ಗ್ RTGS ಮುಕೇನ ಪರಿಹಾರ ಕಾಸ್ ಪಾಡ್ದೆರ್. ಇಂಚಿರ್ದ್ ಕರ್ನಾಟಕ ಸರ್ಕಾರೊರ್ದುಲಾ ಪರಿಹಾರ ಕೊರ್ಪುಲೆಕ ‘ವರದಿ ಕಡಪುಡ್ದ’ ಪನ್ದ್ ಬೆಳಗಾವಿ ಡಿಸಿ ಮೊಹಮ್ಮದ್‌ ರೋಷನ್ ತೆರಿಪಾದೆರ್.