Last updated on August 20th, 2024 at 03:42 pm
ಕಾಸ್ರೋಡ್: ಆ.20: ಕರೆಂಟ್ ಶಾಕ್ ಆಕ್‌ದ್ ಜವನೆ ಒರಿ ತೀರ್ದಿನ ನಡಕೆ ಮಂಜೇಶ್ವರದ ಪೊಸಬೊಟ್ಟು ಪನ್ಪಿನವುಲು ಸೋಮಾರ ಬಯ್ಯಡ್ ನಡತ್‌ದ್ಂಡ್.
ತೀರ್ದಿನಾರ್ ಯಶವಂತ್(21) ಪಂದ್ ತೆರಿದ್ ಬೈದ್ಂಡ್.
ಸೋಮಾರ ಬಯ್ಯಡ್ ಇಲ್ಲದ ಟೆರೇಸ್‌ಡ್ ಬೂರ್ದಿತ್ತಿನ ಮಡಲ್ ದೆಪ್ಪೆರೆ ಪೋದಿತ್ತೆರ್. ಈ ಪೊರ್ತುಡು ಮಡಲ್ ಐಟೆನೇ ಮುಟ್ಟಡ್ ಪೋದಿತ್ತಿನ ಹೈಟೆನ್ಶನ್ ಕರೆಂಟ್ ವಯರ್‌ಗ್ ಕೊಲ್ತ್‌ದ್ಂಡ್. ಉಂದೆರ್ದಾವರ ಶಾಕ್ ಆಕ್‌ದ್ ಯಶವಂತೆ ಅಲ್ಲೇ ಕುಸ್ಕ್‌ದ್ ಬೂರ್ದ್ ತೀರ್ದೆರ್ ಪಂದ್ ತೆರಿದ್ ಬೈದ್ಂಡ್.
ಪಾಕ ಪೊರ್ತು ಕರೀಂಡಲಾ ಯಶವಂತೆ ತಿರ್ತ್ ಬರಂದಿನೆನ್ ತೂದು ಅರೆನ ಸಹೋದರಿ ಟೆರೇಸ್‌ಗ್ ಪೋದು ತೂನಗ ನಡಕೆ ಬೊಲ್ಪುಗು ಬೈದ್ಂಡ್.
ಯಶವಂತೆ ಉಪ್ಪಳ ಶಾಲೆದಲ್ಪದ ಪೆಟ್ರೋಲ್ ಬಂಕ್‌ಡ್ ರಡ್ಡ್ ವರ್ಸೊರ್ದಿಂಚಿ ಬೇಲೆ ಮಲ್ತೊಂದಿತ್ತ್‌ದ್, ಸೋಮಾರ ಬಯ್ಯಡ್ ಬೇಲೆಗ್ ಪಿದಡೋಂದಿತ್ತೆರ್, ಈ ನಡುಟು ಟೆರೇಸ್‌ದ ಮಿತ್ತ್ ಬೂರ್ದಿನ ಮಡಲ್ ದೆಪ್ಪೆರೆ ಪೋನಗ ಈ ನಡಕೆ ನಡತ್‌ದ್ಂಡ್.
ಈ ಬಗೆಟ್ ಮಂಜೇಶ್ವರ ಪೋಲೀಸ್ ಸ್ಟೇಷನ್‌ಡ್ ಪ್ರಕರಣ ದಾಕಲಾತ್ಂಡ್.