ಪುಂಜಾಲಕಟ್ಟೆ : ಎಣ್ಮೂರು ಆದಿ ಬೈದೆರ್ಲೆ ಗರೊಡಿದ ಕೋಟಿ ದರ್ಶನ ಪಾತ್ರಿ ಗಿರೀಶ್ ಮೆರೆನ ಮೃತದೇಹ ಪತ್ತೆ

Last updated on July 5th, 2024 at 07:16 pm

ಪುಂಜಾಲಕಟ್ಟೆ: ಎಣ್ಮೂರು ಆದಿ ಬೈದೆರ್ಲೆ ಗರೊಡಿದ ಕೋಟಿ ದರ್ಶನ ಪಾತ್ರಿ ಗಿರೀಶ್ (36) ಮೇರ್ ಬುದಾರೊರ್ದು ನಿಗೂಡವಾದ್ ನಾಪತ್ತೆ ಆದಿತ್ತೆರ್.

ದೈವ ಚಾಕಿರಿದ ಒಟ್ಟುಗು ಜೀವನ ನಡಪಾವರೆ ರಿಕ್ಷಾ ಡ್ರೈವರ್ ಆದ್ ಬೇಲೆ ಮಲ್ತೊಂದಿತ್ತಿನ ಮೇರ್ ಬಜಪೆ ಇಮಾನ ಉಂತಡೆಗ್ ಬಾಡಯಿ ಉಂಡು ಪನ್ದ್ ನಡೀರ್ ರಡ್ಡ್ ಗಂಟೆಗ್ ಪೋತಿನರೆನ ಬೊಕ್ಕ ಪತ್ತೆ ಇತ್ತಿಜಿ. ಉಂದೇ ಪೊರ್ತುಡು ರಾತ್ರೆ ಸವಾರಿಡ್ ಇತ್ತಿನ ಪೋಲೀಸೆರ್ ಅನುಮಾನಾಸ್ಪದೊಡು ಉಂತುದಿತ್ತಿನ ರಿಕ್ಷಾ ತೂದು ಅಲ್ಪ ತೂನಗ ಡ್ರೈವರ್ ತಿಕ್ಕಿಜೆರ್. ಬೊಕ್ಕ ಆ ರಿಕ್ಷೊಡು ಇತ್ತಿನ ರೆಕಾರ್ಡ್ ದ ಲೆಕ್ಕೊಡು ಅರೆನ ಇಲ್ಲದಕಲೆಗ್ ಲೆಪ್ಪು ಕೊರ್ದು ತೆರಿಪಾಯೆರ್.

ಗುರುವಾರ ಕಾಂಡೆರ್ದ್ ಅಗ್ನಿಶಾಮಕ ದಳತಕುಲು, ಪೋಲೀಸೆರ್ ಅಂಚೆನೆ ಅಲ್ಪದ ಊರುದಕುಲು ಪುರಲ್ದ ಫಲ್ಗುಣಿ ತುದೆ ಅಲ್ಪ ಕೈತಲ್ ಒಲ್ಪ ನಾಡ್ಂಡಲಾ ಗಿರೀಶೆರ್ ತಿಕ್ಕಿಜೆರ್. ಇನಿ ಕುಡ ನಾಡರೆ ಪತ್ತಿನೆ ಶುಕ್ರಾರ ಮದ್ಯಾಹ್ನದ ಪೊರ್ತುಗು ಮೆರೆನ ಪುನ ತಿಕ್ಕ್ಂಡ್.

ಗಿರೀಶ್ ಮೇರ್ ಎಣ್ಮೂರ ಆದಿ ಬೈದೆರ್ಲೆ ಗರೊಡಿಡ್ ಕೋಟಿ ಪಾತ್ರಿಯಾದ್ ದೈವ ಚಾಕಿರಿ ಮಲ್ತೊಂದಿತ್ತೆರ್. ಸಾಧು ಸ್ವಭಾವದ ಮೆರೆಗ್ ಮದ್ಮೆ ಆದ್ ರಡ್ಡ್ ಜೋಕುಲುಲಾ ಉಂಡು. ದಾಯೆಗ್ ಇಂಚ ಆಂಡ್ ಪನ್ಪಿನ ಒಲವು ನನ ತಿಕ್ಕೊಡಾತೇ. ಮೇರ್ ನಾಪತ್ತೆ ಆತಿನ ಬಗೆಟ್ ಮೆರೆನ ಬೊಡೆದಿ ತಾರಾ ಪೋಲೀಸೆರೆಗ್ ಒಯಿಲ್ ಕೊರ್ದಿತ್ತೆರ್.