Last updated on May 29th, 2025 at 07:17 pm
ಕಾರ್ಲ, ಮೇ. 29: 2 ದಿನೊತ ಪುರುಬಾಲೆನ್ ಕಾಸ್‌ಗ್ ಮಾರ್ದಿನ ಪ್ರಕರಣೊನು ಚಿಕ್ಕಮಗಳೂರು ಪೊಲೀಸೆರ್ ನಾಡ್ ಪತ್ತ್‌ದಿತ್ತ್‌ದ್, ಪ್ರಕರಣೊಗು ಸಂಬಂಧಿತ್‌ದ್ ಮೂವೆರೆ ಮಿತ್ತ್ ಕೇಸ್ ದಾಕಲಾತ್ಂಡ್, ಇರ್ವೆರ್ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ದೆರ್.
ಒಂಜಿ ಲಕ್ಷ ರೂಪಾಯಿ ಕಾಸ್‌ದಾಸೆಗ್ 2 ದಿನೊತ ಪುರುಬಾಲೆನ್ ಚಿಕ್ಕಮಗಳೂರುದ ಎನ್‌‌ಆರ್‌‌ಪುರ ರ್ದ್ ಕಾರ್ಲದ ದಂಪತಿಲೆಗ್ ಮಾರ್ದಿನ ಪ್ರಕರಣ ಬೊಲ್ಪುಗು ಬೈದಿತ್ತ್ಂಡ್. ಈ ಪ್ರಕರಣೊಡು ಪಾಲ್‌ಪಡೆತಿನ ಬಾಲೆದ ಅಪ್ಪೆ ರತ್ನ, ಅಮ್ಮೆ ಸದಾನಂದೆ ಬೊಕ್ಕ ಆರೋಗ್ಯ ಇಲಾಖೆದ ರಿಟೈರ್ಡ್ ನರ್ಸ್ ಕುಸುಮಾ ಮೊಕ್ಲೆನ ಮಿತ್ತ್ ಕೇಸ್ ದಾಕಲಾತ್ಂಡ್. ಜೋಕುಲಿಜ್ಜಂದೆ ಬೆಸರ್‌ಡಿತ್ತಿನ ಕಾರ್ಲದ ರಾಘವೇಂದ್ರೆ ಪನ್ಪಿನಾರೆಗ್ 2 ದಿನೊತ ಪೊಣ್ಣು ಬಾಲೆನ್ ಮಾರ್ದಿತ್ತೆರ್.
ಎನ್‌‌ಆರ್‌‌ಪುರದ ದಂಪತಿಲೆಗ್ 1 ಲಕ್ಷ ಕಾಸ್ ಕೊರ್ಪುನು ಪನ್ದ್ ದುಂಬೇ ಪಾತೆರ ಆದಿತ್ತ್ಂಡ್. ಉಂದಾಯಿ ಬೊಕ್ಕ ಬಾಲೆ ಪುಟ್ಟಿನ ಕಾಲಿ ರಡ್ಡೇ ದಿನೊಟು ದಂಪತಿಗಲೆಗ್ 5 ಸಾರ ಅಡ್ವಾನ್ಸ್ ಕಾಸ್ ಕೊರ್ದು ಬಾಲೆನ್ ರಾಘವೇಂದ್ರೆರೆಗ್ ಒಪ್ಯಾದಿತ್ತೆರ್. ಬಾಲೆದ ಆರೋಗ್ಯ ವಿಚಾರಿಪೆರ ಆಶಾ ಕಾರ್ಯಕರ್ತೆದಿ ದಂಪತಿಲೆನ ಇಲ್ಲಗ್ ಬನ್ನಗ ಆ ಇಲ್ಲಡ್ ಬಾಲೆ ಇಜ್ಜಂದಿನ ವಿಚಾರ ತೆರಿದ್ ಬೈದ್ಂಡ್. ಅಪಗನೇ ಈ ಬಗೆಟ್ ಆಶಾ ಕಾರ್ಯಕರ್ತೆದಿ ಕರ್ತವ್ಯ ನಿಷ್ಠೆ ತೂಪಾದ್ ಇಲಾಖೆದ ಅಧಿಕಾರಿಲೆನ ಗುಮನೊಗು ಕನತ್‌ದೆರ್.
ಶಿಶು ಅಭಿವೃದ್ಧಿ ಯೋಜನಾಧಿಕಾರಿ ಬೊಕ್ಕ ಜೋಕುಲೆ ರಕ್ಷಣಾ ಘಟಕೊದ ಅಧಿಕಾರಿಲು ಇಲ್ಲಗ್ ಬತ್ತ್‌ದ್ ರತ್ನ-ಸದಾನಂದ ದಂಪತಿಲೆನ್ ವಿಚಾರಿಪುನಗ ಬಾಲೆನ್ ಕಾರ್ಲಗ್ ಮಾರ್ದಿನ ವಿಚಾರ ತೆರಿದ್ ಬೈದ್ಂಡ್. ಅಪಗನೇ ಸಿಡಿಪಿಓ ಬೊಕ್ಕ ಜೋಕುಲೆ ರಕ್ಷಣಾ ಘಟಕೊದ ಅಧಿಕಾರಿಲು ಕಾರ್ಲಗ್ ಬತ್ತ್‌ದ್ ರಾಘವೇಂದ್ರ ದಂಪತಿಲೆಡ ಇತ್ತಿನ ಪೊಣ್ಣು ಬಾಲೆನ್ ವಶೊಕು ಗೆತೊಂದೆರ್.
ಜೋಕುಲಿಜ್ಜಂದಿನ ದಂಪತಿ ಬಾಲೆ ಬೋಡು ಪನ್ಪಿನ ಸಹಜ ಅಂಗಲ್ಪುಡು ಕಾನೂನುದ ಗೇನದಾಂತೆ ನೇಮೊಗು ತತ್ತ್‌ದ್ ಬಾಲೆನ್ ಗೆತೊಂದು ಸಾಂಕ್ಯೆರ ಪಿದಡ್ದಿತ್ತೆರ್. ಆಂಡ ಕಾನೂನು ಪ್ರಕಾರ ದತ್ತು ಗೆತೊನುನ ಅವಕಾಶ ಇತ್ತ್ಂಡಲಾ ಉಂದೆನ್ ಪಾಲಿಪಂದಿನೆರ್ದಾವರ ಅಧಿಕಾರಿಲು ಮಾನವ ಕಳ್ಳ ಸಾಗಣೆದ ಪ್ರಕರಣ ದಾಕಲ್ತೊಂದೆರ್.