Last updated on April 17th, 2025 at 06:18 am
ಬೊಲ್ತೇರ್: ಕಾರ್‌ಲೆನ್ ಕಡ್ತ್‌ದ್ ಕುರಿನ ರೀತಿಡ್ ಚಿಟ್ಟೆಪಿಲಿತ ಪುನ ಸವಣಾಲ್ ಗ್ರಾಮೊದ ರಿಸರ್ವ್ ಫಾರೆಸ್ಟ್ ಜಾಗೆಡ್ ಏ.12 ತಾನಿ ತಿಕ್ಕ್‌ದಿತ್ತ್ಂಡ್. ಈ ಬಗೆಟ್ ಪ್ರಕರಣ ದಾಕಲಾದಿತ್ತ್‌ದ್ ಚಿಟ್ಟೆಪಿಲಿತ ಸ್ಯಾಂಪಲ್ ಒಟ್ಟುಮಲ್ತ್‌ದ್ ಎಚ್ಚಿನ ಪರೀಕ್ಷೆಗ್ ಪ್ರಯೋಗಾಲಯೊಗು ಕಡಪುಡೊಂದುಲ್ಲೆರ್.
ಏ.11 ತಾನಿ ಬಯ್ಯಡ್ ಬೊಲ್ತೇರ್ ಕಾಡಮುರ್ಗೊ ವಿಭಾಗೊದ ಆರ್.ಎಫ್.ಓ ಶರ್ಮಿಷ್ಠಾ ಮೆರೆಗ್ ಒಲವು ಬತ್ತಿತ್ತ್‌ದ್, ಏ.12 ತಾನಿ ಜಾಗೆಗ್ ಪೋದು ಮಹಜರು ಮಲ್ತ್‌ದ್ ಒರಿನ ಎಲುಮುಲ್ಲುನು ಒಟ್ಟು ಮಲ್ತ್‌ದ್ ಬೊಲ್ತೇರ್ ಪಶು ಆಸ್ಪತ್ರೆಡ್ ದೀದಿತ್ತೆರ್. ಕಾರ್ಲ ಕಾಡಮುರ್ಗೊ ವಿಭಾಗೊದ ಡಿಎಫ್‌ಓ ಶಿವರಾಮ ಬಾಬುಲಾ ಬತ್ತ್‌ದ್ ಪರಿಶೀಲನೆ ಮಲ್ದೆರ್. ಈ ಬಗೆಟ್ ಏ 12 ತಾನಿ ರಾತ್ರೆ ಬೊಲ್ತೇರ್ ಕಾಡಮುರ್ಗೊ ವಿಭಾಗೊಡು 1972 ನೇ ಕಾಡಮುರ್ಗೊಲೆನ್ ಕಾಪುನ ಕಾಯಿದೆದ ಅಡಿಟ್ ಏರಾ ಬೋಂಟೆ ಮಲ್ತ್‌ದ್ ಚಿಟ್ಟೆಪಿಲಿನ್ ಕೆರ್ತಿನ ಪ್ರಕರಣ ದಾಕಲ್ತೊಂದು ಬೊಲ್ತೇರ್ ನ್ಯಾಯಂತಡೆಕ್ ಪ್ರಕರಣೊದ ವರದಿನ್ ಕೊರ್ತೆರ್.
ಇಲಾಖೆಗ್ ಏ. 11 ತಾನಿ ಬತ್ತಿನ ಪಟೊಟು ಕಾರ್ ಕಡ್ತಿನ ಚಿಟ್ಟೆಪಿಲಿತ ದೊಗಲೆ ಮಾಸ ಇತ್ತ್‌ದ್, ಮನದಾನಿ ಪೋದು ತೂನಗ ಕಾಲಿ ಎಲುಮುಲ್ಲು ಒರಿದ್ಂಡ್. ಕೆಲ ತಿಂಗೊಲು ದುಂಬು ಫೋಟೋ ಕಲೆತೆರ್ ಪನ್ದ್ ತೆರಿದ್ ಬೈದ್ಂಡ್. ಏರ್, ಏಪ ಈ ಫೋಟೋ ಕಲೆತೆರ್ ಪನ್ಪಿನ ಜಡ್ತೆ ನಡತೊಂದುಂಡು.
ಇತ್ತೆ ತಿಕ್ಕಿನ ಎಲುಮುಲ್ಲುಲೆನ ಸ್ಯಾಂಪಲ್‌ನ್ ರಡ್ಡ್ ದಿನೊತ ಉಲಯಿ ಚೆನ್ನೈ ಅತ್ತ್ಂಡ ಹೈದರಾಬಾದ್‌ದ ಪ್ರಯೋಗಾಲಯೊಲೆಗ್ ಕಡಪುಡುವ ಪನ್ದ್ ಇಲಾಖೆ ತೆರಿಪಾದ್ಂಡ್.