Last updated on April 10th, 2025 at 03:12 pm
ಕುಡ್ಲ: ಎಲ್ಲೆ ಎಪ್ರಿಲ್ 11 ಕ್ ತುಳು ಸಿನಿಮಾ ಕ್ಷೇತ್ರೊಡು ಪ್ರೀಮಿಯರ್ ಶೋ ಡ್ ಒಂಜಿ ಕೋಟಿ ಕಲೆಕ್ಷನ್ ಮಲ್ತ್‌ದ್ ದಾಕಲೆ ಮಲ್ದಿನ ಅಸ್ತ್ರ ಪ್ರೊಡಕ್ಷನ್‌ದ, ಲಂಚುಲಾಲ್ ಕೆ. ಎಸ್. ನಿರ್ಮಾಣ ಮಲ್ದಿನ ‘ಮೀರಾ’ ಸಿನಿಮಾ ರಿಲೀಸ್ ಆವೊಂದುಂಡು.
ಮಹಿಳಾ ಪ್ರಧಾನ ಆದುಪ್ಪುನ ಈ ಸಿನಿಮಾಡ್ ಇಶಿತಾ ಶೆಟ್ಟಿ ಮೈನ್ ರೋಲ್‌ಡ್ ಬಣ್ಣ ಪೂಜಿದೆರ್. ಅಂಚೆನೇ ಅರವಿಂದ್ ಬೋಳಾರ್, ಸ್ವರಾಜ್ ಶೆಟ್ಟಿ, ಜೆ.ಪಿ. ತೂಮಿನಾಡ್, ಪ್ರಕಾಶ್ ತೂಮಿನಾಡ್, ಮಂಜು ರೈ ಮೂಳೂರು, ರೂಪಾಶ್ರೀ ವರ್ಕಾಡಿ, ಯತೀಶ್ ಪೂಜಾರಿ, ಅಶ್ವಥ್, ಬೇಬಿ ಲಕ್ಷ್ಯ ಇಂಚ ತುಳು ಸಿನಿಮಾ ರಂಗೊದ ಪಾಕ ಕಲಾವಿದೆರ್ ನಟನೆ ಮಲ್ದೆರ್.
ತುಳು ವ್ಲಾಗರ್ ರಕ್ಷಿತಾ ಶೆಟ್ಟಿ ಅಂಚೆನೇ ಬೇತೆ ಪೊಸ ಪ್ರತಿಭೆಲುಲಾ ಈ ಸಿನಿಮಾಡ್ ತೂವರೆ ತಿಕ್ಕುವೆರ್ ಪನ್ದ್ ನಿರ್ಮಾಪಕೆ ಲಂಚುಲಾಲ್ ಕೆ. ಎಸ್. ತೆರಿಪಾದೆರ್.
ತನ್ನ ಕನೊನು ನಿಜ ಮಲ್ಪುನ ಸಾದಿಡ್ ಸಮಾಜದ ಸವಾಲ್‌ಲೆಗ್ ತಿಗಲೆ ಕೊರೊಂದು ದುಂಬು ಪೋಪಿನ ಪೊಣ್ಣನ ಕಥೆ ಈ ಸಿನಿಮಾದ ಸೊತ್ತು. ಕುಡ್ಲ, ಕಟೀಲ್, ಕಾಸ್ರೋಡ್, ಸೀತಾಂಗೋಳಿ, ಕುಂಬಳೆ ಇಂಚಿನ ಜಾಗೆಲೆಡ್ ಶೂಟಿಂಗ್ ಆತಿನ ಮೀರಾ ಸಿನಿಮಾ ತುಳು ಸಿನಿಮಾ ಕ್ಷೇತ್ರೊಡು ಒಂಜಿ ಮಲ್ಲ್ ಮೈಲಿಕಲ್ಲ್ ಆವರೆಗುಂಡು ಪನ್ಡ ತಪ್ಪಾವಂದ್.
ಮೀರಾ ಸಿನಿಮಾದ ಡಿಒಪಿ ಅಜಯ್ ಕೆ.ಎಸ್., ಸಂಕಲನೊನು ಜಾಬಿನ್ಸ್‌ ಸೆಬಾಸ್ಟಿಯನ್ ಮಲ್ತಿತ್ತ್‌ದ್, ಸಂಗೀತ ಸಂಯೋಜನೆನ್ ರಜ್ಜು ಜಯಪ್ರಕಾಶ್ ಮಲ್ದೆರ್, ಜಯಪ್ರಕಾಶ್ ಕಳೇರಿ ಪದ ಬರೆತೆರ್.
ಮಲಯಾಳಂದ ಹಿಟ್ ಸಿನೆಮಾ ಸಿನೆಮಾ ‘ಭ್ರಮಯುಗಂ’ ಪುಗರ್ತೆದ ಲಿಜು ಪ್ರಭಾಕರ್ ಚಿತ್ರೊದ ಕಲರ್ ಗ್ರೇಡಿಂಗ್, ವಿಶುವಲ್ ಎಫೆಕ್ಟ್‌ಲೆನ್ ಮಲ್ದೆರ್. ಎಸ್.ಎಫ್.ಎಕ್ಸ್. ಬೊಕ್ಕ ಅಕೇರಿದ ಮಿಕ್ಸಿಂಗ್‌ನ್ ಯುನಿಟಿ ಸ್ಟುಡಿಯೋಸ್ ಮಲ್ತಿತ್ತ್‌ದ್, ಜಿತಿನ್ ಕುಂಬ್ಳೆ ಸಹಾಯಕ ನಿರ್ದೇಶಕೆರಾದುಲ್ಲೆರ್.
ಈ ಸಿನಿಮಾಡ್ 5 ಪದೊಕುಲು ಇತ್ತ್‌ದ್ ತೆನ್ಕಾಯಿ ಭಾರತೊದ ಪುಗರ್ತೆದ ಪದಪನ್ಪಿನ ಮಧುಬಾಲಕೃಷ್ಣ ಸೇರ್ದ್ ಬೇತೆ ಗಾಯಕೆರ್ ಸ್ವರ ಕೊರ್ತೆರ್. ತುಳು ಚಿತ್ರರಂಗೊಡು ಉಂದೇ ಕಡೀರ ಸರ್ತಿ A.I ತಂತ್ರಜ್ಞಾನ ಗಲಸ್‌ದ್ ಮಲ್ದಿನ ಪದಲಾ ಸಿನಿಮಾಡ್ ಉಂಡು.