Last updated on May 27th, 2025 at 09:06 am
ಕಡಬ, ಮೇ 27: ಉಬಾರ್-ಸುಬ್ರಹ್ಮಣ್ಯ ರಾಜ್ಯ ಪೆರ್ಸಾದಿದ ಕಡಬ ಪರಸ್ಟೇಶನ್ ಕೈತಲ್ ಕೆಎಸ್‌ಆರ್‌ಟಿಸಿ ಬಸ್ ಬೈಕ್‌ಗ್ ಎಡ್ತಿನೆರ್ದಾವರ ಬೈಕ್ ಬುಡೊಂದಿತ್ತಿನ ಜವನೆ ತೀರ್ದಿನ ನಡಕೆ ಕೋಡೆ, ಸೋಮಾರ ಬಯ್ಯಡ್ ನಡತ್‌ದ್ಂಡ್.
ತೀರ್ದಿನ ಜವನನ್ ಕಡಬ ಕೋಡಿಂಬಾಳ ಗ್ರಾಮೊದ ಉದೇರಿದ ಕರಿದ್‌ಪೋತಿನ ಶ್ರೀಧರ ಗೌಡ ಪನ್ಪಿನಾರೆನ ಮಗೆ ಬಿಶ್ವಜಿತ್ (23) ಪನ್ದ್ ಗುರ್ತ ಪತ್ತ್‌ದೆರ್.
ಬಿಶ್ವಜಿತ್ ಮರ್ದಾಳದ ಪಾಲೆತಡ್ಕಡ್ ಫ್ಯಾಬ್ರಿಕೇಶನ್ ಬೇಲೆ ಮಲ್ತೊಂದಿತ್ತ್‌ದ್, ಏಪೊಲ್ದಲೆಕ ಬೇಲೆ ಮುಗಿತ್‌ದ್ ಪಿರ ಇಲ್ಲಗ್ ಬರೊಂದುಪ್ಪುನಗ ಪರಸ್ಟೇಶನ್‌ದ ಕೈತಲ್ ಸುಬ್ರಹ್ಮಣ್ಯ ದಂಚಿ ಪೋವೋಂದಿತ್ತಿನ ಕೆಎಸ್‌ಆರ್‌ಟಿಸಿ ಬಸ್ ಓಮ್ನಿ ಕಾರ್‌ನ್ ಓವರ್‌ಟೇಕ್ ಮಲ್ಪುನ ಬರಸ್‌ಡ್ ಎದುರುರ್ದ್ ಬಿಶ್ವಜಿತ್ ಬುಡೊಂದು ಬರೊಂದಿತ್ತಿನ ಬೈಕ್‌ಗ್ ಎಡ್ತ್‌ದ್ಂಡ್.
ಎಡ್ತೆಡ್ ಗಾತಿದ ಗಡಿಕುಲಾದಿತ್ತಿನ ಬಿಶ್ವಜಿತ್‌ನ್ ಕಡಬದ ಆಸ್ಪತ್ರೆಗ್ ಲೆತೊಂದು ಪೋಪಿನ ಸಾದಿದ ನಡುಟೇ ತೀರ್ದೆರ್. ಓಮ್ನಿ ಕಾರ್‌ಗ್ಲಾ ಪೆಟ್ಟಾತ್ಂಡ್. ಜಾಗೆಗ್ ಕಡಬ ಪೋಲೀಸೆರ್ ಬತ್ತ್‌ದ್ ಪರಿಶೀಲನೆ ಮಲ್ತ್‌ದ್ ಪ್ರಕರಣ ದಾಕಲ್ತೊಂದೆರ್.