Last updated on May 27th, 2025 at 01:24 pm
ಅಮೃತಸರ, ಮೇ. 27: ಪಂಜಾಬ್‌ದ ಅಮೃತ್‌ಸರೊಡು ಆಂಜೊವು ಒಲಿ ಬಾಂಬ್ ದೀವೊಂದುಪ್ಪುನಗ ಬಾಂಬ್ ಪುಡದ್, ತೀರ್‌ದೆ ಪನ್ದ್ ವರದಿ ಆತ್ಂಡ್. ಮಜಿತಾ ಸಾದಿ ಬೈಪಾಸ್‌ಡುಪ್ಪುನ ಡಿಸೆಂಟ್ ಅವೆನ್ಯೂದ ಪಿದಯಿ ನಡತಿನ ಸ್ಫೋಟಡ್ ಗಡಿಕುಲಾದಿತ್ತಿನಾಯನ್ ಆಸ್ಪತ್ರೆಗ್ ದಾಕಲ್ತ್‌ದಿತ್ತೆರ್. ಬಾಂಬ್ ದೀಯೆರ ತೂವೊಂದುಪ್ಪುನಗ ಆರೋಪಿನ ಕೈಟೇ ಬಾಂಬ್ ಪುಡದ್ಂಡ್ ಪನ್ದ್ ವರದಿಲು ತೆರಿಪಾದ.
ಒಲವು ತಿಕ್ಕಿನೇ ಪೊಲೀಸೆರ್ ಜಾಗೆಗ್ ಬತ್ತ್‌ದ್ ಪೆಟ್ಟಾತಿನಕಲೆನ್ ಆಸ್ಪತ್ರೆಗ್ ದಾಕಲ್ತ್‌ದೆರ್. ಅಕಲೆಗ್ ಇತ್ತೆ ಮರ್ದ್ ನಡತೊಂದುಂಡು. ಸ್ಫೋಟದ ನೆವನ ತೆರಿಯೆರೆ ಜಡ್ತೆ ಸುರು ಮಲ್ತ್‌ದೆರ್. ಇತ್ತೆ ಅಲ್ಪದಕುಲು ಪೋಡಿಗೆಡ್ ಉಲ್ಲೆರ್.
ಸ್ಫೋಟಕೊಲೆನ ಸೊತ್ತುಲೆನ್ ವಶಮಲ್ತೊನುನ ಪೊರ್ತುಡು ಪುಡದುಪ್ಪು ಪನ್ದ್ ಪೋಲೀಸೆರ್ ಅಂದಾಜಿ ಮಲ್ತ್‌ದೆರ್. ಸ್ಫೋಟಡ್ ಗಡಿಕುಲಾತಿನಾಯಗ್ ಒವ್ವಾಂಡಲಾ ಭಯೋತ್ಪಾದಕ ಸಂಘಟನೆದ ಒಟ್ಟುಗು ಸಂಬಂಧ ಇಪ್ಪು ಪನ್ದ್ ಎಸ್‌ಎಸ್‌ಪಿ ಮಣಿಂದರ್ ಸಿಂಗ್ ತೆರಿಪಾದೆರ್.