Last updated on July 7th, 2024 at 08:05 pm
ಅಭಿನಯ ಆರ್ಟ್ಸ್ ಪುತ್ತೂರು ಮೊಕ್ಲೆನ ಈ ವರ್ಷದ ಪೊಸ ನಾಟಕೊದ ಪೋಸ್ಟರ್ ಬುಡುಗಡೆ ಸಂಪ್ಯ ಅನ್ನಪೂರ್ಣೇಶ್ವರಿ ದೇವಲ್ಯೊಡು ನಡತ್ಂಡ್. ಅಭಿನಯ ಆರ್ಟ್ಸ್ ಪುತ್ತೂರು ಕೂಟೊದ 2ನೇ ವರ್ಷೊದ ಪಾದಾರ್ಪಣೆದ ಪೊರ್ತುಡು ಈ ಸರ್ತಿ “ಯಾನ್ ಪನೊಡಾ….ಏರ್ಂದ್…?” ಪನ್ಪಿ ನಾಟಕೊನು ಕಲಾಭಿಮಾನಿಲೆನ ಎದುರುಗು ಕೊರೊಂದುಲ್ಲೆರ್.
ತುಳು ರಂಗಭೂಮಿಡ್ ವಿಭಿನ್ನ ಶೈಲಿದ ಕಥೆನ್ ಕೊರ್ದು, ಜನೊಕುಲೆಗ್ ಕುತೂಹಲ ಮೂಡ್ಪಾದ್, ಅಬ್ಬರೊದ ದೃಶ್ಯ ಕಾವ್ಯನ್ ಕಟ್ಟ್‌ದ್ ಕೊರ್ದು, ಕಲಾಭಿಮಾನಲೆನ ಮನಸ್‌‌ಡ್ ಒರಿಪುನಂಚಿನ ನಾಟಕೊನ್ ಕೊರೊಂದುಲ್ಲ ಪಂದ್ ಸಂಚಾಲಕೆರ್ ತೆರಿಪಾದೆರ್. ಈ ನಾಟಕೊಗು ಕರಿನ ವರ್ಷೊದ ಯಶಸ್ವೀ ಮಣ್ಣ್ ಕಾರ್ಣಿಕೊದ ನಾಟಕೊನು ಬರೆಯಿನಂಚಿನ ಧನರಾಜ್ ಕುದ್ರಡ್ಕ ಅಂಚೆನೇ ತುಳು ರಂಗಭೂಮಿದ ಕಲಾ ಬಿರ್ಸೆ ಕೇಶವ ಮಚ್ಚಿಮಲೆ ಮೊಕುಲು ದಕ್ಷ ನಿರ್ದೇಶನ ಮಲ್ತ್‌ದೆರ್. ಈ ಸರ್ತಿ ಅಭಿನಯ ಕೂಟೊಗು ಗುರಿಕಾರೆ ಆದ್ ಗಂಗಾಧರ ರೈ ಕಲ್ಕೋಟೆ ಬೊಕ ಸಂಚಾಲಕೆ ಆದ್ ಪುರುಷೋತ್ತಮ್ ಕೆ ಎಂ ಮುಕುಲು ಕೂಟೊನು ನಡಪಾವೊಂದುಲ್ಲೆರ್. ಅಂಚನೆ ಕೂಟೊಗು ಪೊಸ ಸಂಗೀತ ನಿರ್ದೇಶಕೆರಾದ್ ಕೀರ್ತನ್ ಮಚ್ಚಿಮಲೆ ಬೊಕ ಸ್ರಜನ್ ಕಲ್ಕೋಟೆ ಪಾದಾರ್ಪಣೆ ಮಲ್ತೊಂದುಲ್ಲೆರ್. ಈ ಸರ್ತಿದ ನಾಟಕೊನು ಊರು-ಪರವೂರುಡು ಗೊಬ್ಬುದು ಕೂಟೊಗು ಎಡ್ಡೆ ಪುದರ್ ಕನಯೆರೆ ಕಲಾಭಿಮಾನಿಲೆನ ಸಹಕಾರ ಬೋಡು ಪಂದ್ ಸಂಚಾಲಕೆರ್ ತೆರಿಪಾಯೆರ್.
ಈ ಸರ್ತಿ ಯಶಸ್ವೀ ‘ಮಣ್ಣ್ ಕಾರ್ಣಿಕದ’ ಅಂಚನೆ ‘ಯಾನ್ ಪನೋಡ’ ರಡ್ಡ್ ನಾಟಕೊನುಲ
ಪ್ರದರ್ಶನ ಮಲ್ಪೆರೆ ಮೊಕುಲು ತಯಾರದುಲ್ಲೆರ್.
ಪ್ರದರ್ಶನೊಗ್ 8660518960 , 8277113318 , 9632311679 ಈ ನಂಬರ್‌ಲೆಗ್ ಲೆಪ್ಪು ಕೊರೊಲಿ ಅಂಚೆನೇ ಕೂಟೊದ ಒವ್ವೆ ಒಲವು ಬೋಡುಂದಾಂಡ @abhinaya_puttur ಇನ್ಸ್ಟಾಗ್ರಾಂ ಅಕೌಂಟ್‌ಡ್ ತೂವೊಲಿ ಪಂದ್ ಪಂಡೆರ್.