Last updated on May 22nd, 2025 at 10:36 am
ಬೆಂಗಳೂರು (ಮೇ 21): ಬೆಂಗಳೂರುದ ಆನೇಕಲ್ ತಾಲ್ಲೂಕ್‌ದ ಪರ ಚಂದಾಪುರದ ರೈಲ್ವೆ ಸಂಕೊದ ಕೈತಲ್ ಅನುಮಾನಾಸ್ಪದ ಸೂಟ್ಕೇಸ್ ಒಂಜೆಟ್ ಸುಮಾರ್ 18 ವರ್ಸ ಪ್ರಾಯೊದ ಗುರ್ತ ದಾಂತಿನ ಪೊಣ್ಣನ ಪುನ ತಿಕ್ಕ್‌ದ್ಂಡ್.
ಕರ್ನಾಟಕ ಬೊಕ್ಕ ತಮಿಳುನಾಡ್ ಗಡಿಭಾಗೊದ ಹೊಸೂರು ಮೈನ್‌ರೋಡ್‌ದ ಬರಿಟೆ ಈ ಸಂಕ ಇತ್ತ್‌ದ್, ಜನೊಕುಲು ಅಂಚಿಂಚಿ ಪೋವೊಂದೇ ಇಪ್ಪುನ ಜಾಗೆ ಆದುಂಡು. ಮುಲ್ಪದಕುಲು ಶಂಕಿತ ಸೂಟ್ಕೇಸ್ ತೂದು ಅಪಗನೇ ಪೊಲೀಸೆರೆಗ್ ಒಲವು ಕೊರ್ತೆರ್. ಸೂರ್ಯನಗರ ಪೊಲೀಸ್ ಸ್ಟೇಶನ್ ಸಿಬ್ಬಂದಿಲು ಬತ್ತ್‌ದ್ ಪರಿಶೀಲನೆ ಮಲ್ತ್‌ದೆರ್. ಸೂಟ್ಕೇಸ್ ದೆತ್ತ್‌ದ್ ತೂನಗ ಪೊಣ್ಣನ ಪುನ ತಿಕ್ಕ್‌ದ್ಂಡ್. ಪಓವೊಂದಿತ್ತಿನ ರೈಲ್‌ರ್ದ್ ಈ ಸೂಟ್‌ಕೇಸ್‌ನ್ ದಕ್ಕ್‌ದಿಪ್ಪೆರ್ ಪನ್ದ್ ಅಂದಾಜಿ ಮಲ್ದೆರ್. ಅಂಚೆನೇ ಪೊಣ್ಣು ಸೈತಿಬೊಕ್ಕ ಪುನೊನು ಸೂಟ್‌ಕೇಸ್‌ಗ್ ದಿಂಜದ್ ದಕ್ಕ್‌ದೆರ್ ಪನ್ದ್ ಪೋಲೀಸೆರ್ ಅಂದಾಜಿ ಮಲ್ದೆರ್.
ಈ ನಡಕೆದ ಬಗೆಟ್ ಎಚ್ಚಿನ ಜಡ್ತೆ ಮಲ್ಪೆರ ಬೈಯ್ಯಪ್ಪನಹಳ್ಳಿ ರೈಲ್ವೆ ಸ್ಟೇಷನ್ ಪೊಲೀಸೆರೆನ ವರದಿಗ್ ಕಾತೊಂದುಲ್ಲೆರ್. ಪೊಲೀಸೆರ್ ಪರಿಶೀಲನೆ ಮೂರ್ತಿ ಬೊಕ್ಕ ಸೂಟ್ಕೇಸ್ ಬೊಕ್ಕ ಪುನತ ಸಮಗ್ರ ಪರಿಶೀಲನೆ ಮಲ್ಪುವೆರ್. ಸೂಟ್‌ಕೇಸ್‌ಡ್ ಪುನ ಆದ್ ತಿಕ್ಕಿನ ಪೊಣ್ಣು ಏರ್? ಇಡೆಗ್ ಎಂಚ ಎತ್ತ್ಂಡ್? ಏರ್ ಇಂಚ ಮಲ್ದೆರ್ ಪನ್ಪಿ ಪ್ರಶ್ನೆಲೆಗ್ ಇತ್ತೆಗ್ ಸದು ತಿಕ್ಕ್‌ದಿಜಿ.
ಇತ್ತೆ ಪೊಣ್ಣನ ಗುರ್ತದ ಚೀಟಿ ದಾಲ ಇಜ್ಜಂದಿನೆರ್ದಾವರ ಪ್ರಾಯ ಬೊಕ್ಕ ಕುಂಟುಲೆನ ಆಧಾರೊಡು ಗುರ್ತ ಪತ್ತುನ ಬೇಲೆಗ್ ಜತ್ತ್‌ದೆರ್. ಪುನೊನು ಮರಣೋತ್ತರ ಪರೀಕ್ಷೆಗ್ ಕಡಪುಡ್ದೆರ್. ಕರ್ನಾಟಕ, ತಮಿಳುನಾಡ್ ಗಡಿಟ್ ರೈಲ್ವೆ ಪಟ್ಟೆದ ಕೈತಲ್ ಕರಿನ ವರ್ಸೊಲಾ ಇಂಚೆನೇ ಒಂಜಿ ಪುನ ತಿಕ್ಕ್‌ದಿತ್ತ್ಂಡ್.
ಇಂಚಿಪ ಉಂದುವೇ ತಾಲೂಕ್‌ಡ್ 14 ವರ್ಸ ಪ್ರಾಯೊದ ಕೆಬಿ ಕೇನಂದಿನ ಬಾಯಿ ಬರಂದಿನ ಪೊಣ್ಣನ ಪುನ ರೈಲ್ವೆ ಪಟ್ಟೆದ ಕೈತಲ್ ತಿಕ್ಕ್‌ದಿತ್ತ್ಂಡ್, ಅವೆನ್ ಪೋಲೀಸೆರ್ ರೈಲ್ ಗುದ್ದ್‌ದ್ ಸೈತಿನ ಪನ್ದ್ ಪನ್ತೆರ್.