Last updated on August 5th, 2024 at 07:11 pm
ಭಾರತೊ ದೇಸೊ ಪನ್ಪಿನವು ಮಸ್ತ್ ಪರಪೋಕುಲ್ ಅಂಚನೆ ಮಸ್ತ್ ಬಾಸೆಲ್ ಇಪ್ಪುನಂಚಿನ ಒಂಜಿ ಮಾಮಲ್ಲ ದೇಸೊ. ದೇಸೊದ ಪ್ರತಿ ಒಂಜಿ ಮೂಡ್ಯೆಡ್ಲಾ ಒಂಜೊಂಜಿ ಬಾಸೆಲ್ ಒಂಜೊಂಜಿ ಪರಪೋಕುಲೆನ್ ನಮ ತೂವೊಲಿ. ಒಂಜಿ ನೆಲತ್ತ ಬೊಕ್ಕ ಅಲ್ತ ಜನಕುಲೆನ ಪರಪೋಕುಗ್ ಬಾಸೆ ಪನ್ಪಿನವು ಬಾರೀ ಮುಖ್ಯ ಆದುಪ್ಪುಂಡು. ಇನಿ ನಮ್ಮ ದೇಸೊಡು ಅವ್ವೇತೋ ಬಾಸೆಲ್ ನಾಶ ಆಪುನೆ ಅತ್ತಂದೆ ಅಯ್ತ ಒಟ್ಟೊಟ್ಟುಗ್ ಅಯ್ನ ಪರಪೋಕು ಪನ್ಪಿನವುಲ ನಾಶ ಆತ್ನೆನ್ ನಮ ತೂವೊಲಿ.
ಒಂಜಿ ಬಾಸೆ ಪನ್ಪಿನವು ಅಯ್ನ ಪರಪೋಕುದ ಗುರ್ತ ಇತ್ತಿಲೆಕ. ಬಾಸೆ ಪನ್ಪಿನವು ಒಂಜಿ ಗಾಡಿ ಇತ್ತಿಲೆಕ ಒಂಜಿ ಸಾಮಾನ್‌ನ್ ಒಂಜಿ ಕಡೆರ್ದ್ ಕುಡೊಂಜಿ ಕಡೆಕ್ ಕೊಂಡತ್ ಪೋಯರ ಒಂಜಿ ಗಾಡಿ ಎಂಚ ಬೇಲೆ ಮನ್ಪುಂಡ ಅಂಚನೇ ಒಂಜಿ ಬಾಸೆ ಪನ್ಪಿನವು ತನ್ನ ಪರಪೋಕುನ್ ದುಂಬದ ಬರ್ಪಿನ ಪೀಳಿಗೆದ ಜೋಕುಲೆಗ್ ತೆರಿಪಾವುನಲ್ಪ ಬೇಲೆ ಮನ್ಪುಂಡು. ಅಂಚನೇ ಕೆಲವು ಪರಪೋಕುಲೆನ್ ಪಿದೈದ ಜನೊಕುಲೆಗ್ ತೆರಿಪಾವೊಡು ಪಂದ್ ಆಂಡ ಅಯ್ನವೆ ಆಯಿನ ಬಾಸೆಡ್ ತೆರಿಪಾವೊಡಾಪುಂಡು. ಉದಾರ್ಮೆಗ್ ತುಳುವ ಪರಪೋಕುದ ಒವ್ವಾಂಡಲ ಒಂಜಿ ಕ್ರಮೊನು ಜನಕುಲೆಗ್ ತೆರಿಪಾವೊಡು ಪಂದ್ ಆಂಡ ಅವೆನ್ ತುಳು ಬಾಸೆಡೆ ತೆರಿಪಾವೊಡು, ಅವ್ವತ್ತಂದೆ ಅವೆನ್ ಒವ್ವೆ ಬೇತೆ ಬಾಸೆಡ್ ತೆರಿಪಾಯ ಪಂದ್ ಆಂಡ ಅವ್ವು ಒವ್ವೋ ಬೇತೆ ಅರ್ಥೊಲೆನ್ ಕೊರ್ಪುನ ಸಾಧ್ಯತೆಲ ಇಪ್ಪುಂಡು. ಪರಪೋಕುನ್ ಒರಿಪಾವುನ ಬೊಕ್ಕ ತೆರಿಪಾವುನ ಬೇಲೆಡ್ಲ ಬಾಸೆದ ಪಾತ್ರೊ ಮಾಮಲ್ಲ. ಕಥೆ ಪನ್ಪುನೆ, ನಾಟಕೊಲೆನ್ ಮನ್ಪುನೆ ಅತಂಡ ಬರೆಪಿನ ಮೂಲಕ ಆವಡ್ ಇಂಚ ಅವ್ವೇತೋ ಸಾದಿಡ್ ಒಂಜಿ ಬಾಸೆ ತನ್ನ ಪರಪೋಕುನ್ ಒರಿಪಾವೊನ್ಯರ ಬೊಕ್ಕ ಪಿದೈದ ಜನೊಕುಲೆಗ್ ತೆರಿಪಾಯರ ಪುನೆಪುಂಡು.
ಬಾಸೆ ಪನ್ಪಿನವು ಕುಡೊಂಜಿ ರೀತಿಡ್ಲ ಒಂಜಿ ಪರಪೋಕುಗ್ ಮುಖ್ಯ ಆಪುಂಡು, ಅವ್ವೆಂಚ ಪಂಡ ಪ್ರತಿ ಒಂಜಿ ಬಾಸೆಡ್ಲ ಕೆಲವಾತ್ ಬಿಸೇಸವಾಯಿನ ಪದೊಕುಲೆನ್ ನಮ ತೂವೊಲಿ. ಅಂಚನೇ ಕೆಲವು ಆಚರಣೆಲೆಡ್, ಪರಪೋಕುಲೆಡ್ ತನ್ನನೇ ಆಯಿನ ಕ್ರಮೊಕುಲೆನ್ ತುವೊಲಿ, ಇಂಚಿಪ್ಪುನಗ ಅವೆನ್ ಜನೊಕುಲೆಗ್ ತೆರಿಪಾನಗ ಪದೊ ಪ್ರಯೋಗೊ ಪನ್ಪಿನವುಲ ಮಸ್ತ್ ಮುಖ್ಯ ಆಪುಂಡು, ಒಂಜಿ ಪರಪೋಕುನು ಪೊಸ ಜನೊಕುಲೆಗ್ ತೆರಿಪಾನಗ ಸಮ ಆಪಿನ ಪದೊಕುಲೆನ್ ಗಲಸ್‌ದ್ ನಮ ತೆರಿಪಾವೊಡಾಪುಂಡು. ಅವ್ವತ್ತಂದೆ ಒಂಜೇ ಅರ್ಥ ಕೊರ್ಪುಂಡು ಪಂದ್ ಬೇತೆ ಒವ್ವೋ ಬಾಸೆದ ಪದೊಕುಲೆನ್ ಗಲಸ್ಂಡ ಅವ್ವು ತಪ್ಪಾಪಿನ ಸಾಧ್ಯತೆಲಾ ಉಂಡು. ಉದಾರ್ಮೆಗ್, ನಮ್ಮ ಅಪ್ಪೆ ಬಾಸೆ ತುಳು ಬಾಸೆಡ್ ಇಪ್ಪುನಂಚಿನ ಅವ್ವೇತೋ ಪದೊಕುಲೆಗ್ ಕನ್ನಡ ಆವಡ್, ಇಂಗ್ಲಿಷ್ ಆವಡ್ ಅತ್ತಂಡ ಬೇತೆ ಒವ್ವೇ ಬಾಸೆ ಆವಡ್ ಅವೆಟ್ಟ್ ಸೀದ ಅತಂಡ ಸರಿಯಾಯಿನ ಅರ್ಥಲು ಇಜ್ಜ.
ಒಂಜಿ ಪರಪೋಕು ಆವಡ್ ಅಂಚನೇ ಒಂಜಿ ಬಾಸೆ ಆವಡ್ ಅವ್ವು ತನ್ನ ಜನೊಕುಲೆನ್ ಒಗ್ಗಟ್ಡ್ ದೀವೊನ್ನೆಟ್ಟ್ ಮಸ್ತ್ ಮಲ್ಲ ಪಾತ್ರೊ ವೈಸಾವುಂಡು. ಇನಿ ಈ ಇಸ್ವೊಡು ಏತೋ ಬಾಸೆಲು ಮಾಯಕ ಆತ್ಂಡ್ ಒಟ್ಟೊಟ್ಟಿಗೆ ಅಯ್ತ ಪರಪೋಕು ಪನ್ಪಿನವುಲ ಮಾಯಕ ಆತ್ಂಡ್, ಒಂಜಿ ಪರಪೋಕು ಮಾಯಕ ಆಂಡ್ ಪಂಡ ಆ ನೆಲಕ್ ಆಯಿನ ಮಲ್ಲ ನಸ್ಟೋ ಅವ್. ಅಂಚನೇ ಇನಿಕ್ ಏತೋ ಬಾಸೆಲೆನ್ ಪಾತೆರುನ ಜನೊಕುಲೆನ ತಂಕೆಲ ಮಸ್ತ್ ಕಮ್ಮಿ ಆವೊಂದುಂಡು. ಕ್ರಮೇಣ ನಾಶ ಆಪುನಂಚಿನ ಸಾಧ್ಯತೆಲ ಉಂಡು, ನಾಶ ಆಂಡ್ ಪಂಡ ಅವೆತ್ತ ಪರಪೋಕು ಪನ್ಪಿನವುಲ ಮಾಯಕ ಆಪಿನ ಸಾಧ್ಯತೆಲು ಜಾಸ್ತಿ ಇಪ್ಪುಂಡು. ಇಂಚ ಇಪ್ಪುನ ಬಾಸೆಲೆಡ್ ನಮ್ಮ ಅಪ್ಪೆ ಬಾಸೆ ತುಳುಲಾ ಒಂಜಿ, ಇನಿಕಾದ್ ತುಳು ಬಾಸೆ ಪಾತೆರುನಕ್ಲೆನ ತಂಕೆ ಮಸ್ತ್ ಕಮ್ಮಿ ಆವೊಂದುಂಡು, ಉಂದೆಕ್ ನೆವನೊಲುಲ ಮಸ್ತ್ ಉಂಡು. ಇನಿ ನಮ್ಮ ಅಪ್ಪೆಬಾಸೆ ತುಳು ಅವ್ವೇತೋ ತನ್ನನೇ ಆಯಿನ ಮೂಲ ಪದೊಕುಲೆನ್ ಕಳೆವೊಂದ್ಂಡ್ ಆ ಜಾಗೆಗ್ ಇನಿ ಬೇತೆ ಬಾಸೆದ ಪದೊಕುಲು ಬತ್ ಕುಲ್ದ್ಂಡ್. ಉಂದು ಸೀದ ನಮ್ಮ ಪರಪೋಕುದ ಅಂಚನೇ ನಮ್ಮ ಪರಿತಿರಿದ ಮಿತ್ತ್‌ಗ್ ಉಲಯಿರ್ದುಲಯಿ ಬೂರ್ದಿನ ಮಾಮಲ್ಲ ಪೆಟ್ಟ್, ಎಂಚ ಪಂಡ ಒಂಜಾತ್ ವರ್ಸೊಲೆನ ಪಿರವು ತುಳುನಾಡ್‌ದ ಜನಕುಲೆನ ಬಾಯಿಡ್ ಪಾಡ್ದನ ಪನ್ಪಿನವ್ ಬಾರಿ ಪೊರ್ಲುಡೆ ನಲ್ತೊಂದಿತ್ತಂಡ್ ಆಂಡ ಇನಿ ಪಾಡ್ದನ ಪನ್ಪಿನವು ಕೇನ್ಯರ್ನೆ ಇಜ್ಜಂದೆ ಆದ್ ಪೋತುಂಡ್, ಮಾಯಕ ಆದ್ ಪೋತುಂಡ್. ಇತ್ತೆದ ಜೋಕುಲೆಡ ಪಾಡ್ದನದ ಬಗ್ಗೆ ಕೇಂಡ ಮಿನಿ, ಅಂಚಾ ಪಂಡ ದಾದ..!? ಪಂದ್ ಕೇನುನಕ್ಲೆ ಎಚ್ಚ..!! ಪರಪೋಕು ಮಾಯಕ ಆಂಡ್ ಪಂಡ ಆ ನೆಲೊತ್ತ ಪರಿತಿರಿಯೆ ಮಾಯಕ ಆಯಿಲೆಕ.
ಉಂದೆನ್ ಮಾತ ತೂದ್ ಒಂಜಿ ಬಿಸಯೊನು ಪನೊಲಿ ಅವ್ ದಾದ ಪಂಡ ಒಂಜಿ ನೆಲಮೂಲ ಬಾಸೆ ಪನ್ಪಿನವು ತನ್ನ ನೆಲಮೂಲ ಪರಪೋಕುಗು ಮಸ್ತ್ ಮುಖ್ಯವಾಯಿನವು, ಅವ್ ಬಾಸೆ ಜನೊಕುಲೆನ ಬಾಯಿಡ್ದ್, ಅಂಚನೇ ಅಲ್ತ ನೆಲೊಡ್ದ್ ಕರಿದ್ ಪೊಂಡ್ ಪಂದ್ ಆಂಡ, ಅಲ್ತ ಪರಪೋಕು ಕರಿದ್ ಪೋಪುನೆಲ ನಿಗಂಟ್ ಪಂದ್ ಪನೊಲಿ.
ನಮ ನಮ್ಮ ಅಪ್ಪೆಬಾಸೆ ತುಳು ಒರಿಪಾಗ, ತುಳುವ ಪರಪೋಕುಲ ಒರಿಪಾಗ ನಮಕ್ ಆಯಿನಲ್ಪ ಮಾತ ನಮ್ಮ ಅಪ್ಪೆಬಾಸೆನ್ ಗಲಸಾಗ..!!
ಬರವು: ವಿಶಾಲ್ ರೈ ಕೆ, ಪುತ್ತೂರು
ಇತಿಹಾಸ ಬೊಕ್ಕ ಪ್ರಾಕ್ತನಶಾಸ್ತ್ರ ಸಂಶೋಧನಾರ್ಥಿ