Last updated on April 10th, 2025 at 02:27 pm
ಒಡಿಪು, ಏ. 10: ಪ್ರಿ ವೆಡ್ಡಿಂಗ್ ಬೊಕ್ಕ ಪೋಸ್ಟ್ ವೆಡ್ಡಿಂಗ್ ಫೋಟೋಶೂಟ್ ವಿಚಾರೊಡು ಒಡಿಪು ಶ್ರೀ ಕೃಷ್ಣಮಠ ಮಹತ್ವೊದ ನಿರ್ಧಾರ ಗೆತೊಂದುಂಡು. ಕೃಷ್ಣ ಮಠೊಂತ ರಥಬೀದಿಟ್ ಪ್ರಿ ವೆಡ್ಡಿಂಗ್ ಬೊಕ್ಕ ಪೋಸ್ಟ್ ವೆಡ್ಡಿಂಗ್ ಫೋಟೋಶೂಟ್ ನಿಷೇಧ ಮಲ್ತ್‌ದ್ ಪರ್ಯಾಯ ಪುತ್ತಿಗೆ ಮಠ ನಿರ್ಧಾರ ಪ್ರಕಟ ಮಲ್ದ್ಂಡ್. ಕಾಂಡೆಕಾಂಡೆ ಅಂಚೆನೇ ಸ್ವಾಮೀಜಿಲು ಅಂಚಿಂಚಿ ಪೋಪುನ ಪೊರ್ತುಡು ಪೊಕ್ಕಡೆ ಆಪುನಂಚಿನ ಸನ್ನಿವೇಶೊಲು ಉಂಡಾಪಿನೆನ್ ತೆಲಾವೆರೆ ಮಠ ಈ ಕ್ರಮ ಗೆತೊಂದುಂಡು.
ಕೃಷ್ಣಮಠೊಂತ ರಥಬೀದಿ ಪಾರಂಪರಿಕ ಕಟ್ವಾನೊಲು ಇಪ್ಪುನ ಜಾಗೆ. ಪ್ರಿ ವೆಡ್ಡಿಂಗ್ ಬೊಕ್ಕ ಪೋಸ್ಟ್ ವೆಡ್ಡಿಂಗ್ ಫೋಟೋಶೂಟ್ ಪುದರ್‌ಡ್ ಕಾಂಡೆಕಾಂಡೆ ಮಠೊಂತ ಸುತ್ತ ಅಸಭ್ಯ ನಡಕೆಲು ತೋಜಿದ್ ಬರ್ಪ. ಫೋಟೋಶೂಟ್ ನೆವನೊಡು ರಥಬೀದಿಟ್ ಪ್ರೇಮ ಸಲ್ಲಾಪೊಲು ನಡಪುವ. ಕೇರಳ ಬೆಂಗಳೂರು ದಂಚಿರ್ದ್ ಬರ್ಪಿನ ಅರ್ಬುದ ಫೋಟೋಗ್ರಾಫರ್ಸ್‌ಲು ಎಚ್ಚಾತೆರ್. ಅಂಚಾದ್ ಈ ಕ್ರಮ ಗೆತೊಂದ ಪನ್ದ್ ಮಠೊಂತ ಅಧಿಕಾರಿಳು ತೆರಿಪಾದೆರ್.
ಅಷ್ಟಮಠಾಧೀಶೆರ್ ಪೋಪುನ ಬರ್ಪುನ ರಥಬೀದಿ ಉಂದಾದುಂಡು. ಅವೇತೋ ವರ್ಸೊರ್ದಿಂಚಿ ಯತಿಕುಲು, ದಾಸೆರ್ ನಡತಿನ ತಾದಿ ಉಂದಾದುಂಡು. ಉಂದೆಕ್ ಐನವೇ ಆಯಿನ ಪಾವಿತ್ರ್ಯತೆ ಉಂಡು. ಪ್ರತಿ ದಿನ ರಥ ಬೀದಿಟ್ ಉತ್ಸವ ನಡಪುಂಡು. ಆತೇ ಅತ್ತಂದೆ ಉಂದು, ಅಷ್ಟಮಠೊಕುಲು ಇಪ್ಪುನ ರಥಬೀದಿ ಆದುಂಡು. ಮುಲ್ಪ ಇನೆಪಕ್ಕಿಲೆ ಲೆಕ ಸರಸ ಸಲ್ಲಾಪ ಮಲ್ಪುನ ಸಮ ಅತ್ತ್. ಧಾರ್ಮಿಕ ಪಸಂದ್ರೊಗು ತಲೆಪು ಆಪುನಂಚಿನ, ಪೊಕ್ಕಡೆ ಆಪುನಂಚಿನ ಸನ್ನಿವೇಶೊಲೆನ್ ತಪ್ಪಾಯೆರ ಈ ನಿರ್ಧಾರ ಗೆತೊಂದುಂಡು ಪನ್ದ್ ಮಠ ತೆರಿಪಾದ್ಂಡ್.