ಯುವವಾಹಿನಿ (ರಿ.) ಕುಡ್ಲ ಘಟಕೊರ್ದು ಬಿಸು ಪರ್ಬ

Last updated on April 17th, 2025 at 09:46 am

ಕುಡ್ಲ, ಎ 16: ಯುವವಾಹಿನಿ (ರಿ.) ಕುಡ್ಲ ಘಟಕೊದ ಕಡೆರ್ದ್ ಎಪ್ರಿಲ್ 15 ತಾನಿ ತುಳುವೆರೆ ಪೊಸ ವರ್ಸ ಬಿಸುತ ಬಗೆಟ್ ಲೇಸ್ ನಡತ್ಂಡ್.

ಶ್ರೀ ಪತಂಜಲಿ ಯೋಗ ಶಿಕ್ಷಣ ಸಮಿತಿದ ಪೆರಿಯ ಯೋಗ ಶಿಕ್ಷಕೆರಾಯಿನ ಶ್ರೀಮತಿ ಕನಕಕ್ಕ ಬಿಸು ಪರ್ಬದ ಕರಿಪುದ ಬಗೆಟ್ ಉಪನ್ಯಾಸ ಕೊರ್ಯೆರ್.
ಪ್ರಳಯೊಡೂ ಅಳಿದ್ ಪೋದಿತ್ತಿನ ಲೋಕೊನು ಬ್ರಹ್ಮ ದೇಬೆರ್ ಕುಡ ಉಂಡು ಮಲ್ದಿನ ದಿನೊನು ಯುಗೊತ ಆದಿ ಪನ್ಡ ಯುಗಾದಿ ಪನ್ದ್ ಲೆಪ್ಪುವ, ಬೆರಣೆರ್ ಬೊಕ್ಕ ಕ್ಷತ್ರಿಯೆರ್ ಚಾಂದ್ರಮಾನ ಯುಗಾದಿ ಆಚರಿತೆರ್ನ್ಡ ಶೂದ್ರೆರ್ ಸೌರಮಾನ ಯುಗಾದಿ ಪನ್ಡ ಬಿಸು ಪರ್ಬೊನು ತನ್ಕುಲೆ ಪೊಸ ವರ್ಸ ಪನ್ದ್ ಆಚರಿಪೆರ್ ಪನ್ದ್ ಪನ್ಡೆರ್. ಪಿರಾಕ್‌ಡ್ ಪೆರಿಯಾಕ್ಲು ಬಿಸು ಪರ್ಬನ್ ಎಂಚ ಕರಿತೊಂದಿತ್ತೆರ್ ಪನ್ದ್ ಶ್ರೀಮತಿ ಕನಕಕ್ಕ ತೆರಿಪಾಯೆರ್.
ಈ ಪೊರ್ತುಡು ಉಪನ್ಯಾಸ ಕೊರ್ನ ಶ್ರೀಮತಿ ಕನಕಕ್ಕಗ್ ಘಟಕೊದ ಕಡೆರ್ದ್ ಮಾನಾದಿಗೆ ಮಲ್ತೆರ್.

ಅವೆರ್ದ್ ಬೊಕ್ಕ ಘಟಕೊದ ಪದುಕೆರ್ ಮಾತಾ ಬಿಸು ಪರ್ಬದ ಲೆಕ್ಕೊಡು ಬೇವು ಬೆಲ್ಲ ತಿನ್ದೆರ್. ಅಧ್ಯಕ್ಷೆ ಅಶೋಕ್ ಅಂಚನ್, ಕಾರ್ಯದರ್ಶಿ ಯಶವಂತ್ ಪೂಜಾರಿ, ಉಪಾಧ್ಯಕ್ಷೆ ಹರೀಶ್ ಸುವರ್ಣ, ಘಟಕೊದ ಮಾಜಿ ಅಧ್ಯಕ್ಷೆರ್ ಅಂಚೆನೇ ಎಚ್ಚಿನ ಪದುಕೆರ್ ಪಾಲ್ ಪಡೆದಿತ್ತೆರ್.