Last updated on April 7th, 2025 at 11:54 am
ಸುಳ್ಯ, ಏ.07: ಅಪ್ಪೆ ಬೊಕ್ಕ ಮಗೆ ಎಲಿ ಪಾಸಾಣ ತಿಂದ್‌ದ್ ಜೂವ ದೆತ್ತೊನ್ರ ತೂದಿತ್ತ್‌ದ್, ಮಗೆ ತೀರ್ದ್, ಅಪ್ಪೆ ಸೀರಿಯಸ್ ಸ್ಥಿತಿಟ್ ಆಸ್ಪತ್ರೆಗ್ ದಾಕಲಾತಿನ ನಡಕೆ ಸುಳ್ಯ ತಾಲೂಕ್‌ಧ ನಾಲ್ಕೂರು ಗ್ರಾಮೊದ ನಡುಗಲ್ಲ್ ಪನ್ಪಿನಲ್ಪ ಐತಾರ ನಡತ್ಂಡ್.
ನಾಲ್ಕೂರು ಗ್ರಾಮೊದ ದೇರಪ್ಪಜ್ಜನಮನೆ ನಿವಾಸಿ ಕುಶಾಲಪ್ಪ ಗೌಡ ಮೆರೆನ ಮಗೆ ನಿತಿನ್ (32) ತೀರ್ದಿನಾರ್. ಆರೆನ ಅಪ್ಪೆ ಸುಲೋಚನಾ ಮೆರೆಗ್ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ಇರ್ವೆರ್ಲಾ ಮೂಜಿ ದಿನೊಕು ದುಂಬು ಎಲಿ ಪಾಸಾಣ ತಿಂದ್‌ದ್ ಐತಾರ ಕಾಂಡೆ ಉಸಾರ್ ತತ್ತ್‌ದೆರ್.
ತೀರ್ದಿನ ನಿತಿನ್ ಐಟಿಐ ಪದವೀಧರೆ ಆದಿತ್ತ್‌ದ್, ತನ್ನ ಜಾಗೆಡೇ ಕೃಷಿಕೆ ಆದ್ ಬೆನೊಂದಿತ್ತೆರ್. ಆರ್ ಒಂಜಿ ವರ್ಸೊಗು ದುಂಬು ದೀಕ್ಷಾ ಪನ್ಪಿನಾರೆನ್ ಮದಿಮೆ ಆದಿತ್ತೆರ್. ದೀಕ್ಷಾ ಮುಟ್ಟದ ಒಂಜಿ ಕಾಲೇಜ್‌ಡ್ ಅತಿಥಿ ಉಪನ್ಯಾಸಕಿ ಆದ್ ಬೇಲೆ ಮಲ್ತೊಂದಿತ್ತೆರ್. ನಡಕೆ ನಡತಿನ ಪೊರ್ತುಡು ದೀಕ್ಷಾ ತಮೆರಿಗ್ ಪೋದಿತ್ತ್‌ದ್, ಈ ಪೊರ್ತುಡು ಅಪ್ಪೆ ಸುಲೋಚನಾ ಬೊಕ್ಕ ಮಗೆ ನಿತಿನ್ ವಿಷ ತಿನ್ತೆರ್ ಪನ್ದ್ ವರದಿ ಆತ್ಂಡ್.
ಊರುಡು ಎಡ್ಡೆ ವ್ಯಕ್ತಿತ್ವ ಇತ್ತಿನ ನಿತಿನ್ ಮಾತೆರೆಡ ಆತ್ಮೀಯವಾದ್ ಇತ್ತೆರ್. ನಿತಿನ್‌ನ ಅಮ್ಮೆರ್ ಕುಶಾಲಪ್ಪ ಗೌಡ್ರೆನ ಆರೋಗ್ಯಲಾ ಆತೊಂಜಿ ಸಮ ಇಜ್ಜಿ ಪನ್ದ್ ತೆರಿದ್ ಬೈದ್ಂಡ್.
ಸುಬ್ರಹ್ಮಣ್ಯ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್‌ದ್, ಜಡ್ತೆ ನಡತೊಂದುಂಡು.