Last updated on April 18th, 2025 at 02:14 pm
ಬೆಂಗಳೂರು: ಪಿಯುಸಿ ಪರೀಕ್ಷೆದ ಬೆರಿಟೇ ವೃತ್ತಿಪರ ಕೋರ್ಸ್‌ಲೆನ್ ಮಲ್ಪುನಕಲೆಗ್ ರಾಜ್ಯೊಡೊರ್ಮೆ ಏಪ್ರಿಲ್ 15, 16, 17 ಸಿಇಟಿ ಪರೀಕ್ಷೆ ನಡತಿತ್ತ್‌ದ್, ಅಕೇರಿದ ದಿನ ಆಯಿನ ಗುರುವಾರ ಶಿವಮೊಗ್ಗ ಬೊಕ್ಕ ಬೀದರ್‌ಡ್ ಪರೀಕ್ಷೆ ಬರೆಪಿನಕಲೆಗ್ ಚೆಕಿಂಗ್‌ದ ಪೊರ್ತುಡು ಜನಿವಾರ ದೆಪ್ಪೊಡು ಪನ್ಡ್‌ದ್ ಅಧಿಕಾರಿಲು ಸೂಚನೆ ಕೊರ್ತಿನವು ಭಾರೀ ವಿವಾದೊಗು ನೆವನ ಆತ್ಂಡ್.
ಬೀದರ್‌ದ ಸಾಯಿ ಸ್ಫೂರ್ತಿ ಪರೀಕ್ಷಾ ಕೇಂದ್ರೊಡು ವಿದ್ಯಾರ್ಥಿಯೊರಿ ಜನಿವಾರ ದೆಪ್ಪೆರೆ ಕೇನಂದಿನೆಕ್ ಗಣಿತ ಪರೀಕ್ಷೆ ಬರೆಯೆರೆ ಬುಡ್ತಿಜೆರ್ . ಉಂದೆರ್ದಾವರ ಆಯನ ಎಂಜಿನಿಯರಿಂಗ್ ಮಲ್ಪುನ ಕನೊನು ಕಾಟೊಗು ದೀಲೆಕ ಆತ್ಂಡ್.
ಬೀದರ್‌ದ ವಿದ್ಯಾರ್ಥಿ ಕರಿನ ಬುಧವಾರ ಜನಿವಾರ ಪಾಡೊಂದು ಫಿಸಿಕ್ಸ್, ಕೆಮಿಸ್ಟ್ರಿ ಪರೀಕ್ಷೆ ಬರೆದಿತ್ತೆ. ಗುರುವಾರ ಗಣಿತ ಪರೀಕ್ಷೆಗ್ ಬನ್ನಗ ಜನಿವಾರ ತೂಯಿನ ಪರೀಕ್ಷಾ ಸಿಬ್ಬಂದಿ ಆಕ್ಷೇಪ ಮಲ್ತ್‌ದೆರ್. ಜನಿವಾರ ದೆಪ್ಪುಜಿ, ಪರೀಕ್ಷೆ ಬರೆಯೆರ ಅನು ಕೊರ್ಲೆ ಪನ್ದ್ ನಟ್ಟೊಂದೆ. ಕಡೆಕ್ ಪರೀಕ್ಷೆರ್ದೇ ಆಯೆ ಪಿದಯಿ ಬೈದೆ ಪನ್ದ್ ವರದಿಲು ತೆರಿಪಾದ.
ಅವ್ವೇ ರೀತಿಡ್ ಶಿವಮೊಗ್ಗದ ಆದಿಚುಂಚನಗಿರಿ ಕಾಲೇಜಿದ ಪರೀಕ್ಷಾ ಕೇಂದ್ರೊಡು ವಿದ್ಯಾರ್ಥಿ ಒರಿಯನ ಜನಿವಾರ ಕತ್ತೆರ್‌ದ್ ಪರೀಕ್ಷೆ ಬರೆಯೆರೆ ಅನು ಕೊರ್ತೆರ್. ವಿದ್ಯಾರ್ಥಿ ಜನಿವಾರ ದೆಪ್ಪುಜಿ ಪನ್ಡಿನೆಕ್ ಪರೀಕ್ಷಾ ಸಿಬ್ಬಂದಿ ಅವೆನ್ ಕತ್ತೆರ್ದೆರ್ ಪನ್ದ್ ಆರೋಪ ಕೇನ್ದ್ ಬೈದ್ಂಡ್.
ರಡ್ಡ್ ಪ್ರಕರಣೊದ ಬಗೆಟ್‌ಲಾ ರಾಜ್ಯ ಬಿಜೆಪಿ ಪಿಸಿರಾದಿತ್ತ್‌ದ್ ಮಾಪು ನಟ್ಟೊಡು ಪನ್ದ್ ಸರ್ಕಾರೊಗು ಆಗ್ರಹ ಮಲ್ದ್ಂಡ್.