Last updated on August 29th, 2024 at 09:28 am
ಒಡಿಪು: ರೈಲ್‌ಡ್ ಜವನ್ದಿಗ್ ಲೈಂಗಿಕ ಕಿರುಕುಳ ಕೊರ್ತಿನ ಪ್ರಕರಣೊಗು ಸಂಬಂಧಿತ್‌ದ್ ಮಣಿಪಾಲ ಸ್ಟೇಶನ್‌ದ ಪೊಲೀಸೆರ್ ಆರೋಪಿ ಭಟ್ಕಳದ ಮೊಹಮ್ಮದ್‌ ಶುರೈಮ್‌(22)ನ್ 20 ಗಂಟೆದುವಯಿ ಕಾಲಿ ಫೋಟೊದ ಆಧಾರೊಡು ಕೈದ್ ಮಲ್ತ್‌ದೆರ್.
ನಡಕೆದ ಒಲವು
ಒಡಿಪುದ ಗುಡ್ಡೆಯಂಗಡಿ ನಿವಾಸಿ ಬೆಂಗಳೂರ್‌ಡ್ ಐಟಿ ಬೇಲೆ ಮಲ್ತೊಂದುಪ್ಪುನ ಜವನ್ದಿ ಆ. 24ಕ್ ರಾತ್ರೆ ಬೆಂಗಳೂರ್‌ರ್ದ್ ಮುರುಡೇಶ್ವರಗ್ ಪೋಪುನ ರೈಲ್ ಮಿತ್ತರ್ದಿತ್ತೆರ್.
ಆ. 25ತಾನಿ ಕಾಂಡೆ 11 ಕ್ ರೈಲ್ ಮೂಲ್ಕಿ ಕಡತಿ ಬೊಕ್ಕ ಆರೆಗ್ ಆರೋಪಿ ಗಡೀಗಡಿ ಲೈಂಗಿಕ ಕಿರುಕುಳ ಕೊರೊಂದಿತ್ತೆ. ಬೊಕ್ಕ ಲಡಯಿ ಆದ್ ಮಾಪು ನಟ್ಟ್‌ದಿತ್ತೆ. ಅಪಗನೇ ಜವನ್ದಿ ಆಯನ ಪಟ ಕಲೆದ್ ರೈಲ್ವೇ ಆ್ಯಪ್‌‌ದ ಮುಕೇನ ಒಯಿಲ್ ಕೊರ್ದಿತ್ತೆರ್. ಅಂಚೆನೇ ಒಡಿಪು ರೈಲ್ವೇ ಉಂತಡೆಗ್ ಬತ್ತಿನೇ ರೈಲ್ವೇ ಪೊಲೀಸೆರೆಗ್ಲಾ ಒಯಿಲ್ ಕೊರ್ತೆರ್.
ರೈಲ್ವೇ ಪೊಲೀಸೆರ್ ಉಂದೆನ್ ಮಣಿಪಾಲ ಸ್ಟೇಶನ್‌ಗ್ ತೆರಿಪಾದೆರ್. ಈ ನಡುಟು ರೈಲ್ವೇ ಆ್ಯಪ್‌‌ಡ್ ಒಯಿಲ್ ದಾಕಲಾಯಿನೇ ಮಿತ್ತಅಧಿಕಾರಿಲು ಒಡಿಪು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಲೆನ ಗುಮನೊಗು ಕನತ್‌ದೆರ್. ರಪಕ್ಕ ಕಾರ್ಯಪ್ರವೃತ್ತೆರಾಯಿನ ಮಣಿಪಾಲ ಪೊಲೀಸೆರ್ ಕಾರ್ಯಾಚರಣೆಗ್ ಜತ್ತೆರ್.
ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಡಾ| ಕೆ. ಅರುಣ್‌ ಮೆರೆನ ನಿರ್ದೇಶನದಂಚ ಮಣಿಪಾಲ ಸ್ಟೇಶನ್ ಸರ್ಕಲ್‌ ಇನ್‌ಸ್ಪೆಕ್ಟರ್‌ ದೇವರಾಜ್‌ ಟಿ.ವಿ., ಪಿಎಸ್‌ಐ ರಾಘವೇಂದ್ರೆರ್, ಎಎಸ್‌ಐ ವಿವೇಕ್‌, ಸಿಬಂದಿ ಇಮ್ರಾನ್‌, ರಘು, ವಿದ್ಯಾ ಕಾರ್ಯಾಚರಣೆಡ್ ಪಾಲ್‌ಪಡೆತೆರ್. ಜವನ್ದಿನ ಈ ಪಜ್ಜೆರ್ದಾವರ ಆರೋಪಿನ್ ಪೊಲೀಸೆರ್ ಆತ್ ಬೇಗ ಕೈದ್ ಮನ್ಪೆರೆ ಸಾಧ್ಯ ಆತ್ಂಡ್.
ಕಾರ್ಯಾಚರಣೆದ ಒಲವು
ಜವನ್ದಿ ಕಲೆತಿನ ಆರೋಪಿನ ಫೋಟೋ ಮಾತ್ರ ಪೊಲೀಸೆರೆಗಿತ್ತಿನ ಲೀಡ್ ಆದಿತ್ತ್ಂಡ್. ಆ ಪ್ರಕಾರೊಡು ಪೊಲೀಸೆರ್ ಆ ದಿನ ಆ ರೈಲ್‌ದ ಕಂಪಾರ್ಟ್‌ಮೆಂಟ್‌ಡ್ ಪ್ರಯಾಣ ಮಲ್ದಿನ ಪ್ರಯಾಣಿಕೆರೆ ಲಿಸ್ಟ್‌ ಗೆತೊಂದಿತ್ತೆರ್. ಒಟ್ಟು 1,200 ಜನ ಲಿಸ್ಟ್‌ಡ್ ಇತ್ತೆರ್. ಆಯೆ ತಲರೆಕ್ ಮುಸ್ಲಿಮೆರೆ ಟೊಪ್ಪಿ ಪಾಡ್ದಿತ್ತಿನೆರ್ದಾವರ ಮುಸಲ್ಮಾನೆ ಪಂದ್ ಎನ್ನ್‌ದ್ ಪೊಲೀಸೆರ್ ಆ ರೈಲ್‌ಡಿತ್ತಿಧ ಮುಸಲ್ಮಾನೆರೆನ ಲಿಸ್ಟ್‌ ಗೆತೊಂಡೆರ್. ಬೊಕ್ಕ ಸಿಎನ್‌ಆರ್‌ ನಂಬರ್‌ಲೆನ್ ಗೆತೊನ್ನಗ ಅಲ್ಪ ಇತ್ತಿನ ಮಾತೆರೆನ ಮೊಬೈಲ್‌ ನಂಬ್ರ ಪೊಲೀಸೆರೆಗ್ ತಿಕ್ಕ್ಂಡ್. ಈ ನಡುಟು ಪೊಲೀಸೆರ್ ಬೇತೆ ಬೇತೆ ಸಿಸಿ ಟಿವಿ ದೃಶ್ಯಾವಳಿಲೆನ್ ಪರಿಶೀಲಿತ್‌ದ್ ಆರೋಪಿನ ಚಲನವಲನ ನಾಡ್ದ್ ಪತ್ಯೆರ್. ಆಯೆ ಭಟ್ಕಳದ ನಿವಾಸಿ ಪಂದ್ ಪೊಲೀಸೆರೆಗ್ ಪಿಂದ್ಂಡ್. ಅಂಚೆನೇ ಭಟ್ಕಳೊಗು ಪೋದು ಪೊಲೀಸೆರ್ ಆಯನ್ ವಶೊಕು ಗೆತೊಂದೆರ್.
ಆರೋಪಿ ಭಟ್ಕಳಡ್ ಕಲ್ತೊಂದಿತ್ತ್‌ದ್, ಮೈಸೂರ್‌ದ ಜಮಾತ್‌‌ಡ್ 10 ದಿನೊತ ಕೋರ್ಸ್‌ ಮುಗಿತ್‌ದ್ ಊರ್‌ಗ್ ಬರೊಂದಿತ್ತೆ ಟಂದ್ ತೆರಿದ್ಂಡ್. ಇತ್ತೆಗ್ ಆರೋಪಿನ್ ಕೋರ್ಟ್‌ಗ್ ಹಾಜರ್ ಮಲ್ತಿತ್ತ್‌ದ್, ನ್ಯಾಯಾಂಗ ಬಂಧನ ಕೊರ್ತುಂಡು.