Last updated on March 12th, 2025 at 09:19 am
ಕೆಲವೊಂಜಿ ಭಾಷೆಲೆನ್ ದೇಶೊನು ಪುಡಪೆರೆ ಗಲಸೊಂದಿತ್ತೆರ್ನ್ಡ, ನಮ್ಮ ತುಳು ಭಾಷೆ, ತುಳುವೆರ್ ದೇಶೊನು ಒಟ್ಟುಗೋಡ್ಯಾವುನ ಬೇಲೆ ಮಲ್ತೊಂದುಲ್ಲ ಪನ್ದ್ ಸಂಸದೆ ಬ್ರಿಜೇಶ್ ಚೌಟೆರ್ ಐತಾರ ನಡತಿನ ತುಳು ಕೂಟದ ಬಂಗಾರ್ ಪರ್ಬದ ಲೇಸ್‌ದ ಮಿತ್ತರ್ಮೆಡ್ ಪನ್ಡೆರ್.
ತುಳುವೆರೆನ ವಿಶೇಷತೆ ದಾದ ಪನ್ಡ ಬೊಂಬಾಯಿಗ್ ಪೋಂಡಲಾ ಈ ಭಾಷೆನ್ ಬದ್‌ಕ್‌ದ್ ತೋಜಾಯಿನಕುಲು ತುಳುವೆರ್, ದುಬೈಗ್ ಪೋಂಡಲಾ ಈ ಭಾಷೆನ್ ಬದ್‌ಕ್‌ದ್ ತೋಜಾಯಿನಕುಲು ತುಳುವೆರ್. ನಮ್ಮ ಊರುಡು ಕೆಡ್ಡಸೊನು ಏತ್ ಆಚರಿಪೆರ್ ಗೊತ್ತುಜ್ಜಿ ಆಂಡ ಡೆಲ್ಲಿಡ್ ಒಂಜಿ 50 ಜನ ತುಳುವೆರ್ ಸೇರ್ದ್ ಆಚರಿತೊಂದುಲ್ಲೆರ್.
ಒವ್ವೇ ಒಂಜಿ ಭಾಷೆ, ಸಂಸ್ಕೃತಿ, ಕಲೆ ಒರಿಯೊಡಾಂಡ ಪ್ರಜಾಪ್ರಭುತ್ವೊಡ್ಲಾ ರಾಜಾಶ್ರಯೊದ ಅಗತ್ಯ ಉಂಡು. ಆಂಡ ರಾಜಾಶ್ರಯೊರ್ದು ಎಚ್ಚ ಅಗತ್ಯ ದಾದಾಂದ್ ಪನ್ಡ ಅವು ನಮ್ಮ ಇಲ್ಲ್ ಇಲ್ಲಡ್ ಆಚರಣೆಡುಪ್ಪೊಡು. ಭಾರತೊಡು ತುಳು ಪಾತೆರುನಕ್ಲೆನ ಸಂಖ್ಯೆ ಕಮ್ಮಿ ಇಪ್ಪು ಆಂಡ ಸಮೃದ್ಧಿಡ್ ಮಲ್ಲವು. ಈ ಸಮೃದ್ಧಿಗ್ ನಮ್ಮ ಆಚರಣೆಲು ಕಾರಣ ಪನ್ದ್ ಪನ್ಡೆರ್.
ಒರಿ ತುಳುವೆ ಆದ್ ತುಳು ಭಾಷೆ ಕರ್ನಾಟಕೊದ ಆಡಳಿತ ಭಾಷೆ ಆವೊಡು, ಎಣ್ಮನೇ ಪರಿಚ್ಛೇದೊಗು ಸೇರೊಡು ಪನ್ಪಿನ ಎಂಕ್‌ಲಾ ಆಸೆ ಉಂಡು. ಉಂದೆಕ್ ಎನ್ನ ಕಾರ್ಯವ್ಯಾಪ್ತಿಡ್ ಏತ್ ಆಪುಂಡ ಆತ್ ಪ್ರಾಮಾಣಿಕ ಪ್ರಯತ್ನ ಯಾನ್ ಮನ್ಪೆ ಪಪ್ದ್ ಸಂಸದೆರ್ ಪನ್ಡೆರ್.