Last updated on June 6th, 2026 at 10:23 am
ಬಂಟ್ವಾಳ, ಜೂ. 06: : ಕಾರ್ಡ್ ಅಕ್ರಮವಾದ್ ಎಂಡಿಎಂಎ (MDMA) ಮಾದಕ ಸೊತ್ತು ಕೊನೊವೊಂದಿತ್ತಿನಕಲೆನ್ ಪತ್ತಿನ ಬಂಟ್ವಾಳ ನಗರ ಪೊಲೀಸೆರ್, ಮೂವೆರ್ ಆರೋಪಿಲೆನ್ ಉಲಕೈ ಮಲ್ತ್ದ್, ಅಕಲೆನ ಕೈರ್ದ್ ಲಕ್ಷಗಟ್ಲೆ ರೂಪಾಯಿ ಮೌಲ್ಯೊದ ಡ್ರಗ್ಸ್ ಬೊಕ್ಕ ಕಾರ್ನ್ ಉಲಕೈ ಮಲ್ತೊಂದೆರ್. ಬಂಟ್ವಾಳದ ಪುದು ನಿವಾಸಿ ಎ. ಜುಬೈರ್ (39), ಸಜಿಪ ಮುನ್ನೂರ್ ನಿವಾಸಿ ಮೊಹಮ್ಮದ್ ಸವಾದ್ (36) ಬೊಕ್ಕ ಬಿ. ಮೂಡ ನಿವಾಸಿ ಬಿ.ಎಂ. ರಶೀದ್ ಯಾನೆ ಮಾರಿಮುತ್ತು ಕೈದಾತಿನ ಆರೋಪಿಲು.
ಜೂನ್ 4 ತಾನಿ ಬಯ್ಯಡ್ ಬಂಟ್ವಾಳ ನಗರ ಪೊಲೀಸ್ ಉಪ ನಿರೀಕ್ಷಕೆರಾಯಿನ (SI) ಸಂದೀಪ್ ಕುಮಾರ್ ಶೆಟ್ಟಿ ಮೇರ್ ಆರೆನ ಸ್ಟೇಶನ್ ಸಿಬ್ಬಂದಿಲೆನ ಒಟ್ಟುಗು ಮೆಲ್ಕಾರ್ ಪ್ಲೈಒವರ್ದ ಕೈತಲ್ ಗಾಡಿಲೆನ ತಪಾಸಣೆ ಮಲ್ತೊಂದಿತ್ತೆರ್. ಈ ಪೊರ್ತುಡು ಸಂಶಯಾಸ್ಪದವಾದ್ ಬತ್ತಿನ ಕಾರ್ನ್ ಉಂತಾದೆರ್. ಕಾರ್ಡ್ ಡ್ರೈವರ್ ಸೇರ್ದ್ ಮೂಜಿ ಜನ ಇತ್ತ್ದ್, ಪೊಲೀಸೆರ್ ಕಾರ್ನ್ ಸಮ ಪರಿಶೀಲನೆ ಮಲ್ಪುನಗ ಮಾದಕ ಸೊತ್ತು ಗೆತೊನ್ರೆ ಗಲಸುನ ವಿಶೇಷ ಪನೆ ತಿಕ್ಕ್ದ್ಂಡ್.
ತಿಕ್ಕ್ದ್ ಬೂರ್ದಿನಕಲೆನ್ ಪೊಲೀಸೆರ್ ವಿಚಾರಣೆಗೆ ಮಲ್ಪುನಗ, ಅಕುಲು ಎಂ.ಡಿ.ಎಂ.ಎ ಮಾದಕ ಸೊತ್ತುನು ಸಾರ್ವಜನಿಕೆರೆಗ್ ಎಚ್ಚಿಗೆ ರೇಟ್ಡ್ ಮಾರುನ ಉದ್ದೇಶೊಡು ಕೊನೊವೊಂದುಪ್ಪುನೆನ್ ಒತ್ತೊಂದೆರ್. ಪೊಲೀಸೆರ್ ಆರೋಪಿಲೆನ್ ಬೊಕ್ಕ ಅಕಲೆನ ಕಾರ್ಡ್ ನಾಡ್ನಗ ಅಂದಾಜಿ ₹7,64,000/- ಮೌಲ್ಯೊದ ಒಟ್ಟು 76 ಗ್ರಾಂ 40 ಮಿಲಿಗ್ರಾಂ ತೂಕೊದ ಮಲ್ಲ ಪ್ರಮಾಣೊದ ಎಂಡಿಎಂಎ ತಿಕ್ಕ್ದ್ಂಡ್.
ಪೊಲೀಸೆರ್ ಮಾದಕ ಸೊತ್ತು ಬೊಕ್ಕ ಡ್ರಗ್ಸ್ ಒಯ್ಪೆರ ಗಲಸುನ ಪನೆನ್ ಉಲಕೈ ಮಲ್ತೊಂದೆರ್. ಅವೆತ ಒಟ್ಟುಗು ಡ್ರಗ್ಸ್ ಸಾಗಾಯೆರ ಗಲಸ್ದಿನ ಕಾರ್ ಬೊಕ್ಕ ಆರೋಪಿಲೆನ ಕೈಟ್ ಇತ್ತಿನ 3 ಮೊಬೈಲ್ ಫೋನ್ಲೆನ್ಲಾ ಉಲಕೈ ಮಲ್ತೊಂದೆರ್. ಆರೋಪಿಲೆನ ಮಿತ್ತ್ ಮಾದಕ ದ್ರವ್ಯ ನಿಯಂತ್ರಣ ಕಾಯ್ದೆದಡಿಟ್ (NDPS) ಪ್ರಕರಣ ದಾಕಲ್ತೊಂದಿನ ಬಂಟ್ವಾಳ ನಗರ ಪೊಲೀಸೆರ್ ಬೋಡಾಪಿನ ಕಾನೂನು ಕ್ರಮ ಗೆತೊಂದೆರ್.