Last updated on March 19th, 2025 at 10:27 am
ಅಮೇರಿಕಾ, ಮಾ, 19: ಬೋಯಿಂಗ್ ಸ್ಟಾರ್ ಲೈನರ್‌ಡ್ ಬಾಹ್ಯಾಕಾಶೊಗು ಪೋದು ಅಲ್ಪ ಬಾಕಿ ಆದಿತ್ತಿನ ಸುನಿತಾ ವಿಲಿಯಮ್ಸ್ 9 ತಿಂಗೊಲು ಕರಿದ್ ಇತ್ತೆ ಸುರಕ್ಷಿತವಾದ್ ಪಿರ ಬೈದೆರ್. SpaceX ಬೊಕ್ಕ NASA ಜಂಟಿ ಕಾರ್ಯಾಚರಣೆಡ್ ಅಮೆರಿಕದ NASA ಗಗನಯಾತ್ರಿಲಾಯಿನ ಸುನಿತಾ ವಿಲಿಯಮ್ಸ್, ಬುಚ್ ವಿಲ್ನೋರ್ ಸೇರ್ದ್ ನಾಲ್ವೆರ್ ಗಗನಯಾತ್ರಿಲು ಸುರಕ್ಷಿತವಾದ್ ಇನಿ ಕಾಂಡೆ ಭೂಮಿಗ್ ಪಿರ ಬೈದೆರ್.
ಗಗನಯಾನಿಲು ಇತ್ತಿನ SpaceX ಕಂಪೆನಿದ ಡ್ರಾಗನ್ ಕ್ಯಾಪ್ಸೂಲ್ ಅಮೆರಿಕದ ಪ್ಲೋರಿಡಾ ಕಡಲ ಕರೆಟ್ ಸುರಕ್ಷಿತವಾದ್ ಬತ್ತ್‌ದ್ ಜತ್ತ್ಂಡ್.
ಕರಿನ ವರ್ಸ ಜೂನ್ 5 ತಾನಿ ಬೋಯಿಂಗ್‌ದ ಸ್ಟಾರ್‌ಲಿಂಕ್ ರಾಕೆಟ್‌ಡ್ ಅಂತರರಾಷ್ಟ್ರೀಯ ಬಾಹ್ಯಾಕಾಶ ಉಂತಡೆಗ್ (ಐಎಸ್‌ಎಸ್) ಪೋದಿತ್ತಿನ ಕ್ರೂ-9 ಮಿಷನ್‌ದ ಸಿಬ್ಬಂದಿಲಾಯಿನ ಸುನಿತಾ ಬೊಕ್ಕ ಬುಚ್, ರಾಕೆಟ್‌ಡ್ ಉಂಡಾಯಿನ ತಾಂತ್ರಿಕ ದೋಷೊರ್ದಾವರ 9 ತಿಂಗೊಲುರ್ದ್‌ಲಾ ಎಚ್ಚ ಕಾಲ ಬಾಹ್ಯಾಕಾಶ ಉಂತಡೆಡೇ ಉಂತುಲೆಕ ಆದಿತ್ತ್ಂಡ್.
ಸುನಿತಾ ಬೊಕ್ಕ ಬುಚ್ ಮೊಕ್ಲೆನ್ ಪುಡಮಿಗ್ ಪಿರ ಲೆತೊಂದು ಬರ್ಯೆರೆ ಯೋಜನೆ ಮಲ್ದಿತ್ತಿನ NASA ಬೊಕ್ಕ SpaceX, ಐತಾರ ನಾಲ್ವೆರ್ ಗಗನಯಾತ್ರಿಲು ಕುಲ್ಲುನ ಕ್ರೂ-10 ಮಿಷನ್‌ದ ‘ಡ್ರಾಗನ್’ ರಾಕೆಟ್‌ನ್ ಐಎಸ್‌ಎಸ್‌ಗ್ ಕಡಪುಡ್ದಿತ್ತ್ಂಡ್. ಇತ್ತೆ ‘ಡ್ರಾಗನ್’ ಸುನಿತಾ-ಬುಚ್ ಮೊಕಲೆನ್ ಭೂಮಿಗ್ ಯಶಸ್ವಿಯಾದ್ ಪಿರ ಲೆತೊಂದು ಬೈದ್ಂಡ್.