Last updated on May 13th, 2025 at 11:15 am
ಬೊಲ್ತೇರ್, ಮೇ 13: ನಿದ್ರೆ ಮಾತ್ರೆ ತಿನ್ದ್‌ದ್ ಅಪ್ಪೆ ಮಗೆ ಆತ್ಮಹತ್ಯೆ ಮಲ್ತೊನರೆ ತೂತಿನ ನಡಕೆ ಸೋಮಾರ ನಡತಿತ್ತ್‌ದ್, ಪ್ರಾಯೊದ ಅಪ್ಪೆ ತೀರ್ದ್ ಮಗಕ್ ಸೀರಿಯಸ್ ಸ್ಥಿತಿಟ್ ಆಸ್ಪತ್ರೆಡ್ ಮರ್ದ್ ನಡತೊಂದುಂಡುಂಡು.
ತೀರ್ದಿನಾರೆನ್ ಮುಂಡಾಜೆ ಗ್ರಾಮದ ಕೂಳೂರು ನಿವಾಸಿ ಕಲ್ಯಾಣಿ (96) ಪನ್ದ್ ಗುರ್ತ ಪತ್ತ್‌ದೆರ್, ಆರೆನ ಮಗೆ ಜನಪದ ಕಲಾವಿದೆ, ಶಿಕ್ಷಕೆ ಜಯರಾಂ ಕೆ. (58) ಮೇರ್ ಸೀರಿಯಸ್ ಸ್ಥಿತಿಟ್ ಕುಡ್ಲದ ವೆನ್ಲಾಕ್‌ ಜಿಲ್ಲಾ ಆಸ್ಪತ್ರೆಡ್ ಉಲ್ಲೆರ್.
ಕಲ್ಯಾಣಿ ಬೊಕ್ಕ ಜಯರಾಂ ಮೊಕುಲು ಕೂಳೂರ್‌ದ ಇಲ್ಲಡ್ ಇತ್ತ್‌ದ್, ಇಲ್ಲರ್ದ್ ಏರ್ಲಾ ಪಿದಯಿ ಬರಂದಿನೆರ್ದಾವರ ಪೋದು ತೂನಗ ಅಪ್ಪೆ ಬೊಕ್ಕ ಮಗೆ ದೇಬೆರೆ ಅದೆತ ಎದುರು ಮತಿ ತತ್ತಿನ ಸ್ಥಿತಿಟ್ ತಿಕ್ಕ್‌ದೆರ್. ಅಪಗನೇ ಇರ್ವೆರೆನ್ ಆಸ್ಪತ್ರೆಗ್ ದಾಕಲ್ತ್‌ದೆರ್. ಆಂಡ ಐಸಿಯು ಡ್ ಇತ್ತಿನ ಅಪ್ಪೆ ಕಲ್ಯಾಣಿ ಮೇ 12ತಾನಿ ಬಯ್ಯಡ್ ತೀರ್ದೆರ್. ಮಗೆ ಜಯರಾಂ ಮೇರೆನ ಆರೋಗ್ಯ ಸ್ಥಿತಿ ಬೊಕಲಾ ತೆಟ್ಟೊಂದು ಬತ್ತಿತ್ತ್‌ದ್ ಆರೆನ್ ಕುಡ್ಲದ ಆಸ್ಪತ್ರೆಗ್ ದಾಕಲ್ತ್‌ದೆರ್.
ಅಪ್ಪೆ ಜೆತ್ತಿ ಜಾಗೆಡ್ ಜಯರಾಂ ಬರೆತಿನ ನಾಲ್ ಪೇಜ್‌ದ ಓಲೆ ತಿಕ್ಕ್‌ದಿತ್ತ್‌ದ್ ಅವೆಟ್ ಕಡತ ಸಮಸ್ಯೆ, ತನ್ನ ಅನಾರೋಗ್ಯೊರ್ದಾವರ ಎಂಕ್ಲ ನಿದ್ರೆ ಮಾತ್ರೆ ಗೆತೊಂದ. ಎಔಕ್ಲೆನ್ ಬದ್‌ಕಾವೊರ್ಚಿ ಪನ್ದ್ ಬರೆತೆರ್. ಅಪ್ಪೆ ಕರಿನ ನಾಲ್ ವರ್ಸೊರ್ದಿಂಚಿ ವಯೋ ಸಹಜ ಅನಾರೋಗ್ಯರ್ದ್ ಜೆತ್ತಿನಲ್ಪನೆ ಆದಿತ್ತ್‌ದ್, ಆರೆನ್ ಮಗನೇ ತೂವೊಂದಿತ್ತೆರ್. ಅಂಚಾದ್ ತಾನ್ ಸೈತ್ಂಡ ಅಪ್ಪೆನ್ ಏರ್ ತೂವೊನುವೆರ್ ಪನ್ಡ್‌ದ್ ಇರ್ವೆರ್ಲಾ ಒಟ್ಟುಗು ಸಯ್ಯೊಂದುಲ್ಲ ಪನ್ದ್ ಬರೆತೆರ್.
ಜಯರಾಂ ಮೇರ್ ಕಲಾವಿದೆ ಆದ್, ನಾಟಕ ರಚನೆಕಾರೆ ಆದ್, ಜಾನಪದ ಕಲಾರಾಧಕೆರಾದ್, ಚಿತ್ರಕಲಾ ಶಿಕ್ಷಕೆರಾದ್ ರಾಜ್ಯಮಟ್ಟೊದ ಪಾಕ ಪ್ರಶಸ್ತಿ ಗೆಂದ್‌ದೆರ್. ಸಂಪನ್ಮೂಲ ವ್ಯಕ್ತಿಲಾ ಆದಿತ್ತಿನ ಮೇರ್ 26 ವರ್ಸೊರ್ದಿಂಚಿ ಮುಂಡಾಜೆಡಾ ಕಲಾಕುಂಚ ಆರ್ಟ್ಸ್ ಪನ್ಪಿನ ಟ್ಯೂಶನ್‌ ಸೆಂಟರ್‌ ನಡಪಾವೊಂದಿತ್ತೆರ್.