Last updated on May 1st, 2025 at 08:29 am
ನಮ ತುಳುವೆರೆಗ್ ಪೊಸ ವರ್ಸ ಸುರು ಆಪಿನ ಪಗ್ಗು ಡ್, ಈ ಪಗ್ಗುಡ್ 18 ಪೋಪಿನಾನಿ ತುಳುವೆರೆಗ್ ಬಾರೀ ಎಡ್ಡೆ ದಿನ.
ಇನಿ, ಮೇ 1 ತಾರೀಕ್ – ಪಗ್ಗು 18. ತುಳುವೆರೆಗ್ ಐಸಿರಿ ದಿಂಜುನ ದಿನ. ಒವ್ವೇ ಎಡ್ಡೆ ಕಜ್ಜೊನು ಮೂರ್ತ ತೂವಂದೆ ಮಲ್ಪುನ ದಿನ. ಉಂದೆನ್ ಸಿರಿದಿನ ಪಂದ್‌ಲಾ ಪನ್ಪೆರ್.
ತುಳುನಾಡ್ದ ಜಾಂಬವ ಸಂಧಿದ ಪ್ರಕಾರ ಜಾಂಬವೆ ಪನ್ಪಿನಾರ್ ನಾಗಲೋಕೊರ್ದ್ ಅರಿ-ಬಾರ್ ಕನತ್ ಬಿತ್ತಿನ ದಿನ ಪಗ್ಗುಡ್ 18 ಪೋಪಿನಾನಿ, ಅಂಚನೆ ನಮ್ಮ ಏಳ್ವೆರ್ ಸಿರಿಕ್ಲೆಡ್ ಅಬ್ಬಗೆ ದಾರಗೆ ಪುಟ್ಟಿನ ದಿನಲಾ ಅಂದ್‌ಗೆ. ಒಟ್ಟುಡು ತುಳುನಾಡ್‍ಗ್ ಸಿರಿ ಸಂಪತ್ ದಿಂಜಾದ್ ಮರಿಯಾಲೊನು ಎದ್ಕೊಂದು ಪುಡಮಿಗ್ ಮಾರಿ ಸಿರ್ಕ್ ಸಂಕಡೊಲು ಬರಂದಿಲೆಕ್ಕ ಪುಡ್ಯಾಡುನ ದಿನ.
ತುಳುನಾಡ್ದ ಸಮೃದ್ಧವಾಯಿನ ಕೃಷಿ ಸಂಸ್ಕೃತಿದ ಪ್ರತೀಕ ಆದುಂಡು. ಮಾದಿರ ಪದೊಕುಲೆಡ್ ನಮಕ್ ಪಗ್ಗು 18 ದ ಪಾಕ ಉಲ್ಲೇಖೊಲು ತಿಕ್ಕುವ. ಬಿಸುತಾನಿ ಕಂಡೊಡು ಕೈಬಿತ್ತ್ ಪಾಡುವೆರ್, ಉಂದು ಸಾಂಕೇತಿಕವಾದ್ ಬೆನ್ನಿದ ಬೇಲೆ ಸುರು ಆಪಿನಾಂಡಲಾ, ಪೂರ್ಣ ಪ್ರಮಾಣೊಡು ಬಿತ್ತ್ ಪಾಡುನ ಪಗ್ಗು 18ದಾನಿ. ಈ ದಿನತಾನಿ ಬಿತ್ತ್ ಪಾಡ್ಂಡ ಬುಲೆಸಲೆ ಎಡ್ಡೇಡ್ ಬರ್ಪುಂಡು ದಾಲ ಗಂಟ್ ಬರ್ಪುಜಿ ಪನ್ಪಿನ ತುಳುವೆರೆನ ನಂಬೊಲಿಗೆ.