Last updated on April 3rd, 2025 at 08:44 am
ಬೆಂಗಳೂರು (ಎ.2): ನನದ ಆಜಿ ವಾರ ಸಾರ್ವಜನಿಕೆರೆಗ್ ಸೇವೆ ಕೊರ್ಪುನ ಬೈಕ್ ಟ್ಯಾಕ್ಸಿಲೆನ್ ಉಂತಾಯೆರ ಅಗತ್ಯ ಕ್ರಮ ಗೆತೊನರೆ ಕರ್ನಾಟಕ ಹೈಕೋರ್ಟ್ ರಾಜ್ಯ ಸರ್ಕಾರೊಗು ನಿರ್ದೇಶನ ಕೊರ್ತುಂಡು. ಟೂವೀಲರ್‌ಲೆನ್ ಸಾರಿಗೆ ಗಾಡಿಲಾದ್ ಪಗಪೆರ ರಿಜಿಸ್ಟರ್ ಮಲ್ತೊನರ 2022 ಟ್ ಸಂದಾದಿತ್ತಿನ ಅರ್ಜಿಲೆನ್ ಪರಿಗಣಿಪೆರ ರಾಜ್ಯ ಸರ್ಕಾರೊಗು ನಿರ್ದೇಶನೊಲೆನ್ ಕೇನ್ಡ್‌ದ್ ಉಬರ್ ಇಂಡಿಯಾ ಸಿಸ್ಟಮ್ಸ್ ಪ್ರೈವೇಟ್ ಲಿಮಿಟೆಡ್, ಎಎನ್‌ಐ ಟೆಕ್ನಾಲಜೀಸ್ ಪ್ರೈವೇಟ್ ಲಿಮಿಟೆಡ್ ಅರ್ಜಿ ಪಾಡ್ದಿತ್ತೆರ್. ಈ ಮಾತಾ ಅರ್ಜಿಲೆನ್ ಹೈಕೋರ್ಟ್ ನ್ಯಾಯಮೂರ್ತಿ ಬಿ.ಎಂ. ಶ್ಯಾಮ್ ಪ್ರಸಾದ್ ವಜಾ ಮಲ್ತ್‌ದ್ , ಬೈಕ್ ಟ್ಯಾಕ್ಸಿಲೆನ ಮಾತಾ ಕಾರ್ಯಾಚರಣೆಲೆನ್ ಉಂತಾಯೆರ ಓಲಾ, ಉಬರ್ ಬೊಕ್ಕ ರ‍್ಯಾಪಿಡೋಲೆಗ್ ಸೂಚನೆ ಕೊರ್ತೆರ್.
ರಾಜ್ಯ ಸರ್ಕಾರ ಈ ವಿಚಾರೊಡು ವಾದ ಮಂಡನೆ ಮಲ್ತ್‌ದ್ ಅನು ಕೊರ್ಯೆರ ಸಾಧ್ಯ ಇಜ್ಜಿ. ಅರ್ಜಿಲೆನ ವಿಚಾರಣೆದ ಪೊರ್ತುಡು ನ್ಯಾಯಂತಡೆ ಕೊರ್ತಿನ ಮಧ್ಯಂತರ ಆದೇಶೊದ ಆಧಾರೊಡು ಓಲಾ, ಉಬರ್ ಬೊಕ್ಕ ರ್‍ಯಾಪಿಡೋ ಬೈಕ್ ಟ್ಯಾಕ್ಸಿಲು ನನಲಾ ತಿರ್ಗೊಂದುಲ್ಲ. ನನ ಆಜಿ ವಾರ ಮುಟ್ಟ ಸೇವೆ ಕೊರಂದಿ ಲೆಕ ಆದೇಶ ಕೊರ್ತುಂಡು ಅಂಚೆನೇ ಆಜಿ ವಾರ ಕರಿದ್ ಉಂದೆನ್ ನಿಷೇಧ ಮನ್ಪೊಡು ಪನ್ದ್ ಪನ್ತ್ಂಡ್. ರಾಜ್ಯ ಸರ್ಕಾರೊಗು ಉಂದೆತ ಬೆರಿಪತ್ತೆರಗ್ಲಾ ಪನ್ತ್ಂಡ್
1988 ದ ಮೋಟಾರ್ ವಾಹನ ಕಾಯ್ದೆದ ಸೆಕ್ಷನ್ 93 ಬೊಕ್ಕ ಅವೆತ ಅಡಿಟ್ ಇಪ್ಪುನ ನಿಯಮಲೆನ ಅಡಿಟ್ ರಾಜ್ಯ ಸರ್ಕಾರ ಸಂಬಂಧಿತ ಮಾರ್ಗಸೂಚಿಲೆನ್ ಗೊತ್ತು ಮಲ್ಪಂದೆ, ಅರ್ಜಿದಾರೆರ್ ಬೈಕ್ ಟ್ಯಾಕ್ಸಿ ಸೇವೆಲೆನ್ ಕೊರ್ಪುನ ಏಜೆನ್ಸಿ ಲೆಕ ಬೇಲೆ ಮಲ್ಪೆರ ಸಾಧ್ಯ ಇಜ್ಜಿ. ಕರ್ನಾಟಕ ಮೋಟಾರ್ ವಾಹನ ನಿಯಮೊಲೆನ ಪ್ರಕಾರ ಬೊಲ್ದು ನಂಬರ್ ಪ್ಲೇಟ್‌ಲು ಇತ್ತಿನ ಟೂ ವೀಲರ್ ಗಾಡಿಲು ವಾಣಿಜ್ಯ ಕಾರ್ಯಾಚರಣೆ ನಡಪಾಯೆರ ಸಾಧ್ಯ ಇಜ್ಜಂದಿನೆರ್ದಾವರ ಬೈಕ್ ಟ್ಯಾಕ್ಸಿಲು ಕಾನೂನು ಬಾಹಿರ ಪನ್ದ್ ರಾಜ್ಯ ಸರ್ಕಾರ ವಾದ ಮಲ್ತಿತ್ತ್ಂಡ್. ಉಂದೆನ್ ಪರಿಗಣಿತಿನ ನ್ಯಾಯಂತಡೆ ಈ ಆದೇಶ ಕೊರ್ತುಂಡು.