Last updated on March 11th, 2025 at 10:40 am
ಸಾರಗಟ್ಲೆ ವರ್ಸೊದ ಪರತಿರಿ ಇತ್ತಿನ ದೈವಾರಾಧನೆ ಬೊಕ್ಕ ಶ್ರೀಮಂತ ಸಾಂಸ್ಕೃತಿಕ ವೈಶಿಷ್ಟ್ಯೊಲು ಇತ್ತಿನ ತುಳುನಾಡ್‌ದ ಈ ನೆಲೊತ ಭಾಷೆ ತುಳು ಭಾಷೆಗ್ ಪ್ರಾಮುಖ್ಯತೆ ಕೊರೊಡು. ತುಳುವ ಮಣ್ಣ್‌ಡ್ ಅಪ್ಪೆ ಭಾಷೆ ತುಳುಕು ದುಂಬುದ ಕಾಲೊಡು ಇತ್ತಿನ ಗೌರವ, ಮೌಲ್ಯ ಕುಡ ತಿಕ್ಕೊಡು. ಗಟ್ಟದ ಆಮೆಯಿತ ಜಾಗೆಲೆಡ್ ಕಾಲಿ ಕನ್ನಡ ಇಪ್ಪುನೆರ್ದಾವರ ಅಲ್ಪ ಕನ್ನಡ ಕಡ್ಡಾಯ ಮನ್ಪುನು ಸಮ. ಆಂಡ ತುಳುನಾಡ್‌ಡ್ ಮಾತೆರ್ಲಾ ಗೌರವ ಕೊರ್ಪುನ, ಮೋಕೆ ಮನ್ಪುನ, ನಿಚ್ಚೊದ ವೈವಾಟ್‌ಗ್ ಗಲಸುನ ತುಳು ಭಾಷೆನ್. ಅಂಚಾದ್ ಅವೆಕ್ ಬೋಡಾಪಿನ ಪೂರಕ ವ್ಯವಸ್ಥೆನ್ ಜಿಲ್ಲಾಡಳಿತ ಮಲ್ಪೊಡು.
ಸಾಂವಿಧಾನಿಕವಾದ್ ಒಂಜಿ ಮಣ್ಣ್‌ಡ್ ಪಾತೆರುನ ಭಾಷೆಗ್ ಮಾನ್ಯತೆ ಕೊರ್ನ್ಡ ಅಲ್ಪದ ಸೌಹಾರ್ದತೆ ಎಚ್ಚಾಪುಂಡು. ಅಂಚಾದ್ ಎಂಕ್ಲೆನ ಕಾಯೆಸ್‌ನ್ ಈಡೆತ್ತಾಯೆರ ಕ್ರಮ ಗೆತೊನೊಡು, ಕುಡ್ಲ ಬೊಕ್ಕ ಒಡಿಪು ಜಿಲ್ಲೆಲೆಗ್ ಅನ್ವಯ ಆಪಿಲೆಕ ಸಾರ್ವಜನಿಕ ಜಾಗೆಲು ಬೊಕ್ಕ ಕಮರ್ಷಿಯಲ್ ಕಟ್ವಾನೊಲೆನ ಪುದರ್ ಪಲವೆಲೆಡ್ ತುಳು ಭಾಷೆ ಬೊಕ್ಕ ಲಿಪಿಕ್ ಶೇಕಡಾ 60 ದಾತ್ ಅವಕಾಶ ಕೊರ್ಪುನ ವಿಶೇಷ ಆದೇಶ ಕೊರೊಡು ಪನ್ಡ್‌ದ್ ತುಳುನಾಡ ರಕ್ಷಣಾ ವೇದಿಕೆರ್ದ್ ಜಿಲ್ಲಾಧಿಕಾರಿಲೆಗ್ ಬಿನ್ನಪು ಮಲ್ತೆರ್.
ಅಂಚೆನೇ ಮುಲ್ಪ ಕೆಲ ಜನ ಭಾಷೆದ ಪೊರ್ಮ್ಬಾಟಗಾರೆರ್ ಪನ್ಪಿನ ಏಸೊಡು ಬತ್ತ್‌ದ್ ಬೇತೆ ಭಾಷೆಲೆನ ಪಲವೆಲೆಗ್ ಮಜ್ಜಿ ಪೂಜಿದ್, ಭಾಷೆ ಭಾಷೆಲೆನ ನಡುಟು ಕನತ್ ದೀಪಿನ ಬೇಲೆ ಮಲ್ತೊಂದಿತ್ತ್‌ದ್, ತುಳುನಾಡ್‌ದ ಸೌಹಾರ್ದತೆನ್ ಹಾಲ್ ಮಲ್ಪೆರ ತೂವೊಂದುಲ್ಲೆರ್. ಅಕ್ಲೆನ ಮಿತ್ತ್ ದಾಕ್ಷಿಣದಾಂತೆ ಕ್ರಮ ಗೆತೊನೊಡು ಪನ್ಡ್‌ದ್ ತುಳುನಾಡ ರಕ್ಷಣಾ ವೇದಿಕೆದ ಒಡಿಪು ನಿಯೋಗರ್ದ್ ಮಾರ್ಚ್ 10 ತಾನಿ ಒಡಿಪು ಜಿಲ್ಲಾಧಿಕಾರಿಲೆಗ್ ಬಿನ್ನಪುದೋಲೆ ಕೊರ್ಯೆರ್.
ನಿಯೋಗಡ್ ಒಡಿಪು ಜಿಲ್ಲಾಧ್ಯಕ್ಷೆರ್ ಫ್ರಾಂಕಿ ಡಿಸೋಜ ಕೊಳಲಗಿರಿ, ಜಿಲ್ಲಾ ಉಪಾಧ್ಯಕ್ಷೆರ್ ಜಯರಾಮ್ ಪೂಜಾರಿ, ಬೈದ್ಯೆರೆ ಘಟಕೊದ ಜಿಲ್ಲಾಧ್ಯಕ್ಷೆರ್ ಸಂದೀಪ್ ಸನಿಲ್, ಕಾರ್ಮಿಕ ಘಟಕೊದ ಜಿಲ್ಲಾಧ್ಯಕ್ಷೆರ್ ಜಯ ಪೂಜಾರಿ ಲಕ್ಷ್ಮಿನಗರ, ಬ್ರಹ್ಮಾವರ ತಾಲೂಕು ಅಧ್ಯಕ್ಷೆರ್ ಸತೀಶ್ ಪೂಜಾರಿ ಕೀಳಿಂಜೆ, ಬ್ರಹ್ಮಾವರ ತಾಲೂಕು ಗೌರವ ಅಧ್ಯಕ್ಷೆರ್ ಸುರೇಂದ್ರ ಪೂಜಾರಿ, ತುಳುನಾಡ ರಕ್ಷಣಾ ವೇದಿಕೆ ಮುಖಂಡೆರ್ ಸದಾಶಿವ ಬ್ರಹ್ಮಾವರ, ಸುನಂದ ಕೋಟ್ಯಾನ್, ಅನುಸೂಯ ಶೆಟ್ಟಿ, ಮಜೀದ್, ಜ್ಯೋತಿ ಆರ್. ಬನ್ನಂಜೆ , ಶ್ಯಾಮಲಾ, ನಿತೀನ್, ಅಶ್ವಿನಿ, ಶ್ರೀಮತಿ ಅಚಾರ್ಯ ಹರ್ಷಿತಾ, ಉಮೇಶ್ ಶೆಟ್ಟಿ, ಸಂತೋಷ್ ಶೈಲೇಶ್, ಜಯಶ್ರೀ ಸುವರ್ಣ ಅಂಚೆನೇ ತುಳುನಾಡ ರಕ್ಷಣಾ ವೇದಿಕೆ ಪದಾಧಿಕಾರಿಲು ಇತ್ತೆರ್.