Last updated on June 6th, 2025 at 04:42 pm
ಅರಂತೋಡು: ಪೆದ್ಯೆರೆಗಾದ್ ಆಸ್ಪತ್ರೆಗ್ ದಾಕಲಾತಿನ ಪೊಂಜೊವು ಪೆದ್ದಿನೆರ್ದ್ ಬೊಕ್ಕ ನೆತ್ತೆರ್ ಪೋದು ತೀರ್ದಿನ ಬಗೆಟ್ ಸುಳ್ಯ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಸಂಪಾಜೆ ಗ್ರಾಮೊದ ಬಾಬು ಬೊಕ್ಕ ಚಿನ್ನಮ್ಮ ದಂಪತಿಲೆನ ಮಗಲ್, ಬೊಲ್ತೇರ್‌ದ ನಾರಾವಿ ಗ್ರಾಮೊದ ನೂಜೋಡಿ ಮಾಪಾಲ ಇಲ್ಲದ ಶೇಖರ ಮಲೆಕುಡಿಯೆರೆನ ಬೊಡೆದಿ ಮಧುರಾ (29) ತೀರ್ದಿನಾರ್.
ಮೇರೆಗ್ 6 ವರ್ಸೊಗು ದುಂಬು ಮದಿಮೆ ಆದಿತ್ತ್ಂಡ್. ಮೂಜರೆ ವರ್ಸೊದ ಆಣ್ ಬಾಲೆ ಇತ್ತ್‌ದ್, ರಡ್ಡನೇ ಬಾಲೆ ಪೆದ್ದೆರೆ ಜೂ. 2ತಾನಿ ಸುಳ್ಯ ಸರಕಾರಿ ಆಸ್ಪತ್ರೆಗ್ ದಾಕಲಾದಿತ್ತೆರ್. ಜೂ. 3ತಾನಿ ಬಯ್ಯ 6.45ಕ್ ಪೊಣ್ಣು ಬಾಲೆ ಪೆದ್ದ್‌ದಿನ ಆರೆಗ್ ರಾತ್ರೆ 9ಗ್ ಜೋರು ನೆತ್ತೆರ್ ಪೋಯೆರೆ ಸುರು ಆತ್ಂಡ್. ಡಾಕ್ಟರ್‌ನಕ್ಲೆನ ಸೂಚನೆದ ಲೆಕ ಕುಡ್ಲದ ಲೇಡಿಗೋಶನ್‌ಗ್ ರಾತ್ರೆ 11.30ಕ್ ಲೆತಬತ್ತ್‌ದ್ ದಾಕಲ್ತ್ಂಡಲಾ ರಾತ್ರೆ 12.37ಕ್ ತೀರ್ದೆರ್.
ಡಾಕ್ಟರ್‌ನಕ್ಲೆನ ಗೋಸ್ಮರಿದ ಆರೋಪ
ಮರಣೋತ್ತರ ಪರೀಕ್ಷೆಲಾ ಮಲ್ಪಂದೆ ಇಲ್ಲದಕಲೆಗ್ ಪುನ ಕೊರ್ದಿತ್ತ್‌ದ್ ಇಲ್ಲಡ್ ಅಂತಿಮ ಸಂಸ್ಕಾರೊಗು ಅಟ್ಟನೆ ಆದಿತ್ತ್ಂಡ್. ಈ ವಿಷಯ ತೆರಿನ ರಾಜ್ಯ ಮಲೆಕುಡಿಯ ಸಂಘೊದ ಅಧ್ಯಕ್ಷೆ ಶ್ರೀಧರ ಈದು ಬೊಕ್ಕ ಬೇತೆ ನಾಯಕೆರ್ ಜಿಲ್ಲಾ ಆರೋಗ್ಯಾಧಿಕಾರಿ ಬೊಕ್ಕ ಜಿಲ್ಲಾ ಪೊಲೀಸ್ ಅಧಿಕಾರಿಲೆನ ಗುಮನೊಗು ಕನತ್‌ದೆರ್. ಬೊಕ್ಕ ಮರಣೋತ್ತರ ಪರೀಕ್ಷೆ ಮಲ್ತ್‌ದ್ ಬೋಡಾಪಿನ ಕ್ರಮ ಗೆತೊನೊಡು, ಬಾಲೆದ ಭವಿಷ್ಯೊಗು ಸರಕಾರೊರ್ದು ಸೂಕ್ತ ಪರಿಹಾರ ಕೊರೊಡು ಪನ್ದ್ ಆಗ್ರಹ ಮಲ್ತ್‌ದ್ ಇಲ್ಲದಕುಲು ಸುಳ್ಯ ಪೊಲೀಸ್ ಸ್ಟೇಶನ್‌ಡ್ ಒಯಿಲ್ ಬರೆಪಾದೆರ್.