Last updated on May 26th, 2025 at 06:56 pm
ಮಂಡ್ಯ, ಮೇ 26: ಹೆಲ್ಮೆಟ್ ಪಾಡಂದೆ ಬೈಕ್ ಬುಡೊಂದು ಬರೊಂದುಲ್ಲೆರ್ ಪನ್ಡ್‌ದ್ ಒರರ್ದ್ ಒರಾನೆ ಟ್ರಾಫಿಕ್ ಪೊಲೀಸೆರ್ ಅಡ್ಡಕಟ್ಟಿನೆರ್ದಾವರ ಬೈಕ್ ಅಂಕೆ ತತ್ತ್‌ದ್, ಬೈಕ್‌ಡಿತ್ತಿನ ಮೂಜಿ ವರ್ಸ ಪ್ರಾಯೊದ ಬಾಲೆ ರೋಡ್‌ಗ್ ಬೂರ್ದ್ ತೀರ್ದಿನ ನಡಕೆ ಮಂಡ್ಯದ ಬೆಂಗಳೂರು-ಮೈಸೂರು ಪೆರ್ಸಾದಿಡ್ ನಡತ್‌ದ್ಂಡ್.
ವಾಣಿ-ಅಶೋಕ್ ಪನ್ಪಿನ ದಂಪತಿಲೆನ ಮೂಜರೆ ವರ್ಸ ಪ್ರಾಯೊದ ಬಾಲೆ ಹೃತೀಕ್ಷ ತೀರ್ದಿನಾಲ್. ಮೊಕುಲು ಮಂಡ್ಯ ಜಿಲ್ಲೆದ ಮದ್ದೂರು ತಾಲೂಕ್‌ದ ಗೊರವನಹಳ್ಳಿದಕುಲು. ವಾಣಿ-ಅಶೋಕ್‌ರೆನ ಮಗಲ್ ಹೃತೀಕ್ಷಗ್ ನಾಯಿ ತುಚ್ಚಿದಿತ್ತ್ಂಡ್. ಅಂಚಾದ್ ಅಮಸರೊಡು ಬಾಲೆನ್ ಮಿಮ್ಸ್ ಆಸ್ಪತ್ರೆಗ್ ಲೆತೊಂದು ಪೋವೊಂದಿತ್ತೆರ್. ಈ ಪೊರ್ತುಡು ಟ್ರಾಫಿಕ್ ಪೊಲೀಸೆರ್ ಹೆಲ್ಮೆಟ್ ಪಾಡ್ದಿಜೆರ್ ಪನ್ದ್ ಬೈಕ್‌ನ್ ಅಡ್ಡ ಕಟ್ಟ್‌ದೆರ್. ಅಪಗ ಬೈಕ್‌ಡಿತ್ತಿನ ಅಮ್ಮೆ, ಅಪ್ಪೆ ಅಂಚೆನೇ ಬಾಲೆ ಆಯತತ್ತ್‌ದ್ ತಿರ್ತ್ ಬೂರ್ದೆರ್.
ಈ ಪೊರ್ತುಡು ಬಾಲೆ ಹೃತೀಕ್ಷನ ತರೆತ ಮಿತ್ತ್ ಪಿರವುರ್ದು ಬರೊಂದಿತ್ತಿನ ಟೆಂಪೋ ಪೋತುಂಡು. ತರೆಕ್ ಭಾರೀ ಪೆಟ್ಟ್ ಬೂರ್ದು ನೆತ್ತೆರ್ ಪೋದು ಬಾಲೆ ಅಲ್ಪನೇ ತೀರ್ದಲ್. ಆಲೆನ ಮರಣರ್ದಾವರ ಶಾಕ್ ಆತಿನ ಅಪ್ಪೆಅಮ್ಮೆ ಸಾದಿದ ನಡುಟೇ ಬಾಲೆನ್ ಜಕ್ಕೆಲ್‌ಡ್ ದೀವೊಂದು ಬುಲ್ಪುನೆನ್ ತೂನಗ ಎಂಚಿನಾಯನ ಕಣ್ಣ್‌ಡ್ಲಾ ಪಸೆ ಬರ್ಪುಲೆಕ ಇತ್ತ್ಂಡ್.
ಕೊಂಡಾಟದ ಬಾಲೆನ್ ಕಲೆವೊಂದಿನ ಅಪ್ಪೆಅಮ್ಮೆ ಮಿಮ್ಸ್ ಆಸ್ಪತ್ರೆದ ಎದುರು ಸಾದಿಡೇ ಪುನ ದೀದ್ ಬುಲ್ತೊಂದಿತ್ತೆರ್. ಆತೇ ಅತ್ತಂದೆ ಪೊಲೀಸೆರೆ ನಡಕೆಗ್ ಸಾರ್ವಜನಿಕೆರ್ ಬಾರೀ ಆಕ್ರೋಶ ತೂಪಾದೆರ್. ಮಂಡ್ಯ ಮಿಮ್ಸ್ ಆಸ್ಪತ್ರೆದ ಎದುರು ಪೆರ್ಸಾದಿ ಅಡ್ಡಕಟ್ಟ್‌ದ್ ಪೊಲೀಸೆರೆ ವಿರುದ್ಧ ಘೋಷಣೆ ಲೆತ್ತ್‌ದ್ ಆಕ್ರೋಶ ತೂಪಾದೆರ್.
ಬಾಲೆದ ಸಾವುಗು ಮಂಡ್ಯ ಟ್ರಾಫಿಕ್ ಪೊಲೀಸೆರೇ ನೆವನ ಪನ್ದ್ ಬಾಲೆದ ಇಲ್ಲದಕುಲು, ಸಾರ್ವಜನಿಕೆರ್ ಪೆರ್ಸಾದಿಡ್ ಕುಲ್ಲುದು ಪೊರ್ಮ್ಬಾಟ ಮಲ್ತೊಂದಿತ್ತ್‌ದ್, ಈ ಪ್ರಕರಣ ತೀವ್ರ ಸ್ವರೂಪ ಗೆತೊನೊಂದಿತ್ತಿಲೆಕನೆ ಲಕ್ಕೊಂಡಿನ ಮಂಡ್ಯ ಎಸ್ಪಿ ಮಲ್ಲಿಕಾರ್ಜುನ ಬಾಲದಂಡಿ, ಹೆಲ್ಮೆಟ್ ಚೆಕಪ್ ಮಲ್ತೊಂದಿತ್ತಿನ ಮೂವೆರ್ ಎಎಸ್ಐಲೆನ್ ಸಸ್ಪೆಂಡ್ ಮಲ್ತ್‌ದೆರ್. ASIಲಿಯಿನ ಜಯರಾಮ್, ನಾಗರಾಜ್, ಗುರುದೇವ್ ಸಸ್ಪೆಂಡ್ ಆತಿನಕುಲು.