ಬೆಂಗಳೂರುಡು ಇಲ್ಲದ ಕಾಂಪೌಂಡ್ ಉಲಯಿದ ಪಾರ್ಕಿಂಗ್‌ಲಾ ಕಟ್ಟೊಡು ಟ್ಯಾಕ್ಸ್

Last updated on April 1st, 2025 at 06:10 pm

ಬೆಂಗಳೂರು, ಎ. 01: ಎಪ್ರಿಲ್ ಡ್ ರಾಜ್ಯ ಸರಕಾರ ಪೇರ್, ಕರೆಂಟ್ ರೇಟ್ ಎಚ್ಚ ಮಲ್ತ್‌ದ್ ಜನೊಕ್ಲೆನ ಆಕ್ರೋಶಗ್ ನೆವನ ಆತ್ಂಡ್. ಈ ನಡುಟು ಇತ್ತೆ ಬಿಬಿಎಂಪಿ ಗಾಡಿ ಪಾರ್ಕಿಂಗ್ ಮಲ್ತಿನೆಕ್ಲಾ ಟ್ಯಾಕ್ಸ್ ಪಾಡೆರ ಪಿದಡ್ದ್ಂಡ್. ಉಂದೆಕ್ ಸಂಬಂಧಿತ್‌ದ್ ಡ್ರಾಫ್ಟ್ ಅಧಿಸೂಚನೆನ್ ಬಿಬಿಎಂಪಿ ಬುಡ್ತುಂಡು. ಅಧಿಸೂಚನೆದ ಬಗೆಟ್ ಸಾರ್ವಜನಿಕೆರ್ ಸಲಹೆ ಬೊಕ್ಕ ಅಕ್ಷೇಪಣೆ ಸಂದಾಯೆರ ಅವಕಾಶ ಕೊರ್ತುಂಡು.

ಇಲ್ಲದ ಕಾಂಪೌಂಡ್, ಅಪಾರ್ಟ್‌ಮೆಂಟ್, ಕಮರ್ಷಿಯಲ್ ಕಾಂಪ್ಲೆಕ್ಸ್, ಮಾಲ್ ಸೇರ್ದ್ ಮಾತಾ ರೀತಿದ ಕಟ್ವಾನೊಲೆಗ್ ಪಾರ್ಕಿಂಗ್ ರೇಟ್ ಎಚ್ಚ ಮನ್ಪೆರ ಪಿದಡ್ದ್ಂಡ್. ಒಕ್ಕೆಲ್ ಉದ್ದೇಶೊಗು ಕಮ್ಮಿಡ್ 150 ಸ್ಕ್ವೇರ್ ಫೀಟ್ ಪಾರ್ಕಿಂಗ್ ಜಾಗೆಗ್ ವರ್ಸೊಡು 600 ರೂಪಾಯಿ ಪಾರ್ಕಿಂಗ್ ಟ್ಯಾಕ್ಸ್ (ಆರಂಭಿಕ ರೇಟ್) ವಸೂಲ್ ಮಲ್ಪೆರ ನಿರ್ಧಾರ ಮಲ್ದ್ಂಡ್. ವಾಣಿಜ್ಯ ಅತ್ತ್ಂಡ ಒಕ್ಕೆಲ್ ಅತ್ತಂದಿನ ಉದ್ದೇಶೊದ ಜಾಗೆಗ್ ಕಮ್ಮಿಡ್ 150 ಸ್ಕ್ವೇರ್ ಫೀಟ್ ಪಾರ್ಕಿಂಗ್ ಜಾಗೆಗ್ ವರ್ಸೊಡು 1,125 ರೂ. ಪಾರ್ಕಿಂಗ್ ಟ್ಯಾಕ್ಸ್ (ಆರಂಭಿಕ ರೇಟ್)  ಕಟ್ಟಾಯೆರ ಬಿಬಿಎಂಪಿ ನಿರ್ಧಾರ ಮಲ್ದ್ಂಡ್.

ದುಂಬು ಮಾತ ತಾರಾಮರ ಪಾರ್ಕಿಂಗ್ ಶುಲ್ಕ ಕಟ್ಟಾವೊಂದಿತ್ತೆರ್. ಕಮರ್ಷಿಯಲ್ ಇತ್ತ್ಂಡ, ಕಮರ್ಷಿಯಲ್ ಲೆಕ್ಕೊಡು ಪಾರ್ಕಿಂಗ್ ಶುಲ್ಕ ವಸೂಲಿ ಮಲ್ತೊಂದಿತ್ತೆರ್. ಒಕ್ಕೆಲ್ ಇತ್ತ್ಂಡ ಒಕ್ಕೆಲ್ ಲೆಕ್ಕೊಡು ಪಾರ್ಕಿಂಗ್ ಶುಲ್ಕೊನು ಬೋಡಾಯಿನಾತ್ ವಸೂಲಿ ಮಲ್ಪೆದೆರ್. ಆಂಡ, ಇತ್ತೆ ಪಾರ್ಕಿಂಗ್‌ಗ್ ಸ್ಕ್ವೇರ್ ಫೀಟ್ ಲೆಕ್ಕೊಡು ಪಾಲಿಕೆ ರೇಟ್ ಗೊತ್ತು ಮಲ್ದ್ಂಡ್.