Last updated on July 10th, 2024 at 10:04 am
ಕುಡ್ಲ: ಕರಿನ ಒಂತೆ ದಿನೊರ್ದು ಪೊಲೀಸೆರೆಗ್ ತರೆಬೇನೆ ಆದಿತ್ತಿನ ಚಡ್ಡಿ ಗ್ಯಾಂಗ್‌ದಕುಲು ಪೊಲೀಸೆರೆ ಕೈರ್ದೇ ತಪ್ಪಾವೊನೆರೆ ತೂದಿತ್ತ್‌ದ್, ಈ ಪೊರ್ತುಡು ಪೊಲೀಸೆರ್ ಇರ್ವೆರೆ ಕಾರ್‌ಗ್ ಗುಂಡು ರಾಪಾದಿನ ನಡಕೆ ಇನಿ, ಬುಧವಾರ ಕಾಂಡೆ ನಡತ್‌ದ್ಂಡ್.
ಕುಡ್ಲಡ್ ಇಲ್ಲದಕ್ಲೆಗ್ ಹಲ್ಲೆ ಮಲ್ತ್‌ದ್ ಪಣವು-ಬಂಗಾದ್-ಕಾರ್ ಕಂಡಿಬೊಕ್ಕ ಕ್ಷಿಪ್ರ ಕಾರ್ಯಾಚರಣೆ ಮಲ್ತಿತ್ತಿನ ಪೊಲೀಸೆರ್ ಕೋಡೆ(ಅಂಗಾರೆ) ಚಡ್ಡಿ ಗ್ಯಾಂಗ್‌ದ ನಾಲ್ವೆರೆನ್ ಸಕಲೇಶಪುರಟ್ ಕೈದ್ ಮಲ್ತ್‌ದ್ ಕುಡ್ಲಗ್ ಲೆತೊಂದು ಬತ್ತಿತ್ತೆರ್.
ಮಧ್ಯಪ್ರದೇಶೊದ ಗುಣಾ ಜಿಲ್ಲೆದ ರಾಜು ಸಿಂಗ್ವಾನಿಯ (24 ವರ್ಸ), ಭೂಪಾಲ್‌ದ ಮಯೂ‌ರ್ (30 ವರ್ಸ), ಬಾಲಿ (22 ವರ್ಸ), ಗುಣಾ ಜಿಲ್ಲೆದ ವಿಕ್ಕಿ (21 ವರ್ಸ) ನಾಲ್ವೆರ್ ಕೈದಾತಿ ಆರೋಪಿಲು.
ಕಲ್ವೆ ಮಲ್ತಿ ಬೊಕ್ಕ ಅವ್ವೇ ಇಲ್ಲದ ಕಾರ್‌ಡ್ ಮುಲ್ಕಿ ಮುಟ್ಟ ಬತ್ತ್‌ದ್ ಕಾರ್‌ನ್ ಅಲ್ಪನೇ ಬುಡ್ದು ಬೆಂಗ್ಳೂರ್‌ದಂಚಿಗ್ ಬಸ್‌ಡ್ ಪಿದಡ್ದಿತ್ತೆರ್. ಆ ಪ್ರಕಾರ ಕಾರ್ ದೀದಿತ್ತಿನ ಜಾಗೆಗ್ ಇನಿ ಕಾಂಡೆ ಜಾಗೆ ಮಹಜರ್‌ಗ್ ಪೊಲೀಸೆರ್ ಆರೋಪಿಲೆನ್ ಲೆತೊಂದು ಬತ್ತಿತ್ತೆರ್. ಈ ಪೊರ್ತುಡು ಇರ್ವೆರ್ ಪೊಲೀಸೆರೆ ಮಿತ್ತ್ ಹಲ್ಲೆ ಮಲ್ತ್‌ದ್ ತಪ್ಪಾವೊನ್ರ ತೂತೆರ್. ಆತ್ಮ ರಕ್ಷಣೆಗ್ ಪೊಲೀಸೆರ್ ಆರೋಪಿಲಾಯಿನ ರಾಜು ಸಿಂಗ್ವಾನಿಯಾ ಬೊಕ್ಕ ಬಾಲಿನ ಕಾರ್‌ಗ್ ಶೂಟ್ ಮಲ್ದೆರ್.
ಪೆಟ್ಟಾತಿನ ಆರೋಪಿಲೆನ್ ವೆನ್ಲಾಕ್ ಆಸ್ಪತ್ರೆಗ್ ದಾಕಲ್ತ್‌ದ್ ಮರ್ದ್ ಮಲ್ತೊಂದುಲ್ಲೆರ್. ಆರೋಪಿಲು ನೂಕುದು ಪಾಡ್ದಿನೆರ್ದಾವರ ಇರ್ವೆರ್ ಪೋಲೀಸೆರೆಗ್ಲಾ ಪೆಟ್ಟಾದಿತ್ತ್‌ದ್, ಅಕ್ಲೆನ್ ಎ.ಜೆ. ಆಸ್ಪತ್ರೆಗ್ ದಾಕಲ್ತ್‌ದೆರ್.