Last updated on March 12th, 2025 at 12:52 pm
ಕೊಪ್ಪಳದ ಗಂಗಾವತಿ ತಾಲೂಕ್‌ದ ಸಣಾಪುರ ಸರೋವರೊದ ಕರೆಟ್ ಕರಿನ ಗುರುವಾರ ರಾತ್ರೆ ಮೂವೆರ್ ಕೆಂಗುಡೆರ್ 27 ವರ್ಸ ಪ್ರಾಯೊದ ಇಸ್ರೇಲಿ ಪೊಣ್ಣು ಬೊಕ್ಕ ಹೋಂಸ್ಟೇದ 29 ವರ್ಸ ಪ್ರಾಯೊದ ಪೊಣ್ಢನ ಮಿತ್ತ್ ಅತ್ಯಾಚಾರ ಮಲ್ತ್‌ದೆರ್. ಮೂವೆರ್ ಆಂಜೊವು ಪ್ರವಾಸಿಗೆರೆನ್ ಅಕುಲು ಕಾಲುವೆಗ್ ನೂಕುದು ಪಾಡ್ದ್, ಅವೆರ್ದ್ ಬೊಕ್ಕ ಪೊಂಜೊವುಲೆ ಮಿತ್ತ್ ಅತ್ಯಾಚಾರ ಮಲ್ತ್‌ದ್ ಎಸ್ಕೇಪ್ ಆದಿತ್ತೆರ್.
ಎಫ್‌ಐಆರ್ ಪ್ರಕಾರ ನಾಲ್ವೆರ್ ಪ್ರವಾಸಿಗೆರ್ ಬೊಕ್ಕ ಅಕುಲು ಉಂತುದಿತ್ತಿನ ಹೋಂಸ್ಟೇದ ಸ್ಟಾಫ್ ಸಣಾಪುರ ಸರೋವರೊದ ಕೈತಲ್ ಕತ್ತಲೆ ಬೂರುನಗ ಬೊಲ್ಲಿಲೆನ್ ತೂವೊಂದು ಗಿಟಾರ್ ಮೀಟೊಂದು ಕುಲ್ಲುದಿತ್ತೆರ್. ಈ ಪೊರ್ತುಡು ಬೈಕ್‌ಡ್ ಬತ್ತಿನ ಮೂವೆರ್ ಮುಲ್ಪ ಪೆಟ್ರೋಲ್ ಒಲ್ಪ ತಿಕ್ಕುಂಡು ಪನ್ದ್ ಕೇನ್ದೆರ್.
ಹೋಂಸ್ಟೇ ಸ್ಟಾಫ್ ಮುಟ್ಟಡ್ ಪೆಟ್ರೋಲ್ ಪಂಪ್ ಇಜ್ಜಿ ಪನ್ದ್ ಪನ್ತೆರ್. ಅಪಗ ಆ ಮೂಜಿ ಜನ 100 ಕೊರ್ಲೆ ಪನ್ದ್ ಹೋಂಸ್ಟೇ ಸ್ಟಾಫ್‌ಗ್ ಒತ್ತಾಯ ಮಲ್ತ್‌ದೆರ್. ಮೊಕುಲು ಐವೆರ್ ಕೊರ್ಯೆರ ಕಾಸ್ ಇಜ್ಜಿ ಪನ್ನೆಕ್ ಕೆಂಗುಡೆರ್ ಮೂವೆರ್ ಆಂಜೊವು ಪ್ರವಾಸಿಗೆರೆಗ್ ಹಲ್ಲೆ ಮಲ್ತ್‌ದ್ ಕಾಲುವೆಗ್ ನೂಕುದ್ ಪಾಡ್ದೆರ್.
ಆಂಜೊವು ಪ್ರವಾಸಿಗೆರ್ ಕಾಲುವೆರ್ದ್ ಪಿದಯಿ ಬರ್ಯೆರ ಬಂಙ ಬರೊಂದುಪ್ಪುನಗ, ಮೂವೆರ್ ಆರೋಪಿಲು 27 ವರ್ಸ ಪ್ರಾಯೊದ ಇಸ್ರೇಲಿ ಪ್ರವಾಸಿ ಪೊಣ್ಣನ್ ಅಂಚೆನೇ ಹೋಂಸ್ಟೇದ 29 ವರ್ಸ ಪ್ರಾಯೊದ ಸ್ಟಾಫ್‌ನ ಮಿತ್ತ್ ಹಲ್ಲೆ ಮಲ್ತ್‌ದ್ ಅತ್ಯಾಚಾರ ಮಲ್ತ್‌ದ್ ಪದ್ರಾಡಾತೆರ್.
ಕಾಲುವೆಗ್ ಬೂರ್ದಿನೆಟ್ ಅಮೆರಿಕ ಬೊಕ್ಕ ಮಹಾರಾಷ್ಟ್ರದ ಇರ್ವೆರ್ ಪ್ರವಾಸಿಗೆರ್ ಪೆಟ್ಟಾದಿತ್ತ್ಂಡಲಾ ಬಂಙೊಡು ಮೀಂದ್‌ದ್ ಕರೆ ಸೇರ್ದೆರ್. ಆಂಡ ಒಡಿಶಾದ ಬಿಬಾಸ್ ರಡ್ಡ್ ದಿನ ಕರಿದ್ ಪುನ ಆದ್ ತಿಕ್ಕ್‌ದೆರ್.
ನಡಕೆದ ಆರೋಪಿಲು ಮಲ್ಲೇಶ್ ಬೊಕ್ಕ ಚೇತನ್ ಸಾಯಿ ನ್ ಸುರುಕು ಪತ್ತಿನ ಪೋಲೀಸೆರ್ ಅಕ್ಲೆನ ಸಕಾಯೊಡು ತಮಿಳ್‌ನಾಡ್‌ಗ್ ಬಲ್ತಿತ್ತಿನ ಶರಣ ಬಸವ ಪನ್ಪಿನಾಯನ್ಲಾ ಅರೆಸ್ಟ್ ಮಲ್ತ್‌ದೆರ್.