Last updated on March 8th, 2025 at 08:43 am
ಕೋಟ ಮಾ. 07: ಇಲ್ಲಡ್ ಮೊಬೈಲ್ ಕೊರ್ಜೆರ್ ಪನ್ಡ್‌ದ್ ಪಿಯ ಕಲ್ತೊಂದಿತ್ತಿನ ಪೊಣ್ಣು ಒರ್ತಿ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಸಾಸ್ತಾನದ ಕುಂಬಾರಬೊಟ್ಟುಡು ನಡತ್‌ದ್ಂಡ್.
ತೀರ್ದಿನ ಪೊಣ್ಣನ್ ಕುಂಬಾರಬೊಟ್ಟುದ ದಿಶಾ(16) ಪನ್ದ್ ಗುರ್ತ ಪತ್ತ್‌ದೆರ್. ದಿಶಾ ಕೋಟದ ಪ್ರೈವೇಟ್ ಕಾಲೇಜಿಡ್ ಫಸ್ಟ್ ಪಿಯುಸಿ ಕಲ್ತೊಂದಿತ್ತ್‌ದ್, ಪರೀಕ್ಷೆ ಆದ್ ರಜೆಟ್ ಇಲ್ಲಡ್ ಇತ್ತಲ್. ಗುರುವಾರ ಮಧ್ಯಾಹ್ನ ಮೊಬೈಲ್ ಬೋಡು ಪನ್ಡ್ ರಂದ್‌ನಗ ಇಲ್ಲದಕುಲು ಬೊಕ್ಕ ಮೊಬೈಲ್ ಪೋನ್ ಕೊರ್ಪ ಪನ್ದ್ ಪನ್ತೆರ್. ಉಂದೆರ್ದಾವರ ಪಿಸಿರಾಯಿನ ದಿಶಾ ಸೀದಾ ಅದೆತ ಬಾಕಿಲ್ ಪಾಡ್ದಿತ್ತ್‌ದ್, ಅಪ್ಪೆ ಜೋರು ಮಲ್ತ್ ಬಾಕಿಲ್ ದೆಪ್ಪೆರೆ ಪನ್ತೆರ್. ಏತ್ ಪೊರ್ತಾಂಡಲಾ ಬಾಕಿಲ್ ದೆಪ್ಪಂದಿನೆನ್ ತೂದು, ಪರಿಶೀಲನೆ ಮಲ್ಪುನಗ ಪೊಣ್ಣು ಆತ್ಮಹತ್ಯೆಗ್ ಪುನೇಯೊಂದುಪ್ಪುನ ಬೊಲ್ಪುಗು ಬೈದ್ಂಡ್.
ಇಲ್ಲದ ಕಂಡಿದ ರಾಡ್‌ಗ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ಪೆರ ತೂವೊಂದಿತ್ತ್‌ದ್, ಅಪಗನೇ ಮುಟ್ಟದಕುಲು ಬತ್ತ್‌ದ್ ಪೊಣ್ಣನ ರಕ್ಷಣೆ ಮಲ್ತ್‌ದೆರ್. ಆಂಡ ಆಸ್ಪತ್ರೆಗ್ ಲೆತೊಂದು ಪೋಪುನ ಸಾದಿ ನಡುಟು ತೀರ್ದಲ್. ಕೋಟ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾದ್ ಜಡ್ತೆ ಮಲ್ತೊಂದುಲ್ಲೆರ್.