Last updated on June 8th, 2024 at 08:20 pm
ಕೊರ್ರೆ ಬಾಸೆ(ಕೊರಗ ಬಾಸೆ) ಆಧುನಿಕತೆತ ಪೆಟ್ಟ್‌ಡ್ ಅಳಿಯೊಂದುಪ್ಪುನ ಪೊರ್ತುಡು ಎನ್ನ ಬಾಸೆ, ಎನ್ನ ಪರತಿರಿ, ಎನ್ನ ಜನೊಕುಲು ಒರಿಯೊಡು, ನನ ಬರ್ಪಿ ತರೆಮಾರ್‌ಗ್ಲಾ ಕೊರಗ ಬಾಸೆದ ಸೆಬಿ ತಿಕ್ಕೊಡು ಪಂಡ್‌ದ್ ‘ಕೊರಗೆರ್ನ ಅಳಿಪು ಒರಿಪು’ ಪನ್ಪಿ ಪೇಜ್ ಮೊಡೆದ್ ಕೊರ್ರೆ ಕೂಜೆರೆನ ಉಡಲ್‌ಡ್ ಸ್ವಾಭಿಮಾನದೊಟ್ಟುಗು, ಗೇನೊಲಾ ಪುಟ್ಟಾವೊಂದು, ಎಡ್ಡೆ ಸೊಲ್ಲಂಜೊನು ಕೊರೊಂದಿತ್ತಿನ ‘ರಿಧಿ ಗೌತಮ್’ ನನ ನಮಕ್ ಮಾತ ಒಂಜಿ ನೆಂಪು ಮಾತ್ರ.
ಎಲ್ಯ ಪ್ರಾಯೊಡೇ ಜೋಕುಲು ಬಾಲೆಲೆರ್ದ್ ಬತ್ತ್‌ದ್ ಪ್ರಾಯೊದಕಲೆ ಮುಟ್ಟ ಮೋಕೆದ ಗೌತಮ್ ಕರಿನ ಗುರುವಾರ ಬಯ್ಯಡ್ ಹಾರ್ಟ್ ಅಟ್ಯಾಕ್ ಆದ್ ತೀರ್ದೆರ್. ಆರೆನ ಈ ಅಗಪು ಕೊರಗ ಸಮಾಜೊಗು ಒಂಜಿ ಮಾಮಲ್ಲ ನಷ್ಟ ಪಂದೇ ಪನೊಲಿ.
ಸಂಘಟನಾತ್ಮಕವಾದ್‌ಲಾ ದುಂಬಿತ್ತಿನ ಗೌತಮ್ ತನ್ನ ಸಮುದಾಯೊಗು ಬೋಡಾದ್ ಆಡಳಿತ ವರ್ಗೊಡ ವಾದೊಗು ಜಪ್ಪುನ ತಂಕ ಇತ್ತಿನಾರ್. ಸಮುದಾಯೊದ ಪ್ರತಿ ಪೊರ್ಮ್ಬಾಟೊಡ್ಲಾ ಸುರೂಟು ಇಪ್ಪೆದೆರ್.
ದುಂಬೊರ ನಡತಿ ಎಡ್ತೆಡ್ ಮೆಯಿಕೈ ಪೊಡಿ ಆಂಡಲಾ, ಪಿರ ಮೆಯಿ ಕುಡ್ತ್ ಲಕ್ಕ್‌ದ್, ಮನ್ಪೊಡಾಯಿ ಬೇಲೆಲೆನ್ ಮನ್ದಿನ ಹಠವಾದಿ, ಬೇತೆ ಜವನೆರೆಗ್ ‘ರೋಲ್ ಮಾಡೆಲ್’.
‘ಕೊಡಿ ಪೇನ್ನ ಕೊಡ್ತಯಿ ದೇಬೆರ್ ಲಕ್ಕ’ (ಕೊಡಿ ಪಾಡಿನ ಗುರಿಕಾರೆ ದೇವೆರೆ ಲೆಕ) ಪನ್ಪಿ ಕೊರಗ ಪಾತೆರದ ಲೆಕ ಡಿಜಿಟಲ್ ಮಾಧ್ಯಮೊಗು ಕೊರಗ ಬಾಸೆನ್ ಕನತ್‌ದ್ ಕೊರಗ ಬಾಸೆದ ಒರಿಪುಗು ಪೊಸ ಪಜ್ಜೆ ದೀತಿನ ಗೌತಮ್ ಒರಿ ‘ಕೊಡ್ತಯಿ’ ಪಂಡ ತಪ್ಪಾವಂದ್.
ಗೌತಮ್ ನಡತ್ ಬತ್ತಿ ಸಾದಿ ಒರಿನ ಜವನೆರೆಗ್ ಸ್ಪೂರ್ತಿ ಆವಡ್ ಪಂಡ್‌ದ್ ಬಾಮ್ಯೊಂದು ಆರೆನ ಆತ್ಮೊಗು ಸದ್ಗತಿ ತಿಕ್ಕಡ್ ಪಂದ್ ತುಳುಸಮಾಚಾರ ದ ಕಡೆರ್ದ್ ನಟ್ಟೊನುವ.