ಉಬಾರ್: ಕಂಡನ್ಯಡ ಕಾದ್‌ದ್ ನೇತ್ರಾವತಿ ಸುದೆಕ್ ಲಾಗ್ಯೆರೆ ಪೋಯಿನಾಲೆನ ಚೂಡಿದಾರ ಒಯ್ತ್‌ದ್ ಜೂವ ಕಾತಿನ ತಾಂಕನದ ನಾಯಿ

Last updated on June 29th, 2024 at 03:12 pm

ಉಬಾರ್ ಜೂನ್ 29: ಕಂಡನ್ಯಡ ಮನಸ್ತಾಪ ಆದ್ ಪೊಂಜೊವು ಒರ್ತಿ ಆತ್ಮಹತ್ಯೆ ಮಲ್ತೊನೆರೆ ನೇತ್ರಾವತಿ ಸುದೆಕ್ ಲಾಗ್ಯೆರೆ ಪೋದಿತ್ತ್‌ದ್, ಆರೆನ ಬರಿಯೆ ಬತ್ತಿನ ತಾಂಕನದ ನಾಯಿ ನುಪ್ಪು ಪಾಡಿನಪ್ಪೆ ಆತ್ಮಹತ್ಯೆ ಮಲ್ತೊನಂದಿ ಲೆಕ ಕಾತಿನ ನಡಕೆ ನಡತ್‌ದ್ಂಡ್.

ಇತ್ತೆ ಪಿಲಿಗೂಡು ನಿವಾಸಿಯಾದುಪ್ಪುನ ಬೆಂಗಳೂರು ಮೂಲೊದ ಪೊಂಜೊವು ಪಿಲಿಗೂಡುದ ಒರ್ಯನ್ ಮೋಕೆ ಮಲ್ತ್ ಮದಿಮೆ ಆದಿತ್ತೆರ್. ಮದಿಮೆ ಆದೊ 16 ವರ್ಸ ಆದಿತ್ತ್‌ದ್, ಇರ್ವೆರ್ ಜೋಕುಲುಲಾ ಉಲ್ಲೆರ್. ಆತೇ ಅತ್ತಂದೆ ಇಂಚಿಪೊಗು ಪೊಸ ಇಲ್ಲ್ ಕಟ್ಟಾದ್ ನೆಮ್ಮದಿಡ್ ಇತ್ತೆರ್. ಆಂಡ ಇಂಚಿಪ ಒಂತೆ ದಿನೊರ್ದು ಮೆಕಾನಿಕ್‌ ಕಂಡನೆ ಬೊಕ್ಕ ಬೊಡೆದಿ ಕಂಟ್ಯೊದೆರ್. ಗುರುವಾರ ಬೆಸರ್‌ಡ್ ಪೊಂಜೊವು ಜೂವ ಗೆತ್ತೊನುನ ನಿರ್ಧಾರ ಮಲ್ತ್‌ದ್ ಗುರುವಾರ ರಾತ್ರೆ ನಡತೊಂದೇ 4 ಕಿ.ಮೀ. ದೂರೊದ ನೇತ್ರಾವತಿ ಸಂಕದಡೆ ಬತ್ತ್‌ದ್ ಸುದೆಕ್ ಲಾಗ್ಯೆರ ತೂತೆರ್.

ಆಂಡ ಇಲ್ಲಲ್ದೇ ಆರೆನ ಬೆರಿಯೆ ಬತ್ತಿತ್ತಿನ ಸಾಂಕಿನ ನಾಯಿ ಲಾಗ್ಯೆರ ಅಣಿಯಾದಿತ್ತಿನಾರೆನ ಚೂಡಿದಾರನ್ ತುಚ್ಚಿದ್ ಪತೊಂದು, ಕೊರೆತೊಂದು ಸಾದಿಡೆ ಪೋಪಿನಕ್ಲೆನ ಗೇನ ಗೇನ ಒಯ್ತ್‌ದ್ಂಡ್ . ಉ್ಂದೆನ್ ತೂಯಿನ ಒರಿ ಬೈಕ್‌ ಸವಾರೆ ಗುರ್ತೊದ ಸಮಾಜ ಸೇವಕೆ ಒರ್ಯನ ಸಕಾಯೊಡು ಪೊಂಜೊವುನು ಪಿರವು ಒಯ್ತ್‌ದ್ ಜೂವ ಕಾತ್‌ದೆರ್.

ಒಟ್ಟಾರೆ ಬಾಯಿ ಬರಂದಿನ ನಾಯಿದ ಪುನೆಪು ಪೊಂಜೊವುನ ಜೂವ ಒರಿಪುಲೆಕ ಮಲ್ತ್ಂಡ್.
ಶುಕ್ರವಾರ ಇಡೀ ದಿನ ಪಂಚಾತಿಗೆ ನಡತ್ಂಡಲಾ ಪೊಂಜೊವು ಕಂಡನ್ಯನ ಇಲ್ಲಗ್ ಪೋಯೆರ ಕೇಂಡಿಜೆರ್. ಪೊಲೀಸೆರ್ ಬೊಕ್ಕ ಮುಟ್ಟದಕುಲು ಒಪ್ಯಾಯೆರ ಪಾಕ ಪುನೆಯೆರ್ಡಲಾ ಪಂಜೊವುನೂ ಒಪ್ಯಾಯೆರೆ ಆತಿಜಿ.