Last updated on May 3rd, 2025 at 05:14 pm
ಕುಡ್ಲ ಮೇ 03: ಬಜ್ಪೆ ಕಿನ್ನಿಪದವುಡು ಹಿಂದೂ ಕಾರ್ಯಕರ್ತೆ ಸುಹಾಸ್ ಶೆಟ್ಟಿನ್ ಕೆರ್ತಿನ ಪ್ರಕರಣೊಡು ಪೊಲೀಸೆರ್ 8 ಜನ ಆರೋಪಿಲೆನ್ ಅರೆಸ್ಟ್ ಮಲ್ತ್‌ದೆರ್. ಕೈದಾತಿನಕಲೆನ್ ಅಬ್ದುಲ್ ಸಫ್ವಾನ್, ನಿಯಾಜ್, ಮೊಹಮ್ಮದ್ ಮುಝಮಿಲ್, ಕಲಂದರ್ ಶಾಫಿ, ರಂಜಿತ್, ನಾಗರಾಜ್, ಮೊಹಮ್ಮದ್ ರಿಝ್ವಾನ್ ಬೊಕ್ಕ ಆದಿಲ್ ಮೆಹರೂಫ್ ಪನ್ದ್ ಗುರ್ತ ಪತ್ತ್‌ದೆರ್.
ಸುದ್ದಿಗೋಷ್ಠಿಡ್ ಒಲವು ಕೊರ್ನ ನಗರ ಪೊಲೀಸ್ ಕಮೀಷನರ್ ಅನುಪಮ್ ಅಗರ್ವಾಲ್ ಸುಹಾಸ್ ಶೆಟ್ಟಿನ್ ಕೆರ್ತಿನ ಪ್ರಕರಣೊಡು 8 ಆರೋಪಿಲೆನ್ ಪತ್ತ್‌ದ. ಸಫ್ವಾನ್ ಪ್ರಮುಖ ಆರೋಪಿ. 2023ಟ್ ಅಬ್ದುಲ್ ಸಫ್ವಾನ್‌ಗ್ ಸೈಪುಲೆಕ ಆಕ್‌ದಿತ್ತೆರ್, ಆಂಡ ಬದ್‌ಕ್‌ದ್ ಒರಿದಿತ್ತೆ. ಸಫ್ವಾನ್‌ಗ್ ಸುಹಾಸ್ ಶೆಟ್ಟಿ ಕೆರ್ಪೆ ಪನ್ಪಿನ ಪೋಡಿಗೆಲಾ ಇತ್ತ್ಂಡ್. ಅಂಚಾದ್ ಸುಹಾಸ್ ಶೆಟ್ಟಿನ್ ಕೆರ್ಯೆರ ಪ್ಲಾನ್ ಮಲ್ತಿತ್ತೆ. ಐಕ್ ಬೋಡಾದ್ ಫಾಜಿಲ್‌ನ ಮೆಗ್ಯನ್ ಪತೊಂದು ಸುಹಾಸ್‌ನ್ ಕೆರ್ಯೆರ ತೀರ್ಮಾನ ಮಲ್ತ್‌ದ ಪನ್ದ್ ಕೈದಾತಿನಕುಲು ಪನ್ಡೊಂನ್ದೆರ್.
ಸುಹಾಸ್‌ನ್ ಕೆರ್ಯೆರ ಸಫ್ವಾನ್‌ನ ಕೂಟೊಗು ಆದಿಲ್ 5 ಲಕ್ಷ ರೂ. ಫಂಡಿಂಗ್ ಮಲ್ತಿತ್ತೆ. ನಿಯಾಜ್‌ನ ಗಟ್ಟದ ದೋಸ್ತಿಲಾಯಿನ ನಾಗರಾಜ್ ಬೊಕ್ಕ ರಂಜಿತ್‌ನ್ ಸಂಪರ್ಕ ಮಲ್ಪುವೆರ್. ಈ ಇರ್ವೆರ್ ಗಟ್ಟದಕುಲು ಸಫ್ವಾನ್‌ನ ಇಲ್ಲಡ್ ರಡ್ಡ್ ದಿನ ಇತ್ತೆರ್. ಮೇ 1ತಾನಿ ಸುಹಾಸ್ ಪೋಪುನ ಬರ್ಪುನೆನ್ ಮಾತಾ ತೂದು ಕೆರ್ತೆರ್ ಪನ್ದ್ ಅನುಪಮ್ ಅಗರ್ವಾಲ್ ತೆರಿಪಾಯೆರ್. ಈ ಪ್ರಕರಣೊನು ರಿವೇಂಜ್ ಮರ್ಡರ್ ಪನ್ದ್ ಇತ್ತೆನೇ ಪನ್ಯೆರ ಸಾಧ್ಯ ಇಜ್ಜಿ ಪನ್ದ್ ಪನ್ಡಿನ ಪೊಲೀಸ್ ಆಯುಕ್ತೆರ್, ಸಫ್ವಾನ್‌ಗ್ಲಾ ಸುಹಾಸ್‌ನ ಕೈಟ್ ಸೈಪುನ ಪೋಡಿಗೆ ಇತ್ತ್ಂಡ್, ಅಂಚಾದ್ ಆದಿಲ್‌ನ ಕಾಂಟಾಕ್ಟ್ ಮಲ್ತ್‌ದ್ ಕೆರ್ತೆರ್ ಪನ್ದ್ ಪನ್ಡೆರ್.
ಸುಹಾಸ್ ಶೆಟ್ಟಿನ್ ಕೆರ್ಯೆರ ಬುರ್ಖಾ ಪಾಡೊಂದಿನ ಪೊಂಜೊವು ಒರ್ತಿ ಸಕಾಯ ಮಲ್ದಿನ ಬಗೆಟ್ ಕೇನ್ಡಿನ ಪ್ರಶ್ನೆಗ್ ಆ ಪೊಂಜೊವು ಕೊಲೆ ಆರೋಪಿ ನಿಯಾಜ್‌ನ ಬಿನ್ನೆದಿ, ಒವ್ವಾ ಬೇಲೆಗ್ ಆ ಪೊಂಜೊವು ಅಡೆ ಬತ್ತಿತ್ತಲ್ ಪನ್ದ್ ಪನ್ದಿತ್ತ್‌ದ್, ವಶೊಕು ಗೆತೊಂದು ವಿಚಾರಣೆ ಮಲ್ತೊಂದುಲ್ಲ ಪನ್ದ್ ಪನ್ಡೆರ್. ಈ ಆರೋಪಿಲು ಪಿಎಫ್ಐ ಕಾರ್ಯಕರ್ತೆರ್ ಅಂದಾ ಅತ್ತಾ ಪನ್ಪಿನ ಒಲವು ಇತ್ತೆಗ್ ಇಜ್ಜಿ, ಅಕ್ಲೆನ ಸೋಷಿಯಲ್ ಮಿಡಿಯಾ ಜಡ್ತೆ ಮಲ್ತೊಂದುಲ್ಲ ಪನ್ದ್ ಪನ್ಡೆರ್.
ನನಲಾ ರಡ್ಡ್ ಜನ ಆರೋಪಿಲು ದಸ್ತಗಿರಿ ಆಯೆರ ಬಾಕಿ ಉಂಡು. ಉಂದೆಕ್ ದುಂಬು ರಡ್ಡ್ ಸರ್ತಿ ಕೆರ್ಪುನ ಪುನೆಪು ನಡತ್‌ದ್ಂಡ್ ಆಂಡ ದಾಲ ಮಲ್ಪೆಲಾದಿಜ್ಜಂಡ್ ಪನ್ದ್ ಪನ್ಡೆರ್.
ಹಿಂದೂ ಕಾರ್ಯಕರ್ತೆ ಸುಹಾಸ್ ಶೆಟ್ಟಿನ್ ಕೆರ್ತಿನಕಲೆನ ಒಲವು
1)ಅಬ್ದುಲ್ ಸಫ್ವಾನ್ ( 29) ಇತ್ತೆ ಇಪ್ಪುನು : ಇಸ್ಮಾಯಿಲ್ ಇಂಜಿನಿಯರ್‌ನ ಬಾಡಾಯಿದ ಇಲ್ಲಡ್ ಮಾಂಕಾಳಿ ದೇಲಂತಡೆ ಸಾದಿ ಬಜ್ಪೆ ಕಿನ್ನಿಪದವು ಕುಡ್ಲ
ಬೇಲೆ : ಡ್ರೈವರ್
2) ನಿಯಾಜ್ (28)
ಇತ್ತೆ ಇಪ್ಪುನು : ಶಾಂತಿಗುಡ್ಡೆ ಪಲ್ಲಿದ ಕೈತಲ್ ಬಜ್ಪೆ ಕುಡ್ಲ
ಮಾಂಕಾಳಿ ದೇಲಂತಡೆದ ಕೈತಲ್ ಮಾಮು ಖಲಂದರ್ ಕಿನ್ನಿಪದವು ಬಜ್ಪೆ
ಬೇಲೆ : ಮೇಸ್ತ್ರಿ ಹೆಲ್ಪರ್
3) ಮೊಹಮ್ಮದ್ ಮುಝಮಿಲ್ (32)
ಇತ್ತೆ ಇಪ್ಪುನು: 313 ಅಪಾರ್ಟ್ಮೆಂಟ್ ಫ್ಲಾಟ್ ನಂಬರ್ 605 ಏರ್ಪೋರ್ಟ್ ರೋಡ್ ಕೆಂಜಾರ್ ಬಜ್ಪೆ ಕುಡ್ಲ.
ಬೇಲೆ : 4 ತಿಂಗಲು ದುಂಬು ಸೌದಿ ಅರೇಬಿಯಾಡ್ ಸೇಲ್ಸ್ ಮ್ಯಾನ್ ಆದ್ ಬೆನೊಂದಿತ್ತೆ. ಇತ್ತೆ ಊರ್‌ಗ್ ಬತ್ತ್‌ದ್ 04 ತಿಂಗೊಲು ದುಂಬು ಮದಿಮೆ ಆತೆ. ಉಂಬ್ಯನ ಮಿತ್ತ್ ಪಣಂಬೂರು ಸ್ಟೇಶನ್ ಆ. ಕ್ರ 214/ 2016 ಕಲಂ 392 IPC ದ ಪ್ರಕಾರ ಪ್ರಕರಣ ದಾಕಲಾದುಂಡು.
4)ಕಲಂದರ್ ಶಾಫಿ (31) ಇಪ್ಪುನು : 1-163/1 ಕುರ್ಸು ಗುಡ್ಡೆ ಕಳವಾರು ಕಳವಾರು ಕುಡ್ಲ
ಬೇಲೆ: ಸೇಲ್ಸ್ ಮ್ಯಾನ್ ಬೆಂಗಳೂರು, ಉಂಬ್ಯನ ಮಿತ್ತ್ ತೊರತ್ತಲ್ ಸ್ಟೇಶನ್ ಆ. ಕ್ರ 112/2023 ಕಲಂ 8(c) 20(b) ii (a) ndps act 1985 ದ ಪ್ರಕಾರ ಪ್ರಕರಣ ದಾಕಲಾದುಂಡು.
5) ರಂಜಿತ್ (19)
ಇಪ್ಪುನು: ರುದ್ರ ಪಾದ ಕಳಸ ತಾಲೂಕು ಚಿಕ್ಕಮಂಗಳೂರು ಜಿಲ್ಲೆ.
ಬೇಲೆ: ಡ್ರೈವಿಂಗ್
ಲಾಂಗ್‌ನ್ ಸ್ವಿಫ್ಟ್ ಕಾರ್‌ರ್ದ್ ದೆತ್ತ್‌ದ್ ಕಡ್ಪುನಾಯಗ್ ಕೊರ್ತೆ.
6) ನಾಗರಾಜ್ (20)
ಇಪ್ಪುನು: ಕಳಸ ಕೋಟೆ ಹೊಳೆ ಮಾವಿನಕೆರೆ ಗ್ರಾಮ ಚಿಕ್ಕಮಂಗಳೂರು ಜಿಲ್ಲೆ
ಬೇಲೆ: ಶಾಮಿಯಾನ ಅಂಗಡಿಡ್
7) ಮೊಹಮ್ಮದ್ ರಿಜ್ವಾನ್ (28)
ಇಪ್ಪುನು: ಈದ್ಗಾ ಪಲ್ಲಿದ ಕೈತಲ್ ಬಿ. ಎಂ. ಟಿ ಫ್ಲಾಟ್ ನಂಬರ್ 203 ಜೋಕಟ್ಟೆ ಕುಡ್ಲ.
ಬೇಲೆ: ಸೌದಿ ಅರೇಬಿಯಾ ಆಯಿಲ್ ಪ್ಲಾಂಟ್ ಶಟ್ ಡೌನ್
8) ಅದಿಲ್ ಮೆಹರೂಫ್: ಫಾಜಿಲ್‌ನ ಮೆಗ್ಯೆ, ಈ ಕೆರ್ಪಟಿಗೆಗ್ 5 ಲಕ್ಷ ಫಂಡಿಂಗ್ ಮಲ್ತ್‌ದೆ.