Last updated on June 15th, 2024 at 11:01 am
ಕುಡ್ಲ: ಕುಡ್ಲ ವಿಶ್ವವಿದ್ಯಾನಿಲಯೊದ ಅಡಿತ ನಾಲ್ ಘಟಕ ಕಾಲೇಜಿಲೆನ ಕಾರ್ಯ ನಿರ್ವಹಣೆಗ್ ಸರಕಾರೊರ್ದ್ ನನಲಾ ಅನು ತಿಕ್ಕ್‌ದ್‌ಜಿ. ಒಟ್ಟುಗು ಆರ್ಥಿಕ ಸಂಕಷ್ಟೊಲಾ ಇತ್ತಿನೆರ್ದಾವರ ತೂವೊನುನು ಬಂಙ ಪಂದ್ ವಿ.ವಿ. ಕುಲಾಧಿಪತಿ ರಾಜ್ಯಪಾಲೆರೆಗ್ ಅಂಚೆನೇ ಉನ್ನತ ಶಿಕ್ಷಣ ಸಚಿವೆರೆ ಗೇನೊಗು ಕನತ್‌ದ ಪಂದ್ ಕುಲಪತಿ ಪ್ರೊ| ಪಿ.ಎಲ್‌.ಧರ್ಮ ತೆರಿಪಾದೆರ್.
ಬನ್ನಡ್ಕ ಬೊಕ್ಕ ನೆಲ್ಯಾಡಿ ಕಾಲೇಜ್‌ಲು, ಕುಡ್ಲ ವಿ.ವಿ.ದ ಘಟಕ ಕಾಲೇಜ್, ಸಂಧ್ಯಾ ಕಾಲೇಜ್ ಏಳೆಣ್ಮ ವರ್ಸೊರ್ದು ನಡತೊಂದು ಬರೊಂದುಲ್ಲ. ಆಂಡ ನಾಲ್ ವರ್ಸೊರ್ದಿಂಚಿ ಐಕ್ಲೆನ ಸ್ಟಾಚ್ಯೂಯೇಟ್‌ಗ್ ಸರಕಾರೊದ ಅನು ತಿಕ್ಕ್‌ದಿಜಿ. ಎ.15ಕ್ ಈ ಬಗೆಟ್ ಉನ್ನತ ಶಿಕ್ಷಣ ಇಲಾಖೆದ ಮುಖ್ಯ ಕಾರ್ಯದರ್ಶಿಗ್ಲಾ ಅನು ಕೇಂದ್ ಓಲೆ ಬರೆತ್ಂಡ್ ಪಂದ್ ಆರ್ ಪಂಡೆರ್.
ಕುಡ್ಲ ವಿ.ವಿ. ತನ್ನ ಆಂತರಿಕ ಸಂಪೊತ್ತುನು ಒಟ್ಟು ಮನ್ಪುನ ಶಕ್ತಿನ್ಲಾ ಕಲೆವೊಂದುಂಡು. ಪಾಕ ಕಾಲೇಜಿಲು ಆಟೋನೊಮಸ್ ಕಾಲೇಜಿಲಾದಿತ್ತ್‌ದ್, ಅವೆರ್ದ್ ಫೀಸ್ ಬರೊಂದಿಜ್ಜಿ. ಕೋವಿಡ್‌‌ರ್ದ್ ಬೊಕ್ಕ ಸರಕಾರೊದ ಅನುದಾನಲಾ ತಿಕ್ಕೊಂದಿಜ್ಜಿ. ಉಂದೆತ ಒಟ್ಟುಗು ಈ ಘಟಕ ಕಾಲೇಜ್‌ಲೆನ ನಿರ್ವಹಣೆಲಾ ಬಂಙ ಆದಿತ್ತ್‌ದ್, ಉಪನ್ಯಾಸಕೆರೆಗ್, ಸಿಬ್ಬಂದಿಲೆಗ್ ಮೂಜಿ-ನಾಲ್ ತಿಂಗೊಲುಗೊರ ಸಂಬಳ ಕೊರ್ಪುನ ಪರಿಸ್ಥಿತಿ ಬೈದ್ಂಡ್ ಪಂದ್ ಆರ್ ವಿವರಿತೆರ್.
ವಿ.ವಿ.ಗ್ ಆದಾಯ ಕೊರೊಂದಿತ್ತಿನ ದೂರ ಶಿಕ್ಷಣ ಕೇಂದ್ರೊನು ಸರಕಾರೊದ ಆದೇಶೊರ್ದಾವರ ಮುಚ್ಚಿದ್ಂಡ್. ಕುಡ್ಲ ವಿ.ವಿ.ದ ಆಂತರಿಕ ಸಂಪನ್ಮೂಲ ಕಾಲೇಜ್‌ಲೆನ ಫೀಸ್, ಸರ್ಟಿಫಿಕೆಟ್‌ಲೆರ್ದ್ ಬರ್ಪಿನ ಫೀಸ್ ಲೆಕ್ಕೊದವು. ಯುಜಿಸಿ ಪ್ರಾಜೆಕ್ಟ್‌ಲು, ಕೈಗಾರಿಕೆಲೆರ್ದ್ ಬರೊಂದಿತ್ತಿನ ಆದಾಯೊಲಾ ಕಮ್ಮಿ ಆತ್ಂಡ್. ಈ ಮಾತಾ ಇಸಯೊಲೆನ ಬಗೆಟ್ ಸರಕಾರೊದ ಗೇನ ಒಯ್ತ್‌ದ್ಂಡ್. ಇತ್ತೆಗ್ ಕುಡ್ಲ ವಿ.ವಿ. ಕ್ಯಾಂಪಸ್‌‌ದ ಉಲಯಿ ಉಪ್ಪುನ ಘಟಕ ಕಾಲೇಜಿಡ್ ಈ ಸರ್ತಿದ ದಾಖಲಾತಿಗ್ ಅವಕಾಶ ಕೊರ್ಪುನ ದಿಟ್ಟಿಡ್ ವಿಧಾನಸಭಾ ಸ್ಪೀಕರ್‌‌ನ ಭರವಸೆ‌ದ ಮಿತ್ತ್ ಸುರು ಮಲ್ತ್‌ದ ಪಂದ್ ಆರ್ ಪಂಡೆರ್.
ಹಗರಣೊಲೆನ ಜಡ್ತೆ
ಮಂಗಳೂರು ವಿ.ವಿ.ದ ದುಂಬುದ ಕೆಲ ಹಗರಣೊಲೆನ ಬಗೆಟ್ ನಿವೃತ್ತ ನ್ಯಾಯಾಧೀಶೆರೆನ ಮುತಾಲಿಕೆಡ್ ಜಡ್ತೆ ನಡತೊಂದುಂಡು. ಆ ಬಗೆಟ್ ಪ್ರತಿಕ್ರಿಯೆ ಕೊರ್ಯೆರೆ ಆಪುಜಿ. ದುಂಬುದ ಉಪ ಕುಲಪತಿಕ್ಲೆನ ಅವಧಿಡ್ ಆದಿಪ್ಪು ಪನ್ಪಿನ ಹಗರಣೊಲೆನ ಜಡ್ತೆ ಮಲ್ಪುನ ಅಧಿಕಾರ ವಿ.ವಿ.ಗ್ ಇಜ್ಜಿ ಪಂದ್ ಕುಲಪತಿಕುಲು ಸುದ್ದಿಗಾರೆರೆ ಕೇನ್ಪುಗು ಸದು ಕೊರ್ಯೆರ್.
ಅನಧಿಕೃತ ನೇಮಕ
ಕುಡ್ಲ ವಿ.ವಿ.ಡ್ ಕರಿನ ಒಂಜಿ ರಡ್ಡ್ ವರ್ಸೊಡು ಕಾಂಟ್ರಾಕ್ಟ್ ಆಧಾರೊಗು ಮಲ್ತಿತ್ತಿನ 187 ಜನೊತ ನೇಮಕೊನು ಅನಧಿಕೃತ ಪಂದ್ ಸರಕಾರ ತೆರಿಪಾದಿತ್ತ್‌ದ್, ವಿ.ವಿ.ದ ನಿವೃತ್ತ ಉದ್ಯೋಗಿಲೆಗ್ ಕೊರ್ಯೆರ ಬಾಕಿ ಇಪ್ಪುನ ಪೆನ್ಶನ್ (14 ಕೋ.ರೂ) ಕೊರ್ಯೆರ ಅನಧಿಕೃತ ನೇಮಕಾತಿನ್ ಇತ್ತೆಗ್‌ಇತ್ತೆನೇ ಬುಡ್ಯೆರ ಆದೇಶ ಕೊರ್ತುಂಡು. ಅಂಚಾದ್ ಹಂತ ಹಂತೊಡು ಅಕ್ಲೆನ್ ಬುಡೊಂದುಂಡು. ಇಂಚ ಮಲ್ತ್ಂಡ ವಾರ್ಷಿಕವಾದ್ ಸುಮಾರ್ 3 ಕೋ.ರೂ. ಒರಿಪುನ ನಿರೀಕ್ಷೆ ಉಂಡು ಪಂದ್ ಆರ್ ತೆರಿಪಾಯೆರ್.