Last updated on April 15th, 2025 at 08:51 pm
ಒಡಿಪು: ಕಟ್ಪಾಡಿದ ಶ್ರೀ ವಿಶ್ವನಾಥ ಕ್ಷೇತ್ರೊಡು ಎಪ್ರಿಲ್ 13ತಾನಿ ತುಳುತ ಬಗೆಟ್ ಒಪ್ಪತಪ್ಪೊಡು ಪಾತೆರಕತೆ, ಮದಿಪು, ತುಳುನಾಡ್ದ ಬಗೆಟ್ ತೆರಿದಿನ ಮಸ್ತ್ ವಿದ್ವಾಂಸೆರೆ ಒತ್ತುಪಾಲ್‌ಡ್ ತುಳು ಪನ್ಡ ದಾದ? ತುಳುನಾಡ್ ಪನ್ಡ ದಾದ? ತುಳುವ ಜನಪದೆರೆನ ಇತಿಹಾಸ ದಾದ? ತುಳು ಲಿಪಿತ ನನ ದುಂಬುದ ಪಜ್ಜೆ ದಾದ? ತುಳುನಾಡ ಮೂಲ ನಿವಾಸಿಲಾಯಿನ ಕೊರಗೆರೆನ ಬಾಸೆ ಬೊಕ್ಕ ಸಂಸ್ಕೃತಿ ದಾದ? ಈ ಮಾತ ವಿಷಯೊದ ಬಗೆಟ್ ಪಾತೆರಕತೆ ನಡಪಾವುನ ‘ತುಳುನಾಡ್ ಕಾನ್ಕ್ಲೇವ್ – 2025’ ಪನ್ಪಿನ ಸಮಾವೇಶ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಮುತಾಲಿಕೆಡ್ ಅರ್ಥಪೂರ್ಣವಾದ್ ನಡತ್ಂಡ್.
ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಗುರ್ಕಾರೆ ಮಹಿ ಮುಲ್ಕಿ, ವಿಶ್ವನಾಥ ಕ್ಷೇತ್ರೊದ ಟ್ರಸ್ಟ್ ಗುರ್ಕಾರೆ ಎಸ್. ಶಂಕರ ಪೂಜಾರಿ, ನಿಟ್ಟೆ ಕಾಲೇಜಿದ ಪ್ರಾಧ್ಯಾಪಕೆದಿ ಶ್ವೇತಾ ಭರತ್, ಪಾಂಗಾಳ ಬಾಬು ಕೊರಗೆರ್ ಬೊಕ್ಕ ಆಳ್ವಕೂಟೊ ಬ್ಯಾಂಡ್‌ದ ಪ್ರವೀಣ್ ಆಳ್ವೆರ್ ತುಡರ್ ಅರ್ಲಾದ್, ಪಿಂಗಾರ ಅರ್ಲಾದ್ ಲೇಸ್‌ದ ಉದಿಪನ ಮಲ್ತೆರ್.
ತಂತ್ರಜ್ಞಾನೊಡು ತುಳು ಅಂಚೆನೇ ತುಳು ಲಿಪಿತ ನನ ದುಂಬುದ ಪಜ್ಜೆಲು
ಕಾಂಡೆ ತುಳು ಲಿಪಿತ ಬಗೆಟ್ ನಡತಿನ ವಿಚಾರಗೋಷ್ಠಿಡ್ ತುಳು ಲಿಪಿತ ಒರಿಪು ಬುಲೆಪುದ ಬಗೆಟ್, ತುಳು ಲಿಪಿ ಮದೆ ಆದ್ ಕೋಂಟುಗು ಸೇರ್ಯೆರೆ ನೆವನೊಲು, ತುಳುನು ಕನ್ನಡ ಲಿಪಿಟ್ ಬರೆನಗ ಆಪಿನ ಸಂಭಾವ್ಯ ಅನರ್ಥೊಲು, ಅಂಚೆನೇ ಸಾಂಪ್ರದಾಯಿಕ ತುಳು ಲಿಪಿತ ಅಗತ್ಯತೆಲೆನ ಬಗೆಟ್ ದೀಪಕ್ ಪಡುಕೋಣೆ, ಪ್ರಹ್ಲಾದ್ ಪಿ ತಂತ್ರಿ, ನಿಶಾಂತ್ ರತ್ನಾಕರ್ ಬುಡ್ಪಾದ್ ಪನ್ಡೆರ್. ತುಳು ಲಿಪಿ ಕೂಟಾಕ್ಷರೊಲು, ಯೂನಿಕೋಡ್, ಫಾಂಟ್‌ಲು ಇಂಚಿನ ತಾಂತ್ರಿಕ ವಿಷಯೊಲೆನ್ ಸಾಮಾನ್ಯೆರೆಗ್ಲಾ ಅರ್ಥ ಆಪಿಲೆಕ ತೆರಿಪಾದ್ ಕೊರ್ಯೆರ್.
ಕಾಲಿ ರಾಜೆ ಮಹಾರಾಜೆರೆನ ಇತಿಹಾಸ ನಮ್ಮ ಇತಿಹಾಸ ಅತ್ತ್, ಇತ್ತೆದ ಆಟಿ ಕಾಲಿ ಆಡಂಬರ ಆದ್ ಪೋತುಂಡು
ತುಳುನಾಡ್ದ ಇತಿಹಾಸದ ಪಾತೆರ್ನಗ ಕಾಲಿ ಆಳ್ಯುನಕಲೆನ ಇತಿಹಾಸೊದ ಬಗೆಟ್ ಪನ್ಡನ್ಡ ಅವು ಕಾಲಿ ಒಂಜಿ ವರ್ಗೊದ ಇತಿಹಾಸ ಆಪುಂಡು. ತುಳುನಾಡ್ದ ಇತಿಹಾಸ ಮುಲ್ಪದ ಜನೊಕುಲೆನ ಉಲಯಿ, ಅಕುಲೆನ ಬೆನ್ನಿ, ಜೀವನ ಶೈಲಿ, ಗಲಸುನ ಸೊತ್ತುಲೆಡ್ ಉಂಡು ಪನ್ದ್ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರ ಬೊಕ್ಕ ತುಳು ಬದ್‌ಕ್ ವಸ್ತು ಸಂಗ್ರಹಾಲಯೊದ ಗುರ್ಕಾರೆ ಡಾ ತುಕಾರಾಮ್ ಪೂಜಾರ್ಲು ಪನ್ಡೆರ್. ಪಂಚದ್ರಾವಿಡ ಭಾಷೆಲೆಡ್ ತುಳುಕ್ ಬುಡುದ್ ಬಾಕಿದ ಮಾತೆಕ್ಲಾ ರಾಜ್ಯೊಲು ಇಪ್ಪುನಗ ತುಳುವೆರ್ ರಾಜ್ಯ ಕೇನುನೆಟ್ ದಾಲಾ ತಪ್ಪು ಇಜ್ಜಿ, ನಮ್ಮ ಪಾಡ್ದನೊಲು, ಶಾಸನೊಲುಲಾ ತುಳು ರಾಜ್ಯೊದ ಉಲ್ಲೇಖ ಮಲ್ತ್‌ದ ಪನ್ದ್ ಪನ್ಡೆರ್. ಅಂಚೆನೇ ಪಾತೆರೊಂದು ದುಂಬು ಮಾತಾ ಆಟಿ ಪನ್ಡ ಪೋಡಿಗೆ, ಆಟಿ ಪನ್ಡ್ ಸೀಕ್, ಆಟಿ ಪನ್ಡ ಅನಿಷ್ಟ ಪನ್ಪಿನ ಭಾವನೆ ಇತ್ತ್ಂಡ್, ಏತೇ ಮಲ್ಲ ಗುತ್ತುಬರ್ಕೆದಕುಲಾಂಡಲಾ ಆಟಿಗ್ ಪೋಡ್ಯೆದೆರ್. ಆಂಡ ಇತ್ತೆ ಕಾಲಿ ಮಿತ್ತರ್ಮೆದ ಆಡಂಬರ ಆದ್ ಪೋತುಂಡು ಪನ್ಡೆರ್.
ಕೊರಗಜ್ಜೆ ಅತ್ತ್, ಕೊರಗ ತನಿಯೆ, ತನಿಯಗ್ ಒಟ್ಟೆ ಮಲ್ದಿನ ಬೀಡ ದೀವಡೆ
ಕೊರ್ರೆ ಬಾಸೆ ಬೊಕ್ಕ ತುಳುನಾಡ ಕೊರಗೆರ್ ಪನ್ಪಿನ ವಿಷಯೊದ ಬಗೆಟ್ ನಡತಿನ ಚರ್ಚೆಡ್ ಪಾಲ್ ಪಡೆಯಿನ ವಿದ್ವಾಂಸೇ, ಸಾಹಿತಿ ಪಾಂಗಾಳ ಬಾಬು ಕೊರಗೆರ್ ಕೊರಗ ಬಾಸೆ ಪನ್ಡ ದಾದ, ಕೊರಗೆರ್ ಏರ್, ಅಕುಲೆನ್ ದಾಯೆ ಮೃಲನಿವಾಸಿ ಪನ್ದ್ ಪನ್ಪೆರ್ ಇಂಚಿನ ವಿಷಯೊಲೆನ ಬಗೆಟ್ ಪಾತೆರ್ಯೆರ್. ಕೊರಗೆರೆನ ಉಲಯಿದ ಸಾಮಾಜಿಕ ವ್ಯವಸ್ಥೆ, ಬರಿ, ಶೋಷಣೆಲು, ಮದಿಮೆ ಸಂಬಂಧೊಲೆನ ಬಗೆಟ್ ಪನ್ಡೆರ್. ಅಂಚೆನೇ ಆರಾಧನೆದ ಬಗೆಟ್ ಪಾತೆರ್ನಗ ಕೊರಗಜ್ಜೆ ಅತ್ತ್, ಅವ್ವು ಕೊರಗ ತನಿಯೆ ಆವೊಡು, ಆಮಗ್ ಗಂಗಸರ ದೀವರೆ ಬಲ್ಲಿ, ಕಲಿ ಮಾತ್ರ ದೀವೊಡು, ಒಟ್ಟೆ ಮಲ್ತಿನ ಬೀಡ ದೀಡ್ಂಡ್ ಏಳ್ ಜನ್ಮೊದ ಶಾಪ ತಿಕ್ಕುಂಡು ಪನ್ದ್ ಪನ್ಡೆರ್.
ಲೇಸ್‌ಡ್ ಕೆಮ್ಮಣ್ಣು ಸಿಸ್ಟರ್ಸ್ ಮೊಕಲೆರ್ದ್ ತುಳು ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ ನಡತ್ಂಡ್. ನಿಟ್ಟೆ ಕಾಲೇಜ್‌ದ ತಾಲೀಮ್ ಬೊಕ್ಕ ಕಲಾಸಂಗಮ ಕೂಪೆದಕುಲು ಕೋಟಿ ಚೆನ್ನಯೆರೆ ಜೀವನಕಥೆತ ನಾಟಕ ಗೊಬ್ಬುದ್ ಕಂಗುಲು ನಲಿಕೆದ ತೂಪರಿಕೆ ಮಲ್ತೆರ್.
ಮದ್ಯಾನರ್ದ್ ಬೊಕ್ಕ ನಡತಿನ ಯುವ ಸಮಾವೇಶೊಡು ಪಾತೆರ್ನ ಕಾಪು ಕ್ಷೇತ್ರೊದ ಶಾಸಕೆ ಗುರ್ಮೆ ಸುರೇಶ್ ಶೆಟ್ರ್, ತಾನ್ ಎಲ್ಯೆ ಇಪ್ಪುನಗ ತನ್ನ ಅಬ್ಬಡ ನಮಕ್ ತುಳುಟೇ ದಾಯೆ ಕನ ಕಟ್ಟುಂಡು ಪನ್ದ್ ಕೇನೊಂದಿತ್ತಿನೆನ್ ನೆನೆಪು ಮಲ್ತೊಂಡೆರ್. ತುಳು ಎನ್ನ ಉಡಲ್‌ದ ಭಾಷೆ, ಎಂಕ್ ತುಳುಟೇ ಕನ ಬೂರುನು ಪನ್ದ್ ಪನೊಂದು, ತುಳು ಭಾಷೆದ ಸ್ಥಾನಮಾನೊಗು ಏಪೊಗುಲಾ ಒವ್ವೇ ಸಹಕಾರ ಮಲ್ಪೆರಗ್‌ಲಾ ಯಾನುಲ್ಲೆ ಪನ್ದ್ ದೈರೊದ ಪಾತೆರ ಪನ್ಡೆರ್.
ಲೇಸ್‌ಗ್ ಮದಿಪುದ ಬಿನ್ನೆರಾದ್ ಬತ್ತಿತ್ತಿನ ವಾಗ್ಮಿ ಶ್ರೀಕಾಂತ್ ಶೆಟ್ಟಿ ಪಾತೆರ್ದ್, ಪೊರ್ಮ್ಬಾಟ ತುಳುವೆರೆ ನೆತ್ತೆರೊ‌ಡೇ ಉಂಡು, ತುಳುವೆರ್ ಕಟ್ಟಿನ ಈ ಸಂಸ್ಕೃತಿ, ನಾಡ್ ಸೂರ್ಯೆ ಚಂದ್ರೆರ್ ಇಪ್ಪುನೇಟ ಶಾಶ್ವತ ಪನ್ದ್ ಪನ್ಡೆರ್. ಇನಿ ತುಳುಕು ತಿಕ್ಕೊಡಾಯಿನ ಸ್ಥಾನಮಾನ ತಿಕ್ಕಂದಿನೆಕ್ ತುಳುನಾಡ್ದ ರಾಜಕಾರಣಿಲೇ ನೆವನ ಪನ್ದ್ ಪನ್ಡೆರ್.
ತುಳುನಾಡ ರಕ್ಷಣಾ ವೇದಿಕೆ ಉಂಡು ಮಲ್ದಿನ ಶ್ರೀ ಯೋಗೀಶ್ ಶೆಟ್ಟಿ ಜೆಪ್ಪು ಪಾತೆರ್ದ್, ತುಳುಕಾದ್ ಪೊರ್ಮ್ಬುನು ಪನ್ಡ ಅವು ನಮ್ಮ ಅಸ್ತಿತ್ವೊಗಾದ್ ಪೊರ್ಮ್ಬುನ, ಪಾಕ ವರ್ಸೊರ್ದಿಂಚಿ ತುಳುಕಾದ್ ಪೊರ್ಮ್ಬೊಂದುಪ್ಪುನ ಎಂಕ್ಲ, ಏಪೊಗ್ಲಾ ಪೊರ್ಮ್ಬಾಟೊಗು ಜಪ್ಪುನ ಜವನೆರೆ ಬೆರಿಕ್ ಉಂತುನ ಪನ್ಪಿನ ಪಾತೆರ ಕೊರ್ಯೆರ್.
ಕುಡೊರಿ ಕಡಕ್ ಪಾತೆರೊದ ವಾಗ್ಮಿ ವಿಶು ಶ್ರೀಕೇರ ಪಾತೆರ್ದ್, ಇದಮುಟ್ಪ ತುಳು ಭಾಷೆ ಅಧಿಕೃತ ಮಲ್ಪರೆಗ್ ಕೊರ್ತಿನ ಓಲೆಲೆನ್ ಪಿರ ತರ್ಪಾಂಡ ಇಡೀ ತುಳುನಾಡ್‌ಗೇ ಆ ಕಾಕಜಿಡ್ ಬಜಿಲ್ ಪಟ್ಟೊಲಿ ಪನ್ದ್ ಆಡಳಿತ ವ್ಯವಸ್ಥೆದ ವಿಫಲತೆದ ಬಗೆಟ್ ಮಕ್ಕರ್ ಮಲ್ತೆರ್. ತನ್ನಕುಲು ಪನ್ದ್ ಅರಾದ್ ಪತ್ತಿನಕುಲೇ ತುಳುವೆರೆ ಬೆರಿಕ್ ಬೀಸತ್ತಿ ಪಾಡ್ದೆರ್, ಪಾಡೊಂದೇ ಉಲ್ಲೆರ್ ಪನ್ದ್ ಪನ್ಡೆರ್.
ತುಳು ಪೊರ್ಮ್ಬಾಟೊಲೆಡ್ ಏಪೊಗುಲಾ ಎದುರಿಪ್ಪುನ ರೋಶನ್ ರೆನಾಲ್ಡ್, ತನ್ನ ಮಿತ್ತ್ ಏತ್ ಕೇಸ್ ಆಂಡಲಾ ಮಲ್ಲೇ ಇಜ್ಜಿ, ತುಳುಕಾದ್ ಪೊರ್ಮ್ಬುನೆನ್ ಏಪೊಗುಲಾ ಉಂತಾವಯೆ ಪನ್ದ್ ಪನ್ಡೆರ್.
ಶಟರ್‌ಬಾಕ್ಸ್ ಫಿಲಂಸ್‌ದ ಸಚಿನ್ ಶೆಟ್ಟಿ ಪಾತೆರ್ದ್ ತುಳುಕಾದ್ ಪೊರ್ಮ್ಬೆರ ಏಪೊಗುಲಾ ರೆಡಿ, ಯಾನ್ ಇನಿ ಈ ಜಾಗೆಡುಪ್ಪೆರ ತೂಯುಳುವೆರೇ ನೆವನ, ತುಳುಕು ಅನ್ಯಾಯ ಆಂಡ ಖಂಡಿತ ಯಾನ್ ಬರ್ಪೆ ಪನ್ದ್ ಪನ್ಡೆರ್.
ಜೈ ತುಲುನಾಡ್ ಸಂಘಟನೆದ ಗುರ್ಕಾರೆ ಉದಯ್ ಪೂಂಜಾ ಪಾತೆರ್ದ್, ಅಪ್ಪೆಬಾಸೆನ್ ದೊಂಕುದು, ಬೇತೆಬಾಸೆಡ್ ಪಾತೆರುನೆನ್ ಕೆಲವುದಕುಲು ಫ್ಯಾಷನ್ ಮಲ್ತೊಂದೆರ್, ತುಳುಕಾದ್ ಉಂಡು ಮಲ್ದಿನ ತುಳು ಸಾಹಿತ್ಯ ಅಕಾಡೆಮಿರ್ದ್ ತುಳುಕಾದ್ ಪನ್ಡೊನುನಂಚಿನ ಬೇಲೆಲು ಆವೊಂದಿಜ್ಜ ಪನ್ದ್ ಅಸಮಾಧಾನ ತೂಪಾಯೆರ್. ಅಂಚೆನೇ ತುಳುಕಾದ್ ತುಳುವೆರ್ ಒಟ್ಟಾವೊಡು ಪನ್ದ್ ಪನ್ಡೆರ್.
ದೈವಾರಾಧನೆ ಸಂರಕ್ಷಣಾ ವೇದಿಕೆದ ಭರತ್ ಬಲ್ಲಾಳ್‌ಬಾಗ್ ಪಾತೆರ್ದ್ ತುಳುವೆರೆನ್ ಒಟ್ಟು ಮಲ್ಪುನ, ತುಳು ಸಾಹಿತ್ಯೊದ ಕಮ್ಮೆನ ಪಸೆರಾವನ ಲೇಸ್ ಮರಲ್ತೊಂದುಪ್ಪುನೆಕ್ ಎಡ್ಡೆಪ್ಪು ಬಯಕಿಯೆರ್.
ಆಳ್ವಕೂಟೊ ತುಳು ಮ್ಯೂಸಿಕ್ ಬ್ಯಾಂಡ್‌ದ ಪ್ರವೀಣ್ ಆಳ್ವೆರ್ ಪಾತೆರ್ದ್, ಅಂತಾರಾಷ್ಟ್ರೀಯ ಮಟ್ಟೊಗು ತುಳುನು ತುಳು ಮ್ಯೂಸಿಕ್‌ನ್ ಕೊನೊವೊಡು ಪನ್ಪಿನ ಎನ್ನ ಆಸೆ, ಉಂದೆಕ್ ಮಾತಾ ತುಳುವೆರೆನ ಸಾಕಾರ ಬೋಡು ಪನ್ದ್ ಕೇಂಡೊಂಡೆರ್.
ಲೇಸ್‌ದ ಗುರ್ಕಾರ್ಮೆ ವಯಿಸೊಂದಿನ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ ಉಂಡು ಮಲ್ದಿನ ಮಹಿ ಮುಲ್ಕಿ ಮೇರ್ ಕರ್ನಾಟಕ ಏಕೀಕರಣೊದ ಪೊರ್ತುಡು ತುಳುಕು, ತುಳುವೆರೆಗ್ ಆತಿನ ಅನ್ಯಾಯೊದ ಬಗೆಟ್ ತೆರಿಪಾಯೆರ್, ಅಂಚೆನೇ ನನ ವರ್ಸ ವರ್ಸ ತುಳುನಾಡ್ ಕಾನ್ಕ್ಲೇವ್ ಮಲ್ಪುನ ಘೋಷಣೆ ಮಲ್ತೆರ್.
ಈ ಲೇಸ್‌ಡ್ ತುಳು ಶಾಸನೊಲೆನ ಅಧ್ಯಯನ ಮಲ್ತ್‌ದ್, ತುಳು ಲಿಪಿಕ್ ರಾಜ್ಯೊಡು ಅಧಿಕೃತ ಸ್ಥಾನಮಾನ ತಿಕ್ಕುನೆತ ಪಿರವು ಬೆನ್ತಿನ ಸುಭಾಸ್ ನಾಯಕ್ ಮೆರೆಗ್ ಮಾನಾದಿಗೆ ಮಲ್ತೆರ್. ಅಂಚೆನೇ ನಿಟ್ಟೆ ಕಾಲೇಜಿದ ತುಡರ್ ತುಳು ಸಂಘ ಬೊಕ್ಕ ಆಳ್ವಾಸ್‌ದ ಅಳ್ವಾಸ್ ತುಳು ಸಂಘೊಗು ಈ ಪೊರ್ತುಡು ಮಾನಾದಿಗೆ ಮಲ್ತೆರ್.
ಪುಸ್ತಕ ಬುಡುಗಡೆ
ಈ ಸಮಾವೇಶೊಡು ಮೂಜಿ ತುಳು ಮಸ್ತಿರೆಲೆನ ಬುಡುಗಡೆ ಮಲ್ತೆರ್.
1. ಪತ್ತ್
ಪುಗರ್ತೆದ ತುಳು ಸಾಹಿತಿ ಕುಶಾಲಾಕ್ಷಿ ವಿ ಕಣ್ವತೀರ್ಥ ಮೆರೆನ ಪತ್ತನೇ ಮಸ್ತಿರೆ, ತುಳು ಕಬಿತೆಲೆ ಸಂಚಿ ‘ಪತ್ತ್’ ಉಂದೆನ್, ಪೆರಿಯ ಸಾಹಿತಿ, ಆಕಾಶವಾಣಿ ಉದ್ಘೋಷಕೆರ್ ಮುದ್ದು ಮೂಡುಬೆಳ್ಳೆ ಬುಡುಗಡೆ ಮಲ್ತೆರ್.
2. ಒಂಜಿ ಕನ
ಕು. ಹರ್ಷಾ ಬೇಲಾಡಿ ಬರೆತಿನ ಕಬಿತೆಲೆನ ಗೊಂಚಿಲ್ ಒಂಜಿ ಕನ, ಉಂದೆನ್ ಲೇಸ್‌ದ ಬಿನ್ನೆರ್ ಜೆಪ್ಪು ಯೋಗೀಶ್ ಶೆಟ್ಟಿ ಬುಡುಗಡೆ ಮಲ್ತೆರ್.
3. ಜೀಟಿಗೆ
ತುಳು ಮಸ್ತಿರೆಲೆನ ಪರತಿರಿಟ್ ದಾಖಲೆದ 1000 ಪ್ರತಿ ಸೇಲ್ ಆದ್, ರಡ್ಡನೇ ಆವೃತ್ತಿಡ್ ನನಲಾತ್ ಎಚ್ಚಿನ ಒಲವುಲು ದಿಂಜಾವೊಂದು ಜೀಟಿಗೆ – ತುಳು ಬರವುದ ಸಿರಿತುಪ್ಪೆ ಬುಡುಗಡೆ ಆಂಡ್.
ಪುಸ್ತಕ ಬುಡುಗಡೆ ಮಲ್ತ್ ಪಾತೆರಿನ ಸಾಹಿತಿ ಮುದ್ದು ಮೂಡುಬೆಳ್ಳೆ ಜವನೆರ್ ಮಲ್ತೊಂದುಪ್ಪುನ ಬೇಲೆನ್ ಪುಗರ್ದ್, ಸಾಹಿತಿ ಕುಶಲಾಕ್ಷಿ ಕಣ್ವತೀರ್ಥ ಮೆರೆನ ಪತ್ತ್ ಡ್ ಗಲಸ್‌ದಿನ ಪದೊಕುಲೂ, ಅಂಚೆನೇ ಸೊತ್ತು ನು ಪುಗರ್ಯೇರ್. ಜವನೆರ್ ಸಾಹಿತ್ಯದಂಚಿಲಾ ಒಕತೆ ಬರೊಡು ಪನ್ದ್ ಪನ್ಡೆರ್.
ಸುವಿತ್ ಶೆಟ್ಟಿ ಬೊಕ್ಕ ಚೈತ್ರಾ ಲೇಸ್‌ದ ನಿರೂಪಣೆ ಮಲ್ತೆರ್. ನಿಶ್ಚಿತ್ ರಾಮಕುಂಜ ಎದುಕೊಂದು, ಸುಕೇಶ್ ಪುತ್ತೂರು ಸೊಲ್ಮೆ ಸಂದಾಯೆರ್.