Last updated on May 3rd, 2025 at 05:14 pm
ಕುಡ್ಲ: ಬಜ್ಪೆಡ್ ನಡತಿನ ಹಿಂದೂ ಕಾರ್ಯಕರ್ತೆ ಸುಹಾಸ್ ಶೆಟ್ಟಿನ್ ಕೆರ್ತಿನ ಪ್ರಕರಣೊದ ಬೆರಿಟೇ ಒಡಿಪುಡ್ಲಾ ಪ್ರತೀಕಾರದ ದಾಳಿ ನಡತ್‌ದ್ಂಡ್. ಅಲ್ಪಲ್ಪ ಪಗೆತ ದಾಳಿಲು ನಡತೊಂದುಪ್ಪುನ ವರದಿ ಆವೊಂದುಂಡು.
ಕೋಡೆ ಮೇ 01ತ ರಾತ್ರೆ ಸುಮಾರ್ 11:15 ಗಂಟೆಗ್ ಆತ್ರಾಡಿ ಪೆಟ್ರೋಲ್‌ ಪಂಪ್‌‌ದಲ್ಪ ರಿಕ್ಷಾ ಡ್ರೈವರ್ ಒರಿಯನ ಮಿತ್ತ್ ದಾಳಿ ಆತ್ಂಡ್. ರಿಕ್ಷಾಡ್ ಪೋವೊಂದುಪ್ಪುನಗ ಬೈಕ್‌ಡ್ ಬತ್ತ್‌ದ್ “ಆಯನ್ ಕಡ್ಪು, ಬುಡೊರ್ಚಿ” ಪನೊಂದು ದಾಳಿ ಮಲ್ತ್‌ದೆರ್.
ದಾಳಿ ಆತಿನಾರೆನ್ ಆತ್ರಾಡಿದ ಅಬೂಬಕರ್ (50) ಪನ್ದ್ ಗುರ್ತ ಪತ್ತ್‌ದೆರ್. ದಾಳಿ ಮಲ್ದಿನ ಇರ್ವೆರ್ ಆರೋಪಿಲೆನ್ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್. ಕೈದಾತಿನಕ್ಲೆನ್ ಪೆರಿಯಡ್ಕ ಬೊಮ್ಮರಬೊಟ್ಟುದ ಸಂದೇಶ್ (31) ಬೊಕ್ಕ ಬಾಪೂಜಿ ದರ್ಖಾಸ್ ನಿವಾಸಿ ಸುಶಾಂತ್ (32) ಪನ್ದ್ ಗುರ್ತ ಪತ್ತ್‌ದೆರ್.
ಅಂಚೆನೇ ಕುಡ್ಲ ಪೇಂಟೆದ ಪಿದಯಿ ಕಣ್ಣೂರ್‌ಡ್ ಇರ್ಷಾದ್ ಪನ್ಪಿನಾಯಗ್ ಇನಿ ಕಾಂಡೆ ಬೀಸತ್ತಿ ಪಾಡ್ದೆರ್. ಗಾತಿದ ಗಡಿಕುಲಾತಿನ ಜವನನ್ ಆಸ್ಪತ್ರೆಗ್ ದಾಕಲ್ತ್‌ದೆರ್.
ತೊಕ್ಕೊಟ್ಟು ಒಳಪೇಂಟೆದ ಕೈತಲ್ ಫೈಝಲ್ ಅಳೇಕಲ ಪನ್ಪಿನಾಯಗ್ ತಲ್ವಾರ್‌ಡ್ ದಾಳಿ ಮಲ್ದಿನ ವರದಿ ಆತ್ಂಡ್. ಫೈಝಲ್ ಕಲ್ಲಾಪು ಮಾರ್ಕೆಟ್‌ಗ್ ಬನ್ನಗ ಈ ದಾಳಿ ಆತ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ಕುಂಟಿಕಾನಡ್ ಉಳ್ಳಾಲದ ಲುಕ್ಮಾನ್ ಪನ್ಪಿನ ಮೀನ್‌ದ ಬೇರದಾರ್ ಗ್ರಾಹಕೆರೆಗ್ ಕಾತೊಂದುಪ್ಪುನಗ ಕಲ್ಲ್ ತುಂಬುದ್ ಪಾಡ್ದ್ ಕೆರ್ಪುನ ಪುನೆಪು ಇನಿ ಕಾಂಡೆ ಪಡತ್‌ದ್ಂಡ್ ಪನ್ದ್ ತೆರಿದ್ ಬೈದ್ಂಡ್.