Last updated on April 21st, 2025 at 12:49 pm
ಕಟ್ಪಾಡಿ: ಎಪ್ರಿಲ್ 13ತಾನಿ ನಡತಿನ ತುಳುನಾಡ್ ಕಾನ್‌ಕ್ಲೇವ್‌ಡ್ ಪಾತೆರಿನ ತುಳುನಾಡ್ ರಕ್ಷಣಾ ವೇದಿಕೆದ ಜೆಪ್ಪು ಯೋಗೀಶ್ ಶೆಟ್ಟಿ, ಬೇತೆ ಬೇತೆ ಸಂಘಟನೆಲೆಡ್ ಬೆನ್ನಿ ಬೆನೊಂದಿಪ್ಪುನಕ್ಲೆನ್ ಒಂಜೇ ಚಾವಡಿಡ್ ಕುಲ್ಲಾವುನ ಬೇಲೆ ಮಲ್ದಿನ TCRF (R) ಸಂಘಟನೆಗ್ ಸೊಲ್ಮೆ ಸಂದಾಯೆರ್. ಇನಿ ತುಳು ಪಾತೆರ್ನಗ ಬೇತೆ ಬೇತೆ ಬಾಸೆಲು ಬೆರಕೆ ಆಪ, ನಮ್ಮ ಪಿರಿಯಕುಲು ಮಲ್ದಿನ ತಪ್ಪುನು ನಮ ತಿನೊಂದುಲ್ಲ, ನಮ ಆಂಡಲಾ ತಪ್ಪುನು ಸಮ ಮಲ್ಪುನ ಬೇಲೆ ಮಲ್ಪೊಡು ಪಂದ್ ಬಿನ್ನಯ ಮಲ್ತೆರ್. ದ್ರಾವಿಡ ಬಾಸೆಲೆಡ್ ಮೇಲಾಯಿನ ರಡ್ಡ್ ಸಾರ ವರ್ಸದ ಪರತಿರಿ ಇಪ್ಪುನ ನಮ್ಮ ಮಣ್ಣ್‌ಗ್ ರಾಜ್ಯ ದಾಂತೆ ಪೋಂಡು. ನಮ್ಮ ಸಾಹಿತಿಲೆಗ್ ಜ್ಞಾನಪೀಟ ಪುರಸ್ಕಾರ ತಿಕ್ಕೊಂದಿಜ್ಜಿ, ತುಳುವೆರ್ ಬೇತೆ ಬೇತೆ ಜಾಗೊಡು ಬೆನ್ನಿ ಬೆನೊಂದುಲ್ಲೆರ್ ಸಾಲೆ ಕಟ್ಟಾವುನೆಟ್ಟ್ ಆದಿಪ್ಪು, ಬ್ಯಾಂಕ್‌ ಕಟ್ಟುನೆಟ್ಟ್ ಇಂಚ ಮಾತೆಟ್ಲಾ ಉದಿಯ ಬೆಂದಿನ ತುಳುವೆರೆನ ತುಳುಬಾಸೆಗ್ ನನಲಾ ಮನಾದಿಗೆ ತಿಕಿದಿಜಿ ತಿಕ್ಕೊಡಾಂಡ ಅವೆಕ್ಕ್ ತುಳುವೆರ್ ಪೊರ್ಂಬಾಟ ಮಲ್ಪೊಡು. ನಮ್ಮ ಹಕ್ಕ್‌ನ್ ನಮ ಕೇನಿಜಡ ತುಳುಕ್ಕ್ ಮಾನಾದಿಗೆ ತಿಕ್ಕುಜಿ. ಬಾಲೆ ಬುಲ್ತುಂಡನೇ ಅಪ್ಪೆ ಪೇರ್ ಕೊರ್ಪುನು ಪನ್ಪಿನ ಒರಿಯಾಕ್ಲೆನ ಪಾತೆರನ್ ನೆಂಪು ಮಲ್ತೊಂಡೆರ್.
ಮಿತ್ತ ಚಾವಡಿಡ್ ನಡತಿನ ಕೋಟಿಚೆನ್ನಯ ನಾಟಕದ ಬಗ್ಗೆ ಪಾತೆರ್ದ್ ತುಳುನಾಡ್‌ದ ಏತ್ ರೈಲ್ ಉಂತಡೆಲೆಗ್ ಬೈದೆರ್ಲೆನ ಪುದರ್ ಉಂಡು? ಏತ್ ಕಡೆಟ್ ಅಬಕ್ಕನ ಪುದರ್ ಉಂಡು ಪಂದ್ ಪ್ರಶ್ನೆ ಮಲ್ತೆರ್. ತುಳುವೆರ್ ಒಗ್ಗಟ್ಟ್ ಆವೊಡು ಆಂಡ ನಮನ್ ಒಗ್ಗಟ್ಟ್ ಆರೆಗ್ ಬುಡೊಂದಿಜ್ಜೆರ್, ತುಳುನಾಡ್‌ಗ್ ಪ್ರಾದಿಕಾರ ಇಜ್ಜಿ, ಮುಲ್ಪ ಒವ್ವೆ ಹೈ ಕೋರ್ಟ್ ಪೀಠ ಇಜ್ಜಿ, ದಾಯೆಗ್ ಆಪುಜಿ ಅಂದ್ ಪ್ರಶ್ನೆ ಮಲ್ತೆರ್. ನಮನ್ ಒಗ್ಗಟ್ಟ್ ಆರೆಗ್ ಬುಡಂದಿನ ಶಕ್ತಿಲು ನಮ್ಮ ದೈವಾರಾಧನೆನ್ ಮೂಡನಂಬಿಕೆ ಪಂದ್ ಪಂಡೆರ್, ಕಂಬುಲನ್ ಉಂತಾರೆಗ್ ತೂಯೆರ್ ಪಂದ್ ದೂರಿಯೆರ್. ಮೈತಿಲಿದಂಚಿನ ಇಲ್ಯ ಇಲ್ಯ ಬಾಸೆಲೆಗ್ ಮಾನಾದಿಗೆ ತಿಕ್‌ದಿನ ಬಗೆಟ್ ಪಾತೆರಿಯೆರ್. ತುಳುತ ಬಗೆಟ್ ತೆಟ್ಟ್ ಪಾತೆರುನ ರಾಜಕಾರಣಿಲೆಗ್ ಕಪ್ಪು ಕೊಡಿನ್ ತೋಜಾಗ, ಎಡ್ಡೆ ಪಾತೆರಿನಕ್ಲೆಗ್ ಎಡ್ಡೆಪ್ಪು ಬಯಕ್‌ಗ ಪಂದ್ ಪಂಡೆರ್.