Last updated on April 18th, 2025 at 09:28 am
ಉಳ್ಳಾಲ, ಏ.18: ಉಳ್ಳಾಲಡ್ ಜವನ್ದಿ ಪೊಣ್ಣನ ಮಿತ್ತ್ ಸಾಮೂಹಿಕ ಅತ್ಯಾಚಾರ ಆರೋಪ ಪ್ರಕರಣಗ್ ಸಂಬಂಧಿತ್‌ದ್ ಮುಲ್ಕಿದ ರಿಕ್ಷಾ ಡ್ರೈವರ್ ಬೊಕ್ಕ ಕುಂಪಲ ಬೊಕ್ಕ ಕುಡ್ಲದ ಇರ್ವೆರೆನ್ ಉಳ್ಳಾಲ ಪೊಲೀಸೆರ್ ಪತ್ತ್‌ದೆರ್. ಕೈದಾತಿನಕ್ಲೆನ್ ಮುಲ್ಕಿದ ರಿಕ್ಷಾ ಡ್ರೈವರ್ ಪ್ರಭುರಾಜ್ (38), ಕುಂಪಲದ ಎಲೆಕ್ಟ್ರಿಷಿಯನ್ ಮಿಥುನ್ (30) ಬೊಕ್ಕ ಕುಡ್ಲದ ಮಣಿ (30) ಪನ್ದ್ ಗುರ್ತ ಪತ್ತ್‌ದೆರ್.
ಪೊಲೀಸ್ ಮೂಲೊಲೆನ ಪ್ರಕಾರ, ಪಡ್ಡಾಯಿ ಬಂಗಾಳೊದ ಕೂಚ್ ಬೆಹಾರ್ ಮೂಲೊದ ಪೊಣ್ಣು ಕರಿನ ರಡ್ಡ್ ಮೂಜಿ ವರ್ಸೋರ್ದಿಂಚಿ ಕೇರಳದ ಪ್ಲೈವುಡ್ ಕಂಪನಿಡ್ ಬೇಲೆ ಮಲ್ತೊಂದಿತ್ತೆರ್. ಆರ್ ಏಪ್ರಿಲ್ 16 ಕ್ ತನ್ನ ಪಾಸಾಡಿ ಒರ್ಯನ ಒಟ್ಟುಗು ಬೇತೆ ಕಂಪೆನಿಡ್ ಬೇಲೆ ನಾಡೆರೆ ಕುಡ್ಲಗ್ ಬತ್ತಿತ್ತೆರ್. ಆಂಡ, ಈ ನಡುಟು ಆಯಡ ಲಡಯಿ ಆದ್, ಆಯೆ ಮೋಲೆನ ಮೊಬೈಲ್‌ನ್ ದಕ್ಕ್‌ದ್ ಹಾಲ್ ಮಲ್ತಿತ್ತೆ.
ಬೊಕ್ಕ ಆಲ್ ತನ್ನ ಫೋನ್ ರಿಪೇರಿ ಕೊರ್ಯೆರ ರಿಕ್ಷಾಡ್ ಪೋತಲ್. 5-6 ಗಂಟೆದಾತ್ ಪೊರ್ತು ಆಲ್ ರಿಕ್ಷಾ ಡ್ರೈವರ್‌‌ನ ಒಟ್ಟುಗೇ ಇತ್ತ್‌ದ್, ದೋಸ್ತಿಕತೆ ಬುಲೆದ್ಂಡ್. ಮೊಬೈಲ್ ರಿಪೇರಿದ ಕಾಸ್‌ಲಾ ಆಯೆನೇ ಕೊರ್ದಿತ್ತೆ. ಅವೆರ್ದ್ ಬೊಕ್ಕ ಆಲ್ ರಾತ್ರೆ ಪ.ಬಂಗಾಳ ಪಿದಡ್ರ ರೈಲ್ವೇ ಉಂತಡೆಗ್ ಬುಡ್ಯೆರ ರಿಕ್ಷಾ ಡ್ರೈವರ್‌ಗ್ ಪನ್ಪಲ್. ಆಂಡ ಕಂಕನಾಡಿ ರೈಲ್ವೇ ಉಂತಡೆಗ್ ಪೋವಂದೆ ರಿಕ್ಷಾ ಡ್ರೈವರ್ ಕುಡ ಇರ್ವೆರ್ ಜವನೆರೆನ್ ಲೆಪ್ಪುಡಾದ್ ಬೇತೆ ಜಾಗೆಗ್ ಲೆತೊಂದು ಪೋತೆ. ಅಲ್ಪ ಆಲೆಗ್ ಪೊರ್ಲು ಪರ್ಪಾದ್, ಆಲ್ ಮತಿ ಕಡಿದಿತ್ತ್‌ದ್ , ಮತಿ ಬತ್ತಿನೇ ಅತ್ಯಾಚಾರ ಆತಿನ ಆಲೆಗ್ ತೆರಿದ್ಂಡ್. ಇತ್ತೆ ಈ ಪ್ರಕರಣೊದ ಜಡ್ತೆ ಮಲ್ತ್‌ದ್ ಮೂವೆರೆನ್ ವಶೊಕು ಗೆತೊಂದೆರ್. ಎಚ್ಚಿನ ಜಡ್ತೆ ನಡತೊಂದುಂಡು.