Last updated on April 9th, 2025 at 09:28 am
ಕುಡ್ಲ ಎಪ್ರಿಲ್ 09: ಬೈಕ್‌ಡ್ ಮೂಜಿ ಜನ ಪೋವೊಂದುಪ್ಪುನ ಪೊರ್ತುಡು ಬೈಕ್ ಅಂಕೆ ತತ್ತ್‌ದ್ ಸಾದಿದ ಡಿವೈಡರ್‌ಗ್ ಎಡ್ತಿನೆರ್ದಾವರರ ಕೇರಳ ಮೂಲೊದ ಇರ್ವೆರ್ ವಿದ್ಯಾರ್ಥಿಲು ಜೂವ ಕಲೆಯೊಂದಿನ ನಡಕೆ ಕೋಡೆ ಕಾಂಡೆ ಕುಂಟಿಕಾನ ಬೊಕ್ಕ ಕೆಪಿಟಿ ನಡುತ ರಾಷ್ಟ್ರೀಯ ಪೆರ್ಸಾದಿ 66ಟ್ ನಡತ್‌ದ್ಂಡ್. ಎಡ್ತೆಡ್ ಕುಡೊರಿಯಗ್ ಗಾತಿದ ಗಡಿಕುಲಾತ.
ತೀರ್ದಿನ ವಿದ್ಯಾರ್ಥಿಲೆನ್ ಸಂಕೀರ್ತ್ (23) ಬೊಕ್ಕ ಧನುರ್ವೇದ್ (19) ಪನ್ದ್ ಗುರ್ತ ಪತ್ತ್‌ದೆರ್. ಕುಡೊರಿ ವಿದ್ಯಾರ್ಥಿ ಸಿಬಿ ಸ್ಯಾಮ್ (22) ಪೆಟ್ಟಾದ್ ಆಸ್ಪತ್ರೆಡುಲ್ಲೆ. ಈ ಮೂವೆರ್ ವಿದ್ಯಾರ್ಥಿಲು ಕೇರಳದಕುಲು ಪನ್ದ್ ತೆರಿದ್ ಬೈದ್ಂಡ್.
ರಾಯಲ್ ಎನ್‌ಫೀಲ್ಡ್‌ ಬೈಕ್‌ಡ್ ಈ ಮೂವೆರ್ ವಿದ್ಯಾರ್ಥಿಲು ಕುಂಟಿಕಾನರ್ದ್ ಪಂಪ್‌ವೆಲ್ ದಂಚಿ ಪೋವೊಂದಿತ್ತೆರ್. ಮೂಜಿ ಜನಲಾ ಹೆಲ್ಕೆಟ್ ಪಾಡ್ದಿಜ್ಜಂಡ್. ಬಾರೀ ಬರಸ್‌ಡ್ ಬತ್ತಿನ ಬೈಕ್ ಸೀದಾ ಡಿವೈಡರ್‌ಗ್ ಎಡ್ತ್‌ದಿತ್ತ್ಂಡ್. ಸಂಕೀರ್ತ್‌ನ ತರೆ ಡಿವೈಡರ್‌ಗ್ ಆಕ್‌ದಿತ್ತ್ಂಡ್. ಧನುರ್ವೇದ್‌ನ ತರೆ ಬರಿಟಿತ್ತಿನ ಕರೆಂಟ್ ಕುಂದೊಗು ಆಕ್‌ದಿತ್ತ್ಂಡ್. ಇರ್ವೆರೆ ತರೆಕ್‌ಲಾ ಗಾತಿದ ಪೆಟ್ಟ್ ಬೂರ್ದಿತ್ತ್ಂಡ್. ಪೆಟ್ಟಾದ್ ಬೂರ್ದಿತ್ತಿನ ಮೊಕಲೆನ್ ಪಿರವುಡು ಬೈಕ್‌ಡ್ ಬರೊಂದಿತ್ತಿನ ಪಾಸಾಡಿಲು ಆಸ್ಪತ್ರೆಗ್ ಲೆತೊಂದು ಪೋತೆರ್. ಇರ್ವೆರ್ ಆತನಗನೇ ತೀರ್ದೆರ್ ಪನ್ದ್ ಬೈದ್ಯೆರ್ ತೆರಿಪಾದೆರ್ ಪನ್ದ್ ಪೋಲೀಸ್ ಮೂಲೊಲು ತೆರಿಪಾದ.