Last updated on June 6th, 2025 at 08:25 am
ಒಡಿಪು ಜೂನ್ 05: ಬಾಲೆನ್ ಜೆಪುಡಾಯೆರ ಕಟ್ಟ್‌ದಿತ್ತಿನ ನೇಲೆಡ್ ಬಾಲೆದ ಕೆಕ್ಕಿಲ್ ತಿಕಲೊಂದಿನೆರ್ದಾವರ ಒಂಜಿ ವರ್ಸೊದ ಬಾಲೆ ತೀರ್ದಿನ ನಡಕೆ ಒಡಿಪುದ ನಿಟ್ಟೂರ್‌ಡ್ ನಡತ್‌ದ್ಂಡ್. ಪುತ್ತೂರು ಗ್ರಾಮೊದ ಬಾಡಾಯಿದಿಲ್ಲಡ್ ಇತ್ತಿನ ಅಯ್ಯಪ್ಪೆ ಪನ್ಪಿನಾರೆನ ಪೊಣ್ಣು ಬಾಲೆ ಕಾಳಮ್ಮ(1) ತೀರ್ದಿನ ಬಾಲೆ.
ಒಡಿಪುಡು 3 ವರ್ಸೊರ್ದಿಂಚಿ ಬೇಲೆ ಮಲ್ತೊಂದುಪ್ಪುನ ಅಯ್ಯಪ್ಪೆ ಮೇರ್ ನಿಟ್ಟೂರ್‌ಡ್ ಗಂಗಾಧರೆ ಪನ್ಪಿನಾರೆನ ಬಾಡಾಯಿದಿಲ್ಲಡ್ ಇತ್ತೆರ್‌. ಜೂ.4ತಾನಿ ಕಾಂಡೆ 8 ಗಂಟೆಗ್ ಬೇಲೆಗ್ ಪಿದಡ್ದ್ ಪೋತೆರ್. ಈ ಪೊರ್ತುಡು ಆರೆನ ಬೊಡೆದಿ ಬಾಲೆನ್ ನೇಲೆಡ್ ಪಾಡ್ದ್ 9.30 ಆನಗ ಬೆಲೆಗ್ ಪೋತಿನಾರ್ 11.30 ಕ್ ಬತ್ತ್‌ದ್ ತೂನಗ ಬಾಲೆದ ನಾಲಿಗ್ ನೇಲೆದ ಸೀರೆ ಸುತ್ತೊಂದು ನೇಲೊಂದುಪ್ಪುನ ಸ್ಥಿತಿಟ್ ತೋಜಿದ್ ಬೈದ್ಂಡ್.
ಅಪಗನೇ ಬಾಲೆನ್ ಒಡಿಪುದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋದಿತ್ತ್‌ದ್ ಅಲ್ಪ ಬಾಲೆದ ಪರೀಕ್ಷೆ ಮಲ್ತಿನ ಬೈದ್ಯೆರ್ ಬಾಲೆ ತೀರ್ದ್ಂಡ್ ಪನ್ದ್ ತೆರಿಪಾದೆರ್. ನೇಲೆರ್ದ್ ಜಪ್ಪುನಗ ಇಜಿಂಡ ನಿದ್ರೆಡ್ ನೇಲೆರ್ದ್ ಬೂರ್ದು ನೇಲೆದ ಸೀರೆ ನಾಲಿಗ್ ಕಯ್ತ್‌ದ್ ದಮ್ಮು ಕಟ್ಟ್‌ದ್ ತೀರ್ದಿಪ್ಪೊಡು ಪನ್ದ್ ಪನೊಂದುಲ್ಲೆರ್. ಒಡಿಪು ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.