Last updated on April 7th, 2025 at 09:33 am
ಕುಡ್ಲ: ಪೊಂಜೊವು ಒರ್ತಿಗ್ ಏರಾ ಈರೆಗ್ ಮಾಟ, ಮಂತ್ರ ಮಲ್ಪಾದೆರ್ ಪನ್ದ್ ನಂಬಾದ್, ಪಿರಿಕಟ್ಟ್‌ದ ನೆವನೊಡು ಲೈಂಗಿಕ ಕಿರುಕುಳ ಕೊರ್ದು ಒಂಜಿ ಲಕ್ಷ ರೂ. ಗೆತೊಂದು ದಗೆ ಮಲ್ದಿನ ಆರೋಪಡ್ ಕೂಳೂರು ಉಸ್ತಾದ್, ಗುರುವಾಯನಕೆರೆದ ಜಿ. ಅಬ್ದುಲ್ ಕರೀಮ್‌ನ್ ಕುಡ್ಲ ಮಹಿಳಾ ಸ್ಟೇಶನ್ ಪೊಲೀಸೆರ್ ಕೈದ್ ಮಲ್ದೆರ್.
ಪ್ರಕರಣೊದ ಒಲವು: 2022ಟ್ ಸಂತ್ರಸ್ತೆದಿಗ್ ಖಿನ್ನತೆದ ಸಮಸ್ಯೆ ಉಂಡಾದಿತ್ತ್ಂಡ್. ಆರ್ ತನ್ನ ಸಂಬಂಧೊದ ಏರ್ನನಾ ಪಾತೆರದಂಚ ಅಪಗ ಪೆಜಮಾಡಿಡ್ ಇತ್ತಿನ ಉಸ್ತಾದ್ ಅಬ್ದುಲ್ ಕರೀಮ್‌ನ ಇಲ್ಲಗ್ ಪೋದಿತ್ತೆರ್. ಅಲ್ಪ ಅಬ್ದುಲ್ ಕರೀಮ್ ಈರೆಗ್ ಏರಾ ಮಾಟ ಮಲ್ದೆರ್. ಅವೆನ್ ದೆಪ್ಪಾವೊಡು ಪನ್ದ್ ಪನ್ತೆಗೆ. ಅವೆರ್ದ್ ಬೊಕ್ಕ ಮಾಟ ಮಂತ್ರ ದೆಪ್ಪುನ ಮರ್ದ್ ಕೊರ್ಪೆ ಪನ್ದ್ ನಂಬಾದ್ ಆ ಪೊಂಜೊವುಗು ಅಪಗಪಗ ಬರ್ಯೆರ ಪನೊಂದಿತ್ತೆ.
ಪೊಂಜೊವು ತನ್ನ ಪಲಿನ ಒಟ್ಟುಗು ಈ ಜನತ ಕೈತಡೆ ಪಾಕ ಸರ್ತಿ ಪೋದಿತ್ತೆರ್. ಅಲ್ಪ ಆಯೆ ಪೊಂಜೊವುಗು ಕುರಾನ್ ಓದಾವೊಂದಿತ್ತೆ ಪನ್ದ್ ಪೊಲೀಸೆರೆಗ್ ಕೊರ್ತಿನ ಒಯಿಲ್‌ಡ್ ಪೊಂಜೊವು ತೆರಿಪಾದೆರ್.
2022ತ ಫೆ. 10ತಾನಿ ಸಂತ್ರಸ್ತೆದಿನ ಪಲಿಗ್ ಬೇತೆ ಬೇಲೆ ಇತ್ತಿನೆರ್ದಾವರ ಸಂತ್ರಸ್ತೆದಿ ಒರ್ತಿಯೇ ಪೆಜಮಾಡಿದ ಇಲ್ಲಗ್ ಪೋದಿತ್ತ್‌ದ್, ಅಲ್ಪ ಉಸ್ತಾದ್ ಆರೆನ್ ಕುರಾನ್ ಓದಾದ್ ಮೆಯಿ ಮುಟ್ಟುದು ಕಿರುಕುಳ ಕೊರ್ದಿತ್ತೆ.
ಆತೇ ಅತ್ತಂದೆ ಪೊಂಜೊವುನ ಕೈರ್ದ್ 55 ಸಾವಿರ ರೂ. ಗೆತೊಂದೆ ಪನ್ದ್ ಒಯಿಲ್‌ಡ್ ತೆರಿಪಾದೆರ್. ಒಟ್ಟು ಸುಮಾರ್ ಒಂದು ಲಕ್ಷ ರೂ. ಗೆತೊಂದು ದಗೆ ಮಲ್ತ್‌ದೆ ಪನ್ದ್ ಪೊಂಜೊವು ಒಯಿಲ್‌ಡ್ ತೆರಿಪಾದೆರ್.