Last updated on April 3rd, 2025 at 10:22 am
ದೆಲ್ಲಿ: ವಿರೋಧ ಪಕ್ಷೊಲೆನ ಬಾರೀ ವಿರೋಧೊದ ನಡುಟುಲಾ ನರೇಂದ್ರ ಮೋದಿಯೆರೆನ ಮುತಾಲಿಕೆದ ಎನ್‌ಡಿಎ ಸರ್ಕಾರ ಸಂಸತ್ಡ್ ಕೋಡೆ ವಕ್ಫ್ ಮಂಡಳಿ ತಿದ್ದುಪಡಿ ಮಸೂದೆನ್ (Waqf Amendment Bill) ಮಂಡನೆ ಮಲ್ದ್ಂಡ್.
ಕೇಂದ್ರ ಸಂಸದೀಯ ವೈವಾಟ್‌ಲೆನ ಸಚಿವೆ ಕಿರಣ್ ರಿಜಿಜು ಮೇರ್ ಲೋಕಸಭೆಟ್ ವಿವಾದಿತ ವಕ್ಫ್ ಮಂಡಳಿ ತಿದ್ದುಪಡಿ ಮಸೂದೆನ್ ಸದನೊಡು ಮಂಡನೆ ಮಲ್ತೆರ್. ವಿರೋಧ ಪಕ್ಷೊಲು ಗಲಾಟೆ ಮಲ್ತ್ಂಡಲಾ ಅವೆನ್ ಗೆನ್ಪಂದೆ ಕೇಂದ್ರ ಸರ್ಕಾರ ಲೋಕಸಭೆಟ್ ವಕ್ಫ್ ಕಾಯ್ದೆನ್ ಓದ್‌ದ್ಂಡ್.
ಸಂಸದೀಯ ವೈವಾಟ್‌ಲೆನ ಸಚಿವೆ ಕಿರಣ್ ರಿಜಿಜು ಬುದಾರ ಲೋಕಸಭೆಟ್ ವಕ್ಫ್ ಮಂಡಳಿ ತಿದ್ದುಪಡಿ ಮಸೂದೆ, 2024 ನ್ ಮಂಡನೆ ಮಲ್ತಿ ಬೊಕ್ಕ ಸ್ಪೀಕರ್ ಓಂ ಬಿರ್ಲಾ ಮೇರ್ ವಕ್ಫ್ ಬಿಲ್ ಮಂಡನೆ ಬಗೆಟ್ ಎಣ್ಮ ಗಂಟೆ ಕಾಲ ಚರ್ಚೆಗ್ ಅವಕಾಶ ಕೊರ್ಯೆರ್. ಬಿಲ್ ಮಂಡನೆ ಆವೊಂದಿತ್ತಿ ಲೆಕನೆ ವಿರೋಧ ಪಕ್ಷೊದಕುಲು ಲಕ್ಕ್‌ದ್ ಬೊಬ್ಬೆ ಪಾಡ್ದೆರ್. ಸಂಸತ್ಡ್ ಕೋಡೆ ಇಡೀ ದಿನ ವಕ್ಫ್ ಬಿಲ್‌ದ ಮಿತ್ತ್ ಚರ್ಚೆ ನಡತ್ಂಡ್.
ಲೋಕಸಭೆಟ್ 12 ಗಂಟೆದ ಚರ್ಚೆ ಆದ್ ವಕ್ಫ್ ತಿದ್ದುಪಡಿ ಮಸೂದೆಗ್ ಅಂಗೀಕಾರ ತಿಕ್ಕ್‌ದ್ಂಡ್. ಇನಿ ರಾಜ್ಯಸಭೆಟ್ಲಾ ಮಸೂದೆ ಮಂಡನೆ ಆವರೆ ಉಂಡು. ಮಸೂದೆದ ಪರವಾದ್ 288 ಓಟುಲು ತಿಕ್ಯಂಡ, ವಿರುದ್ಧವಾದ್ 232 ಓಟುಲು ಬತ್ತ. ಸದನ ವಿರೋಧ ಪಕ್ಷೊದ ಮಾತಾ ತಿದ್ದುಪಡಿಲೆನ್ ಧ್ವನಿ ಮತೊದ ಮುಕೇನ ತಿರಸ್ಕರಿತ್ಂಡ್. ವಿರೋಧ ಪಕ್ಷೊದ ಸಂಸದೆ ಎನ್.ಕೆ. ಪ್ರೇಮಚಂದ್ರನ್ ಮೆರೆನ ತಿದ್ದುಪಡಿ ಪ್ರಸ್ತಾವನೆದ ಮಿತ್ತ್ ನಡೀರ್ 1.15 ಕ್ ಮತದಾನ ನಡತ್ಂಡ್.