Last updated on April 11th, 2025 at 06:25 am
ಕುಂದಾಪುರ: ಬಸ್ಸ್‌ಡ್ ಹಿಂದೂ ಪೊಣ್ಣಗ್ ಉಪದ್ರ ಮಲ್ತಿನಾಯನ್ ಪ್ರಶ್ನೆ ಮಲ್ತಿನ ಹಿಂದೂ ಆಣನ್ ಕೈದ್ ಮಲ್ದಿನ ಪೊಲೀಸೆರೆ ನಡಕೆನ್ ಪ್ರಶ್ನೆ ಮಲ್ತ್‌ದ್, ಬಿಜೆಪಿದ ಕಡೆರ್ದ್ ಗುರುವಾರ ರಾತ್ರೆ ಕುಂದಾಪುರ ಸ್ಟೇಶನ್‌ಡ್ ಅಹೋರಾತ್ರಿ ಧರಣಿ ನಡತ್ಂಡ್.
ಬೈಂದೂರು ಶಾಸಕೆ ಗುರುರಾಜ ಗಂಟಿಹೊಳೆ ಮುತಾಲಿಕೆಡ್ ಕುಂದಾಪುರ ನಗರ ಸ್ಟೇಶನ್‌ದ ಎದುರು ಒಟ್ಟುಗೋಡಿನ ಬಿಜೆಪಿ ಕಾರ್ಯಕರ್ತೆರ್ ಧರಣಿಡ್ ಪಾಲ್‌ಪಡೆಯೆರ್. ಪ್ರತಿಭಟನೆನ್ ಉದ್ದೇಶಿತ್‌ದ್ ಪಾತೆರ್ನ ಶಾಸಕೆ ಗುರುರಾಜ ಗಂಟಿಹೊಳೆ, ಗಡೀಗಡೀ ಹಿಂದೂಲೆನ ಮಿತ್ತ್ ಪೊಲೀಸೆರೆ ದಬ್ಬಾಳಿಕೆ ನಡತೊಂದುಂಡು. ಉಂದು ಸುರು ಅತ್ತ್. ಹಿಂದೂ ಸಮಾಜೊನು ಲಕ್ಕಾವುನ ದುಸ್ಸಾಹೊಗು ಕೈ ಪಾಡ್ದಿತ್ತ್‌ದ್, ಉಂದೆಕ್ ಬಿಲೆ ಕಟ್ಟುವರ್. ಪೊಲೀಸೆರ್ ಇತ್ತೆನೇ ಕೈದ್ ಮಲ್ತಿನಾಯನ್ ಬುಡುಗಡೆ ಮಲ್ಪೊಡು. ಪೊಣ್ಣಗ್ ಉಪದ್ರ ಮಲ್ತಿನಾಯನ್ ಪತ್ತ್‌ದ್, ಆಯನ ಮಿತ್ತ್ ಕಾನೂನು ಕ್ರಮ ಗೆತೊನೊಡು. ಲವ್ ಜೆಹಾದ್‌‌ದಂಚಿನ ಪ್ರಕರಣೊಲೆನ್ ಗಾತಿಡ್ ದೆತೊನೊಡು ಪನ್ದ್ ಆಗ್ರಹ ಮಲ್ದೆರ್.
ಪ್ರತಿಭಟನಕಾರೆರ್ ಸ್ಟೇಶನ್‌ದ ಎದುರು ಕುಲೊಂದೇ ಭಜನೆಲಾ ಮಲ್ತೆರ್. ಬಿಜೆಪಿ ಕುಂದಾಪುರ ಮಂಡಲೊದ ಮಾಜಿ ಅಧ್ಯಕ್ಷೆ ಶಂಕರ ಅಂಕದಕಟ್ಟೆ, ಬೈಂದೂರು ಮಂಡಲೊದ ಪ್ರಮುಖೆರ್, ಹಿಂದೂ ಸಂಘಟನೆಲೆನ ಮುಖಂಡೆರ್ ಸುಧಾಕರ ಶೆಟ್ಟಿ ನೈಲಾಡಿ, ಜಗದೀಶ್ ಕೊಲ್ಲೂರು, ಪದಾಧಿಕಾರಿಲು, ಬೇತೆ ಬೇತೆ ಗ್ರಾ.ಪಂ.ಲೆನ ಅಧ್ಯಕ್ಷೆರ್, ಉಪಾಧ್ಯಕ್ಷೆರ್, ಸದಸ್ಯೆರ್, ಪಾಕ ಜನ ಕಾರ್ಯಕರ್ತೆರ್ಲಾ ಇತ್ತೆರ್. ಜಾಗೆಗ್ ಡಿವೈಎಸ್‌ಪಿ ಎಚ್‌.ಡಿ. ಕುಲಕರ್ಣಿ ಮೇರ್ ಬತ್ತ್‌ದ್ ಪ್ರತಿಭಟನಕಾರೆರೆ ಬಿನ್ನಪುಗು ಕೆಬಿ ಕೊರ್ಯೆರ್.